Ralhrang Pawl Cu Palek Sakhaan Chungah An Zaam Dih Manh!
Ralhrang Pawl Cu Palek Sakhaan Chungah An Zaam Dih Manh!
============
Motor Ke A Puakmi Thawng Cu Bomb Puah Thawngah An Ruah Caah SAC Ralhrang Pawl Cu Palek Sakhan Chungah An Tli/An Zaam!
Yangon khuapi Sue Taw palek sakhan hmaiah meithal tlai in gate hngaktu SAC ralhrang ralkap hna cu palek sakhan pawngah motor ke a puakmi thawng cu bomb puah thawngah an ruah sual caah palek sakhan chungah an tli tiah hmutu nih an chim.
Nihin January 24 zanlei sang sml 4:00 hrawngah Ma Yan Kung peng chungah Sue Taw palek sakhan pawngah motor ke pakhat cu a puah caah a thawng hi a thang ngaingai tiah theih a si. Motor ke puakin a thawng a than lioah Sue Taw palek sakhan hmaiah meithal tlai in gate hngaktu SAC ralhrang ralkap hna cu an lau tuk nakah palek sakhan chungah an tli/an zaam tiah an chim.
“Motor ke a puakmi cu bomb puah thawngah an ruah sual caah an tlaihmi meithal hmanh hmai khap loin sakhan chungah an tli/an zaam” tiah hmutu nih a chim. SAC ralhrang ralkap hna cu daiziar tein lamzawhnak a tuahtu mipi hna cu “ahodah thih a ngam” tiin mipi cu an rak hrocer bal.
Tuluk Nih Thaiwan Ramri Pawngah Raltuknak Vanlawng (40) Tluk A Zuan Ter! Tuluk cozah nih Thaiwan kyun pawngah January 23 zaan caan ah raltuknak vanlawng (39) bak a zuan ter hna caah tukum thar chungah a tam bik a si lai tiah theih a si.
J-16 raltuknak vanlawng (24) le J-10 raltuknak vanlawng (10) pinah bawmnak petu vanlawng le electronic vanlawng hna zong an i tel tiah Thaiwan runvennak ministry lei nih an chim. Thaiwan vanlei boruak ralkap hna zong nih a raltuknak vanlawng hna cu direct in a thlah colh ve i, vanlei boruak runvennak hmangin Tuluk vanlawng hna cu ngiathlainak a tuah tiah Thaiwan runvennak ministry zung nih an chim.
A liamcia kum thawk khan Thaiwan kyun pawngah Tuluk vanlawng hna cu nifatin ti awkin an zuan ter hna. A liamcia Oct thla zongah khan nikhat chung lawngah Tuluk raltuknak vanlawng (56) bak an rak luh tikah a fak bikmi le a lianngan taktakmi thihphaihnak a si tiah Thaiwan leikap nih an chim.
Tuluk ram nih kum 2021 hnulei in cun Thaiwan ramri pawngah raltuk ningcang cawnnak tibantuk a tuah lengmang caah vawleipi zong nih an zoh/an ngiathlai ve. Tuluk ram nih Thaiwan ram cu anmah ramchung pakhat ah a chiah nain Thaiwan rammi hna nih cun vawleipi theih in zalonnak a thanh ah siseh a thanh lo zongah siseh Thaiwan cu amah tein a ummi ram pakhat a si tiah ruahnak an ngei ve. Credit: The Federal Times