Ralhrang pawl nih kan mipi dirhkamtu Palai (CDF, PDF tbk) hna doh ding in an i thawh tik ah!

Ralhrang pawl nih kan mipi dirhkamtu Palai (CDF, PDF tbk) hna doh ding in an i thawh tik ah!
===========
A tu kan dothlennak ah kan tei hnga maw tiah lunghring pah mi cheukhat nih an chim ttheumi bia pakhat cu “ralhrang pawl cu kum 70 leng chung fek tein le ttha tein dirh cangmi a si; Cun hriangnaam zong a ttha ttha in an ngeih caah dirh caan a thla lawng si rihmi mipi dirkamhtu palai (CDF, PDF tbk) pawl nih zeitin dah an tei khawh lai? ” ti hi asi.

Asinain, keimah ka hmuh ning ahcun ralhrang pawl hi kum 70 chung fek tein le ttha tein dirh cangmi si seh law Mipi kan nawl ngeinak hi a kan chut lai lo. Uknak an laknak ding suallam zong a um lo. A phung men in an rak dirh caah a tu bantuk in uico pa Min Aung Hlaing nih a duh paoh a hman khawh hna nak hi a si tiah ka hmuh.

A tu cu ralhrang pawl cu training an kai lio biakamnak an tuahmi le an bia tiam pawl kha zul ti loin thaw ngei lo thilri bantuk in cung lei nih an duh poh in an mer khawh cang hna. Minung lungput an ngei ti lo. Cu caah minung an hmuhmi poh an ral ah an rel dih cang hna i hram hram in sualnak ngei lo mipi cu an thah thluahmah hna. Mino poh cu an mah dohtu an ral ah an kan rel dih hna i kum upa poh ralhrang cawlcanghnak CDF, PDF tbk hna sin thawng petu ah a kan rel dih.

Zeiruang ah dah Ralhrang pawl hi minung lungput ngei lo pawl, mipi ral ah an kan ruahtu pawl tiah ka chim ti ah cun Mandalay Obo thawnginn ah pohmah 505-A in taza a kan cuaimi chung ah ralhrang a dohtu lawng si loin mihrut hna, kum 60 cung putar piter hna, nu fa pawi liomi hna,biachim thiam lo pum tlamtling lo hna le an mah ralhrang pawl i an fa le lila hna zong an i tel. Cu lio ah nu fapawi liomi nau rawk tiang in an velhmi zong tampi an um.

Cu ruang ah, mipi nih a kan huat cang ti kha an thei i Sakhan in a leng ah an chuah bak in an lamhmi vawlei cu an ral (mipi) pawl kan umnak vawlei asi dih caah khuachung an i chawh poh ah an lu le an hmai hmanh an lanhter ngam ti lo. Khuachung ah uniform hruk buin an kal ngam set ti lo. Cu nih a kan hmuhsakmi cu hriangnam lawng bochan sawh i mipi uk a kan timmi cu caan sau an nguh ti bal lai lo ti hi asi.

Cun a kan tei lonak ding a ruang pakhat cu, ralhrang pawl nih kan mipi dirhkamtu Palai (CDF, PDF tbk) hna doh ding in an i thawh tik ah an i phorh khomi rawl le ti lawng an ngei. Khua chung lut ngam lo lampi zul ngam loin ram tang lawng ah an kal cang. Cu caah caan tlawmpal ah ral dohnak a um lo hmanh ah an ei ding rawl le ti a dih ah cun caan saupi an cawlcangh kho bal lai lo.

Cu ruang ah ah Ralhrang pawl an rawl tam tuk ah cun khua chung an lut i mipi kha meithal in kah hmasa, thawl dih hmasa in rawl fir thil fir in an nun hi asi. Cun tam deuh cu khua leng ah chuak ngam loin an umnak sakhan le khuapi khua chung lawng ah an i thup peng. Cu nih a kan hmusakmi cu Ralhrang pawl an cawlcang deuh deuh kan teinak ding caan a nai deuh deuh ti hi asi. Credit: Salai Dokhar

Sihmansehlaw, raldohnak a chuah ahcun mipi cu a tuar peng ding kan si caah hi hi kan ram dothlennak caah a si tiah a tuar zia tu thiam hram ko usih. Hi ralhrang pawl hi cu kan tei hrim lai ti kha a fian ko caah kan doh lio caan ah nunnak a liammi, chawva asungmi kan tampi lai.

Pathian tu nih in hnem hram hna seh law, nan sunghmi chawva nak in a let tam deuh in thluachuah in pe hram hna seh. Mipi nih kan tei lai ti hi kan zumh ko zong ah a tlamtlinter kho tu cu Pathian a si caah kan saduhthahnak cu pathian nih caan tawite chung ah tlamtlinter hram seh.

Germany’s Federal Election (26 September) September 26, Zarhpi ni ah Germany federal ram pumpi thimnak an tuah cang lai. Germany ram tuanbia ah a pakhatnak nu Chancellor a tuanmi le a pakhatnak amah lungtho tein a rian in aa dinmi Angela Merkel cu kum 16 chung a tuan hnu ah aa din ruangmang cang lai.

Amah hi Chemistry in PhD a lami a si. Ram a hruai ning kong ah siseh, amah pumpak kong ah dawtnak in “Mutti” tiah an kawhmi nu a si. Mutti ti cu Mommy tinak kha a si. Amah party Christian Democrats (CDU) in a hun changtu ding cu Armin Laschet a si lai. Zei party nih dah teinak an hmuh lai ti cu chimchung awk a tha lo nain Germany ram hi Party ngan pahnih fonh in acozah ser hi an tuanbia chung ah a um lengmang. Cucaah Grand Coalition timi biafang hi a lar ngaingai.

Party ngan pakhat a si vemi Social Democratic (SPD) lei in Olaf Scholz nih a hruai ve lai. A pathumnak party ngan a si ve mi le the Greens lei in mino te asi mi a hliphlau a tha bakmi Annalena Baerboc nih a hruai lai. Debate zong an tuah pah lengmang. A hnu bik hi thaizan ah an tuah lai ti a si.

Thimnak hi thenhnih ah an then. Thutdan a cheu hi Myanmar ram thim ning Fast Past The Post ning in an thim hna. A cheu hi PR in an thim hna caah Germany Federal thimmak cu Mixed PR tiah kawh auh a si. Party hme tee zong hi an um pah len.

Germany ram hi State (16) a um i atu chanthar an khualipi cu Berlin a si. Nitlak le Nichuah an i fonh hlan ah nitlak lei khuapi cu Bonn a rak si. Atu tiang hi Acozah zung hi hmunhnih in a um rih. A cheu cu Berlin ah an um i a cheu cu Bonn khua ah an um rih.

German miphun hi 91.5% bak an si. Turkey (Turkish) miphun hi 2.4% an um ve. Adangdang miphun hi 6.1% an um ve. Atlang piin miphun dang cu an tlom ngai ti khawh a si. Khrihfa biaknak hi 68% an si i Catholic le Protestant hi 34% veve an si. An i tluk bak. Muslim hi 3.7% an si. An tlom ngai rih.

Adang biaknak le zei biaknak hmanh ah aa peh lomi hi 28.3% an si. Acheu nih cun Khrihfa hi 80% an si lai a ti tu zong an um. A zor lei a si lai tiah a chimtu zong an um ve. Muslim tu hi cu an karh lei a si lai tiah an zumh cio.
Germany ram ahcun Pastor le Reverend zong nih President tuan khawh a si. A luan ciami zong ah Pastor nih German Federal President a rak tuan bal cang. Credit: Thawng Za Pum