Ralkap Bochan In Mei Hri Chahpiak A Hmangtu Pa Cu Meithal In An Kah Thah!

Ralhrang Lei Tang Paohpaoh Thah Thluahmah An Si Cang Ko Lai!
===========
Taung Ngu Ah Ralhrang Ralkap Bochan In Mei Hri Chahpiak A Hmangtu Pa Cu Meithal In An Kah Thah! Bagu ramthen Taung Ngu khuapi ah SAC ralhrang ralkap vennak in mei thah a hmangtu pa cu meithal in kah that a tong i, a thi tiah khuapi chung umtu nih an chim.

Febuary 12 chun hrawngah SAC ralhrang ralkap pahnih nih meithal i tlaih hratin kilvennak an laakpiak i, cuticun mei hri a chahpiaktu pa cu Uk Cuat Taan (အုတ်ကျွတ်တန်း) pawngah mei hri a chah lioah mizei hngalh lomi nih meithal in a kah that.

Ralkap nih meithal he kilvennak an laakpiak ko nain vawi (3) bak kah that a tong i, a thi colh tiah khuami pakhat nih a chim. Meithal kahnak kong he pehtlai in zeibantuk nih an kah that timi hi theihfian a si rih lo.

CDM Tuahtu Hna Nih An Dirhmi Phu PDF-CEU Nih Tamu Peng Chung Buesawtyi Hruaitu An Thah! Ralkap chungin CDM tuahtu hna i hruainak in an dirhmi PDF-CEU phu nih dalan paoh cu kan thah thluamah cang lai, Febuary 12 in rian kan thok cang tiah cathanh an chuah.

Buesawtyi le dalan pawl kahdohnak cu Febuary 12 in kan thok i, Sagaing ramthen Tamu peng chung Kyun Taung khua ah a ummi Buesawtyi hruaitu cu kan thah tiah cathanh an chuahmi ahcun an langhter chih.

Kan thahmi pa cu SAC ralhrang ralkap kuttang ah a ummi Buesawtyi hruaitu Myo Win a si i, chun sml 2:00 hrawngah kan thah tiah PDF-CEU nih cathanh an chuah hi a si. PDF-CEU phu cu a hlan ah ralkap bohmu level le bogyi level telh in rank ngeimi dangdang hna nih CDM tuah hratin an dirhmi phu a si.

Patein Thonginn In Thongtlami (7) An Thlah! SAC ralhrang nih Febuary (12) Rampi Ni ah Patein thonginn chungin sualnak le thatlonak an tuah ruangah thongthlak a tongtu minung (7) hna cu zalonnak a pek hna tiah anmahlei thawng latu nih DNA ah an chim.

An thlahmi minung (7) chungin minung (3) cu Patein thonginn chungin an si i, Patein Chaungtha lampi cungah a ummi meng (12) nak zawn i Thit Toe Pin thonginn in minung (4) an si. Anmah hna cu a rauh hlanah a luat cang dingmi lawngte an si tiah theih a si.

Febuary (12) ah an thlahmi hna chungah ramkhel ruangah hramhram in tlaih hratin thongthlak a tongtu hna cu i tel loin ritsi zuar/hmangtu pawl, mi hlen hmangtu pawl, phaisa phalh in lentecelhnak tuahtu pawl an si tiah theih a si.

Febuary 12 Zanlei Sml 5:00 Tiangah Thongtlami Pakhat Hmanh An Chuah Rih Lo! Febuary 12 zanlei sml 5:00 tiangah Kawlram chungah a ummi thonginn kip in ramkhel ruangah thongthlak a tongtu hna cu pakhat hmanh an thlah rih lo tiah ramkhel ruangah thong a rak balmi U Htun Kyi nih a chim.

Febuary 12 zanlei sml 5:00 tiangah ramkhel ruangah thongthlak a tongtu pakhat hmanh an thlahmi a um rih lo. Ing Sein thonginn lawng a si lo, hmun damgah a ummi thonginn chungin siseh pakhat hmanh an thlahmi a um rih lo tiah a chim.

Febuary 12 chun sml 12:00 hrawng ahcun Ing Sein thonginn in thongtlami a phortu motor 3-4 cu an chuak hna i, minung 90 an thlah hna nain ramkhel ruangah thongthlak a tongmi pakhat hmanh an tel lo tiah a chim. Motor 3 in an chuah/thlah than hna lai tiah thawngpang theih a si nain zanlei sml 5:00 tiangah pakhat hmanh an thlahmi an um rih lo, tiah Deltanewsagency nih a langhter.

Buesawtyi Hna Caah Thilri Phorhmi Cu PDF Nih An Tlaih! Sagaing ramthen Minkin peng chung Min Set khua, Taung Phyu khua le pawngkam khua ah a ummi Busawtyi hna caah thilri an phorhmi cu Min Kin PDF nih kan tlaih tiah anmah nih cathanh an chuah hi a si.

Febuary 11 ah khan Chin Dwin Myit chungah Min Kin PDF nih humhimnak lain zohfelnak le checking an tuah tikah Buesawtyi hna nih an cawkmi thilri tampi cu tilawng pakhat nih a phorh i, cu kong cu mipi nih thawngpang an kan pek ningin kan tlaih khawhnak a si tiah an chim.

Buesawtyi hna nih an cawkmi thilri hna hi sing 150 man leng a si i, a dihlak in an hrawhpiak tiah theih a si.
Min Kin peng chungah SAC ralhrang ralkap he aa pehtlaimi thilri hna cu cawk lo ding, zuar lo dingin Min Kin PDF nih ralrinnak an pe than tiah theih a si.

Rampi Ni Ah SAC Ralhrang Ralkap Sniper Hna Nih A Thli Thup In Runvennak An Laak! Ayeyarwady ramthen Hin Tha Tah khuapi chung minung tamnak zawnah inn a sannak cungin sniper hmangtu cu hmunhma an laak dih tiah khuapi chung umtu nih DNA sinah an chim.

Zinglei sml 9:00 hrawngah Aa Ga bazar hmai, Man Bar Khaing lampi cungah Emerald Skill & Fabric (2) thilpuan dawr le chungkhar sui dawr hna inn luang cungin ralkap le palek hna cu hmuh an si. Ralkap pakhat ah palek (3) cio, sniper hmangin mi an bawhmi cu hmuh an si tiah khuapi chungah a ummi pakhat nih a chim.

Rampi Ni caah hriamtlaitu hna nih SAC ralhrang ralkap ralchanhnak le kahdohnak an tuah lai timi thawngpang a chuah ruangah atu bantukin sniper hmangtu hna tiangin an chiahnak a si lai tiah midang pakhat zong nih a chim ve.
Hin Tha Tah khuapi ch Ayeyarwady ramthen chungah cun minung an tam taktaknak hmun a si i, pengkomh level in cozah bawi umnak khuapi pakhat asi.

Naihrawng Febuary 10 ah khan Hin Tha Tah khuapi Shew Syi Tyi lamah a ummi SAC ralhrang ralkap raltuknak vanlawng leiah bohmu inn pakhat cu mipi vengtu nu hriamtlai hna nih bomb an puah hnawh cang tiah theih a si.

SAC Ralhrang Ralkap Umnak Gaw Tui Gyu Sakhan Cu KNU Nih An Kah, Ralhrang (2) An Thi! SAC ralhrang kuttang ah a ummi Lu Taw peng chung Myauh Paing Lyi Kaw ah a ummi Gaw Tui Gyu ralkap sakhan cu KNU Brigate (5) kuttang ah a ummi Battalion hna nih Febuary (12), zinglei sml 9:45 ah luhhnawh in an kah hna i, ralhrang ralkap (2) an thi tiah Mutaw thawngzamhnak nih an langhter.

SAC ralhrang ralkap hna nih Mutaw pengkomh chungah nuhrin covo buarnak zong pehzulh in an tuah zungzal i, Febuary 9 zinglei sml 3:30 ah Pha Pun khuapi ah a ummi ralhrang ralkap hna nih minung umnak inn (2) hna cu luhhnawh in an hrawhpiak hna pinah inn chungah thilri zong an hrawh dih tiah theih a si.

Cupinah SAC ralhrang ralkap cu Pha Pun khuapi chungah a ummi Htu Maw De ralkap sakhan cu motor hmangin tlunkal nan duh ahcun zatlang citmi motor pakhat ah (50000), thilri phortu motor pakhat ah (100000) tiang an hal hna i, cuticun an kalter hna tiah theih a si. Credit: The Federal Times