Ralhrang nih Chin ram an rat hnawh ning cu lungre a thei ko!

Ralhrang nih Chin ram an rat hnawh ning cu lungre a thei ko!
================
Ralhrang nih Chin ram an rat hnawh ning cu lungre a thei ko. Ralhrang leiin an zoh dih hnu, an tuak dih hnu le timh ciammam taktak in an rat hnawhmi a si tihi a fiang tuk. Atu an ratning in tling le tluang in an kal hnawhmi Mindat, Hakha le Thantlang an phak i kan Chin ralkap Thianh dih hna ding in (Clearance Operation) timhtuahnak an ngeihmi hi kan tuar ngai te lai.

Ralhrang zer le sual cu kan theih cio bantukin kan ralkap pawl hna cil ding lawng si loin kan kut kan ke vialte thlongh dih ding in timhnak an ngei lai. Hmailei ah kan doh ngam ti hna lo ding le kan ralchanh ngam ti naak hnga lo ding in tutan ah hin rial chih le cillamh cikcek a kan timh. Kan doh hna hlan kha ngai than ding in tuah a kan timh.

Kan ralkap hna zong Bawipa bochan le a tha bik in timhnak an ngei lai tiah ka zumh. Kan ram le kan hmun cia a si caah timhnak tha deuh kan ngei. Hihi kan hman thiam ahcun kan thazaang ngaingai a si lai. Mipi le khuami hna caah lungre a thei khun. Ralhrang he hmuhton lo hi kan caah cun himnak cem a si ko. Khua chung zong kan himnak a tlawm i ramtang chinchin cun kan him lai lo.

Mipi kha kan ralkap pawl umnak information petu ah an hman hna lai, thilphurtu ah an hman hna lai, runvennak phaw ah an hman hna lai, zultu ah an hman lai. Cuccah kan mipi hna dirhmun a chiat bik lio caan a si. Khatlei ah tutan kan unau Mara pa kong le an cathanh chuah pawl nih kan ralkap hna moral a hnursual pah men lai tiah ka ruat.

Kan pumpak le miphun thihnunnak ral doh lioah pakhat le pakhat karlak ah thencheunak lungput bia hna a vun chuah thluahmah cu a poi tuk. Asinain kan taksa, nunnak le miphun tiang in a ka hrawk khotu kan ralhrang hi kan ral ngan bik a si.

Kan Chin ram ah atu a phan thluahmah ralhrang hi cu an tam tuk lo. Asinain Hakha le Thantlang um chun ralhrang tlawmpal hmanh nih terrorize a kan tuah khawh ahcun atu cun an thawng chinchin lai. Khuate tiang a kan tuah than lai tiah ruah khawh a si. Kan ralkap hmun tiang an kah khawhmi dirhmun ah kan phan. Raltukbak vanlawng in backup a tuah hna ahcun kan ralkap zong an tuar lai.

Biahalnak kan ngeihmi cu, zeiruangah dah Kalay in Hakha leiah an kainak ah an kah hna hnga lo tiah ka ruat.Ralhrang kahnak hmun ahcun a rem cem a si. Kan lungretheihnak cu a zualter ngaingai. Kan khua kan ram kan miphun kan ralkap hna kan Biak Pathian nih in huppheng hna seh law a thawnnak in in kilkamh ko hna seh! CNA biachimtu Pu Htet Ni biachim ka thil chih. Ka uar tuk.

Ruahhang A Kang, Ral Zong An Hun Kai Cang! Kawl ralkap pawl hi khuacaan zoh in ral an tu ve. Ruah hang a hun dih cun raltuk ai thawk tawn. Kan hngalh bantukin ral pawl cu Chin, Sagaing le Magwe hmunhma (anmah auhning cun North Western Command) cu tuk ding ah a van i thawh cang.

North Western Command ah raltuknak haotu hna hi mipuarhrang ralbawi Than Hlaing le Tayza Kyaw hna an si. Than Hlaing timi pa hi mipuar taktak a si. Cu ca ah Chin ram raltuknak hi a fak khun lai tiah chim cia khawh a si.
Tutan raltuknak hi Khuapau Dothlennak ca ah a nunnak tluk in a biapi lai. Hi raltuknak phichuak hi Dothlennak ca ah a phiachuak zatuak chungah hmunhma tampi a la lai.

Ralhrang pawl cu hi hlei lo lamdang an ngeih tilo ruangah an kan timh a si i kan nih CNF/A, CDF, CNDF le PDF Zoland ca ah cun Civil War teinak ca ah a fak bik raltuknak a hung silai. Chin, Magwe le Sagaing a dih hin KIA, MNDAA le TNLA hi a fuh te hna lai. Northern Command he i fonh in a ṭhuat te hna lai tiah ruah a si. A fiang mi cu October, November le December ahhin Civil War a fak bik telai. Kan dirhmun zong tam ngaite ai fiang telai.

Ral timi cu a hung thawh taktak ahcun kir ṭhan khawh a si tilo. A dih tiang i kah lawlaw a hau. Chin ram ah Cunglei le tanglei in an kan ṭhuat taktak canglai. Pasal kan biartung let in heh maw tiah i ṭhuat caankan phan ne lai. Timhtuahnak caan (preperation peroids) vialte an dih cang. Meithal zang hmeh lawng a tang ko cang.

Miphun kan lungrual caan a phan. CNF nih biatak tein chunzaan in a kan hruai caan a phan cang. Remdaihnak caan chungah timhtuahnak zeitlukdah a ngeih timi a phi kha hi thlathum chungah ai hngal lai. Zeidang bochan ding kan ngei lo. “Bawipa kan dirpi ko, Bawipa kan umpi ko” tilawng khi a si ko. Credit: Luther Tin Hre, Salai Ṭial Hram Ling