Ralhrang Minung 15 An Kah Thah Hna, Ralhrang 10 Leng Nih Liamhma An Tuar Rih!

Chindwin Tivapi In A kalmi Nawlngeihnak Latu SAC Ralhrang Ralkap Hna Cu Kah An Ton Caah (15) Tluk An Thi!
============
Sagaing ramthen chung Kani khuapi pawngkam Chindwin tivapi in a kalmi nawlngeihnak latu SAC ralhrang ralkap hna cu mipi ralkap fonhmi phu nih an rak kah hna caah ralhrang (15) tluk an thi tiah KLG PDF (Kani) nih cathanh an chuah hi a si.

January 27 zinglei sml 10:00 hrawngah nawlngeihnak latu SAC ralhrang ralkap hna i tilawng cu Hmyaing khua le Chian Ta Suh khua karlak ah KLG PDF Kani le anmah lei mipi vengtu ralkap hna i fonhin an kahmi a si. Kahdohnak ahcun mipi ralkap leikap ah a thimi le hliammi an um hna lo tiah theih a si.

Kyaikhtu Ah Ni Hnih Chung Kahdohnak A Fak, SAC Ralhrang Ralkap (10) Leng Nih Hliam An Tuar! Kyaikhtu peng chung Ka Daing Duat khua pawngah nawlngeihnak latu SAC ralhrang ralkap le KNLA fonhmi phu karlak ah ni hnih chung kahdohnak a fahtuk caah SAC ralhrang ralkap leikap ah (10) lengkai nih hiam an tuar tiah mipi ralkap lei nih an chim.

January 26 zanlei sml 5:00 hrawngah SAC ralhrang ralkap le KNLA Brigate 1, Battalion 3 le mipi ralkap fonhmi karlak ah kaphnih kahdohnak a fak ngaingai tiah theih a si. January 25 zanlei sml 2:00-4:00 tiang, sml 2:00 chung kahdohnak a chuak i, SAC ralhrang ralkap leikap ah (10) lengkai nih hliam an tuar. Kannih leikap ah hliam tuarmi kan um lo tiah mipi ralkap pakhat nih Than Lwin Times ah a chim.

SAC ralhrang ralkap nih thazaang tam taktakin KNLA Brigate 1, Battalion 3 nih a control nak hmunhma chungah luh an i timh caah kahdohnak a chuahnak a si tiah theih a si. Kahdohnak ruangah pawngkam khua chung mipi hna cu himnak hmunah an zaam tiah theih a si.

SAC Ralhrang Nih Luhhnawh In Khua An Hrawh, Mei An Khangh Hnuah Khuami Pahnih Cu Ningcang Loin An Thahnak Shewbu Peng Yua Suu Yua! Sagiang ramthen Shewbu peng Yua Suu Yua cu nawlngeihnak latu SAC ralhrang ralkap nih January 24 ah khan khua cu a ningpi ti awkin mei an khanghpiak dih pinah ကိုမောင်မောင်ညို၊ ကို ငနွား pahnih cu tlaih hratin an thah tiah khuami nih Yangon Khik Thit ah an chim.

Cu khua pawngah January 24 ah khan nawlngeihnak latu SAC ralhrang ralkap le mipi vengtu ralkap karlak ah kahdohnak a chuah hnuin SAC ralhrang nih khua chungah hriamngan in an kah hnuah khua chungah lut hratin minung umnak inn vialte cu mei in an khanghpiak dih tiah thawng theih a si.

Khua chungin nawlngeihnak latu SAC ralhrang ralkap rual cu an chuak cang caah khuami cheukhat cu khua chungah an phan cang i, khua cu a ningpi ti awkin mei in an khangh. Khuami pahnih an thahmi hna ruak cu kawl cuahmah lio an si. Cupinah midang tlaih a tongmi zong an um len tiah khuami pakhat nih a chim. Atu caan karlak ah Yua Suu khua in a zaammi mipi dihlak cu khua chungah an rak phan kho rih hna lo caah a thimi zat hi fiang tein chim khawh a si rih lo tiah khuami nih an chim.

Mandalay Khuapi Ah Hruhru Hranghrang In A Cawlcanghtu Buesawtyi Phu Cu Bomb Puah Hnawh An Tong! Mandalay khuapi chungah thil fir, thil chuh hmangin ritsi zuar/hmangin a cawlcanghtu Buesawtyi phu cu bomb in kan puah hnawh hna tiah Mandalay Pyauh Kyar phu nih cathanh an chuah hi a si.

January 25 zaan caan ah Amarah Purah peng chung Nat Yi Kan khua pawngah a ummi Buesawtyi phu hna cu thil fir, thil chuh an hman caah Mandalay Pyauh Kyar phu YNO Mandalay PDF, Rangers of Mandalay, Mandalay Ranger Force- MRF hna i fonhin bomb in an puah hnawh hna tiah thawng theih a si.

Mandalay ah mipi thilri motorcycle an fir, pawngkam minung zong nam tong hmangin an saam/tuk, thilri chuh an hmang, sualnak phunkip tuahtu nawlngeihnak latu SAC ralhrang nih a cawmmi misual phu Nat Yi Kan sangah a ummi hna cu YNO Mandalay PDF, Rangers of Mandalay, Mandalay Rangers Force nih i fonhin bomb in an puah hnawh hna caah misual phu hruaitu telh in tampi an ril tiah Mandalay Ranger Force (ROM) nih an chim.

Mandalay khuapi ah SAC ralhrang ralkap he anmah kuttang ummi hna telh in an inn tibantuk hna cu timh ciam tein kahdoh an tong hna. January 26 zinglei zongah khan Chian Myiah Tase Khuapi Thar sang (5) nakah a ummi ralhrang kuttang ummi nuva hna cu meithal kah an ton caah pakhat a thih pinah a dang pakhat nih fak ngaiin hliam a tuar. Credit: The Federal Times