Ralhrang phu nih khuami 15 hrawng an tlaih hna, a poi taktak ee!

Breaking News: Hakhalay Khuami 15 hrawng SAC Ralhrang nih an Tlaih Hna
———-
Nihin chun sml. 12:00 hrawng ah Hakhalay khua ah SAC ralhrang pawl an phan i a zaam kho lomi khuami 15 hrawng an tlaih hna pin ah inn zong an khangh hna, tiah thawng kan theih.

Khuami pakhat nih, “Nizaan hrawng ah khan khuami dihlak ngawt an zaam dih cang hna nain a zaam kho lomi minung 15 hrawng khua ah an taang. SAC ralhrang nih an tlaih hna i Wesleyan Biakinn chung ah an chiah hna. Khua inn 3 hrawng zong an khangh cang,” tiah a chim.

Tlaih a tongmi hna hi ngandamlomi le kum upa deuh a zaam kho lomi an si hna, tiah khuami nih an chim. Zaanlei sml. 4:00 tiang ah inn ann kangh rih caah inn zeizah ngaingai a kangh timi fiangfai in theih a si rih lo.

Paletwa Peng MP Salai Myo Thaih Inn le Biakinn An Chuh. Chin ramkulh Paletwa peng, Sami khuapi in MP a tling mi Salai Myo Thaih a umnak inn le a inn vuang chung ah sakmi Mission Baptist Church cu Ralkap nih an chuh i, an hrenh khanh hna tiah theih a si.

Paletwa Peng MP Salai Myo Thaih hi Chin Ramkulh NLD EC chungtel a silawng silo in chungtuan (secretary) rian a tuan cuahmahmi a si. Amah hi, 2015 thimnak ah tei i, 2020 thimnak zong ah Pyithu Hluttaw Palai a tling than mi a si.
Sami khuapi ah a inn le a inn kiang ummi Biakinn an chuh hi December 26 ah a si tiah, Zalen nih a tial.

Chin ramkulh chung ah NUG Minister Dr. Salai Lian Hmung Sakhong a inn Hakha ah an chuh, hrenh piak hnu ah MP Salai Myo Thaih hi a pahnihnak a si. Ramkulh chung in MP a tuan lio mi, 2020 ah a cuhmi le teinak a hmumi chung in Ralkap nih a ngeihmi an chuhmi a pakhatnak a si tiah theih a si.

Kalaymyo ah Sanguk Zung A Kang. Nihin December 27 zing ah Kalaymyo Taungzalat sang ah Semiang zung hmai ah ummi Sanguk zung cu meithal ngan le hme thawng theih duh hnu ah a kang i, a ciam tiah theih a si.

Zingka sml. 5 hrawng ah Taungzalat Sanguk zung a kangh i, a ciamh hi a si tiah Chin World nih a tial. Nihin zinglei deihlan 3 tluk zong ah meithal ngan he hme thawng he Tahan hrawnghrang zong ah fak ngai in a thangmi kahdohnak thawng cu khuami nih an theih. Credit: The Chinland Post

𝗞𝗵𝗿𝗶𝗳𝗮 𝗮 𝗸𝗮𝗻 𝗿𝗮𝗹; Karenni (Kayah) ramkulh Hpruso ah ralzaam nu le ngakchia tel in minung 35 cu Kawl ralkap nih an nun bu mei khangh in an thah hna. December le Christmas caan theng ah hi bantuk thil rapthlak an tuahmi hi ai tong sualmi a si kho lo.

Nizan tih ni ah Kawlram Roman Catholic lutlai bik Charles Bo cu Min Aung Hlaing nih a va ton – a va nawnnok. Cu lio ah Karen ramri Lay Kay Kaw cu vanlawng in fak taktak in an kah. Zahan ah Karenni ramkulh Hpruso ah atu bantuk an tuah than hi a si. Hmundang zong ah kan theih rih lomi a um kho.

Sagaing le Chinram kah nakding ah Kawl ralkap nih Operation min a pekmi zong kha “Operation Anawratha” a si. Sagaing chaklei le Chinram ummi pawl khi biaknak dang an si caah khi operation min an thimmi a si, tiah CDMer Major pa nih a rak chimmi ka tial bal cang.

Tutan dothlennak ah fak khun deuh in ral a domi hi Chin, Kachin, Karen le Karenni (Kayah) kan si. Kawlram ahcun a miphun le ramkulh hoih in hi pali lawng hi Khrifa kan si. Cucaah Christmas caan theng ah hi thil fihnung an tuahmi hi an tuahsualmi le ai tong sualmi a si lo. Timh ciammam tein an tuahmi a si.

Muslim ralrang pawl nih Khrifa sunhsak mi nicaan paoh an i seel he khin ai khat ko. Kawlram tuanbia zong ah systematic in Khrifami target kan sinak evidence tampi a um ko caah lungawtawm ding a um lo. Tutan hrim zong biakinn khangh, Pathian riantuan serhsat a tam lengluang cang.

Hmangthlak – Hpruso ralzaam pawl an khanghnak. Thinlung thawng deuh mi nih hmanthlak tling deuh in zoh nan duh ahcun hika hi kal khawh a si. By June Nilian Sang

SAC Ralhrang Vanlawng Kahnak ruang ah PDF Ralkap 3 Nunnak Liam. Nihin December 25 ah a cangmi Kayin ramkulh, Lay Kay Kaw kahdohnak ah SAC ralhrang nih Fighter vanlawng in an kah hna caah PDF ralkap 3 an nunnak a liam. A nunnak a liammi hna cu Ko Maing, Ko Ye Htet le Ko Cung Du an si.

Natchaung khua ah ralhraang nih khuami minung pahra nak tlawm lo an thah hna. Sagaing ramthen, Kalay peng, Natchaung khua cu Council ralhraang nih december 23 ah raltuknak vanlawng in an kah hnu in khua chung ah ralhraang pawl an lut i inn an khangh, thilri an hrawh dih pin ah khuami minung pahra nak tlawm lo an thah hna tiah tualchung mi chimnak in kan theih.

Ralhraang pawl nih an kahthah mi hna khuami ruak cu Kalay PDF nih an laak hna. Ralhraang pawl he kaphnih kahdohnak a chuah ca ah a thi mi hna le a thi mi zat kan hngal kho rih lo tiah LDF-Kalay nih an thanh. Natchaung khua cu inn 2000 leng an si. Atu cu an khua ning in an zaam dih i ralhraang pawl khua pawngkam ah an i chawklet tiah tualchung mi pakhat nih a chim.

Hpruso khua ah ralhraang nih tlaih mi khuami minung 30 nak tlawm lo mei in an khangh hna. Kayah ramkulh, Hpruso peng chung, Moso khua pawng kahdohnak a chuah hnu ah khuami minung 30 hrawng ralhraang nih an tlaih hna i mei in an khangh hna tiah KNDF nawlngeitu pakhat nih a chim.

“Khuami minung 30 hrawng cu motor cung ah an khangh hna. Mei khangh mi hna hi kan thleidang kho ti hna lo. Tlaih a tong mi chungkhar nih an theih khawh lawng ah si kho hnga. Kannih i kan fahter khawh mi cu motor cung ah an khangh hna ti lawng hi a si” tiah KNDF nawlngeitu pakhat nih Kantarawaddy Times ah a chim.

Khangh a tong mi hna hi motor pathum le Hpruso khuami kum tling rih lo hngakchia telh in minung 30 nak tlawm lo an si. Tlaih mi khuami hna thlah ding in a va chimchawntu ramri hngak BGF ralkap 4 zong an hnulei kuttem buin an thah hna. Credit: The Hakha Post