Pauk Peng Ah Sentari Cawngmi Pyusawhti Pawl An Kah Hna Caah 3 An Thi
=========
Magway ramṭhen, Pauk peng, Thitchokone khua pawng ah rallam sial in sentari cawngtu pyusawhti pawl cu June 28, zanlei suimilam 4:00 tluk ah an kahdoh hna i, 3 an thi, tiah Pah-kah-phah in ṭuanvo ngeitu pakhat nih a chim.
“Pauk peng thlanglei Thitchokone khua pyusawhti pawl sentari an cawngh lio ah kan kah hna caah kap 2 kar kahdohnak a chuak i, ralhrang lei 3 an thi. Zanlei suimilam 4:00 hrawng ah a si i, anmah lei thimi ruak 1 cu neih te in kan hmuh khawh” tiah Khit Thit ah a chim. Kahdohnak cu Pauk Revolution Front PRF, Myaing Pah-kah-phah, Pakokku pengkomh 12 Battalion YRA le Crows Pah-kah-phah hna fonh in kan si, tiah theihternak an tuah.
Sagaing-Shwebo Lampi Kahdohnak Ah PDF 14 An Nunnak Liam. 2023, June 28, nihin zing ah Sagaing ramṭhen, Sagaing-Shwebo lampi cung ah mipi ralkap PDF hna le SAC ralhrang kar ah kahdohnak a chuak i, PDF ralkap 14 an nunnak a liam, tiah theih a si. Ram le miphun caah nunnak a petu hna cu Sagaing pengkomh Battalion 3 in minung 9 an si i, a dang 5 hna cu mizei hriamtlai phu ti fianter khawh an si rih lo, tiah Tachileik News Agency nih a ṭial.
“SAC ralhrang nih rallam an sial caah kham dingin kal kan i timh lio ah kahdohnak a chuah hi a si. SAC ralhrang lei in sentari cawngtu pawl he kan i kahdoh hi a si” tiah Sagaing pengkomh PDF Battalion 3 in ṭuanvo ngeitu pakhat nih a chim.
Atu tiang ah nunnak a petu pasalṭha hna ruak an la kho rih hna lo. SAC ralhrang nih Ta-laing-kyun khua an luhhnawh pinah Sint-gaing khua zong mei in an khangh piak hna, tiah theih a si. A luancia June 25 zong ah Sagaing peng, Kintaw khua pawng um PDF sakhan pakhat cu SAC ralhrang nih an luhhnawh caah PDF ralkap 17 an nunnak a liam i, hriamthil pawl zong an laak piak chih hna, tiah theih chih a si.
Pale Peng Ah SAC Ralhrang Nih Bomb A Thlak; Phungki 1 Telh In Mipi 10 An Nunnak A Liam. Sagaing ramṭhen, Pale peng, Nyaung-kone khua cu June 27, zanlei sang ah SAC ralhrang nih cunglei in bomb a thlak caah phungki 1 telh in mipi 10 an nunnak a liam, tiah theih a si.
Nyaung-kone khua cu a ruang umlo in SAC ralhrang nih jet vanlawng pakhat in voi 2 tiang bomb 5 a thlak caah phungki pakhat telh in pa 7 le nu 3 an nunnak a liam hi a si, tiah Pale Joker PDF sin in theih a si.
“Zeiruang ah atu bantuk in bomb a rak thlak timi kan thei lo. Kahdohnak zong a um lo, mah inn le lo umko mi mipi hna cu tinhchih tein bomb a rak thlakhnawh hna” tiah Pale Joker PDF in ṭuanvo ngeitu pakhat nih Tachileik News ah a chim. SAC ralhrang nih atu bantuk in bomb a thlakmi ruang ah mipi inn 13 le phungki sianginn 1 zong a rawk chih, tiah theih a si.
Chin-Magway Ramri Kahdohnak Ah SAC Ralhrang 10 Nak Tlawm Lo An Thi. Chin ramkulh le Magway ramri kahdohnak ah SAC ralhrang 10 nak tlawm lo an thi tiah CDF-Mindat nih an fehter. Magway ramthen Kyuakhtu khua in Htilin khua lei ah SAC ralhrang riahcaw chan dingin a kal mi motor hna cu CDF-Mindat le tangti phu hna nih June 26 ni ah an kah hna i ralhrang lei Jet Fighter 2 nih voi 7 a vun bawmh hna.
Mah ni kahdohnak ah CDF-Mindat ralkap pakhat cu hliam fak lo a tuar. “June 27 kahdohnak tu ah cun SAC ralhrang lei a thi mi le hliamtuar mi kan hngal kho rih hna lo” tiah CDF-Mindat Commander pakhat nih a chim.
2023 June thla chung Mindat pengchung ah kahdohnak pehzulh in a chuak i June 27 zinglei zongah Mindat khua SAC ralhrang khah-la-yah (ခလရ) 274 umhmun khuar mi zong tualchung mipi ralkap nih an kah hna tiah khuachung mi hna nih an chim. Credit: Lungmili Post