Ralkap A Lut Ding Pawl Raltuk Cawnak Sianginn Kan Timhtuah Dih Cang Tiah SAC Nih A Chim. People’s Military Service law (ပြည်သူ့စစ်မှုထမ်းဥပဒေ) a thawk mi SAC nih raltuk cawnnak sianginn pawl timhtuahnak cu kan lim cang tiah a chim.
Naypyidaw, March 4 ah an tuah mi People’s Military Service Law a tawlrel tu Central phu a voi 2 nak rian kong ceihhmainak meeting ah SAC Defense Minister General Tin Aung San nih a chim.
“Ralkap a lut ding mipi pawl raltuk cawnnak pehzulh in ṭha tein an tuah khawh nakhnga kan tawlrel khawh cang” tiah thawngzamh pawl sin ah a chim.Cun People’s Military Service Law an ṭialnak zong a voi 3 nak a hran fehter a si cang tiah a chim.SAC nih People’s Military Service Law hi a nung cang tiah February 20 ah a thanh i Kawl titoih puai a dih hnu April zungkhar dih ah a tak in ṭuanchuah a si lai tiah an chim.
Tha Tuk : Generation Z Pawl Nih SAC Ralkap An Doh Ning. Myanmar ram ah SAC ralkap nih hramhram in uknak a lak hnu kum 3 leng caan chung ah kahdohnak a fak chin thluahmah i a luancia kum 3 lio ah Democracy uknak hmu than ding in duhlonak a langhter mi mino pawl cu zalonak caah hrimtlaih in dothlennak an tuah hna.
Mipi umnak hmun le ralram kahdohnak hmunhma zong then lo in SAC ralkap nih a duhnak hmun poah bom a thlak nain a tuah mi thil pawl kha vawleicung pi theih lo ding in a tuam. Sihmanhsehlaw ramdang thawngzamh Channel 4 News nih dothlennak a tuah mi mino pawl he biaruah kho ding in Myanmar ramchung ah a thli tein a lut.Channel 4 News nih Myanmar ram ah har ngai in a lut kho i Generation Z mino pawl nih zeitindah SAC ralkap an doh timi le mino hna nih democracy hmuhnak ding caah an nunnak an sian timi kha Documentary a lak mi a si.
Good News : Ponnagyun Kahdohnak Ah SAC Byuha-hmu, Battalion Commander Pawl An Thi. Rakhine ram, Ponnagyun khua um SAC IB 550 kahdohnak ah SAC lei byuha-hmu, Battalion Commander rank pawl an thi tiah AA nih an thanh.
IB 550 battalion comnander a si mi DSA 42 in sianginn a dih mi Colonel Myo Min Ko Ko, Major Saw Htwe, LIB 208 in Battalion Commander Lt. Colonel Phyo Thu Aung hna le SAC ralkap tampi cu ni 13 chung kahdohnak ah an thi tiah AA nih cathanh an chuah.
A nung in an tlaih mi SAC ralkap pawl zong an um i thandar a raang thlai mi SAC ralkap le an chungkhar pawl cu an nunnak an zuah hna i ṭha tein an zohkhenh hna tiah AA nih an chim.SAC IB 550 cu AA nih February 21 ah kah hram an thawk i March 4 ah tlamtling tein an lak khawh.SAC nih vanlei le Sittwe khua, Buthidaung khua um sakhaan pawl zong in hriamngan kah an bawmh len hna nain a hnu ah sakhaan thlah hi a si.Credit : The Chinland Post