Kachin ramkulh, Mansi peng, Sihkamgyi khua pawng kahdohnak ruangah hmunhimnak kawl in a zaammi ralhrial mipi 15 hna cu SAC ralhrang nih an tlaih hna tiah ralhrial hna bawmhchantu pakhat nih an chim.
February 16, 2024| ah thok in Sihkamgyi khua pawng SAC ralhrang sakhan cu KIA phufonh nih an kah hna i February 19, ah tlamtling tein an laak khawh tiah theih a si.
Kahdohnak ruangah Sihkamgyi khua in Bhamo khuapi lei i a zaammi tualchung mipi 15 hna cu February 18, Bhamo khuapi luhnak check-gate an phak ah SAC ralhrang nih an rak tlaih hna tiah kan theih.
February 25, tiangin SAC ralhrang nih tlaihkhih mi ralhrial 15 hna he pehtlaihnak zeihmanh kan ngei kho lo tiah ralhrial hna bawmhchantu pakhat nih an chim. Crd:LMP
Thawngpang dang: SAC ralkap nih an uk ṭhan cang mi Sagaing ramṭhen, Kawlin khuapi cu a ningpi ti tluk in a kaang i a ciam dih, tiah a hmun thilcang a thei i a hmutu cheukhat nih an chim.
Kawlin khuapi cu SAC ralkap nih an khangh i a ningpi ti tluk in a ciam dih, tiah Kawlin Revolution – KR zong nih an thanh i, NUG zong nih cu kong cu nihin February 24 ah an thanh ve.
SAC ralkap nih Kawlin khuapi cu a luancia February 12 ni thawk in a ningpi in an uk ṭhan i khuachung inndot sang cung ah umhmun an khuar hna, tiah Kawlin Revolution – KR nih an chim.
Kawlin khuapi khua chingchang khua tam ngai zong mei khanghpiak an tong i khua chuahtak in ral a zaam mi khua 25 hrawng an si, tiah Kawlin Revolution – KR nih cun an chim.
Kawlin khuapi tualchung mi hna telh in khua kiangkap khua 25 in tualchung mi a sang in ral an zaam hna. Khuapi zatuak 80 tluk cu a ciam i a rawk dih, tiah Kawlin Revolution – KR nih nizan February 13 ah an thanh.
Kawlin khuapi dirhmun kong he pehtlai in SAC nih February 22 ni an thanh mi ah cun, “Kawlin khuapi chung ah a tla mi bomb thianhfelnak kan tuah i khuapi sakremh ṭhan ding rian kan ṭuan i kan kalpi cuahmah lio ah tualchung hriamtlai phu nih hriamngan hmang in kahdohnak an tuah caah inn a kangh i a ciamh dihnak a si,” tiah an langhter ve.