Ralhrang kuttang lila nih Thongtla an zampi mi hna cu lung a hmui tuk ee!

Palik Pathum Nih Thongtla 11 An Zaampi Hna!
========
Sagaing ramṭhen Khamti pengah October ni 18 ah Myoma palik sakhan ah rianṭuanmi palik pathum nih ramkhel lei thongtla minung 11 an zaampi hna tiah palik chungkhar hna nih an chim tiah theih a si. Myoma palik sakhan thonginn (အချူပ်ခန်း) no. 1 ah a um mi ramkhel lei thongtla minung 11 hna cu palik 3 nih security hngaktu palik meithal zuun khat a chuh hnu ah an zaampi hna tiah palik he naihniam in a um mi pakhat nih a chim.

A zaam mi hna chung in minung 5 tu cu an tlaih ṭhan khawh hna, a dang a zaam mi hna zong tlaih ding in pengkip palik sakhan sinah an hmanthlak an kuat hna i khua luhchuahnak gate in check dingah thawng thanhnak an tuah hna tiah palik he naihniam mi hna nih cun an chim tiah theih a si.

KNU Brigade 6 Hmunram Kahdohnak Ah SAC Ralkap 4 An Thi. Kayin ramkulh, Myawaddy thlanglei KNU brigade 6 hmunram chung ah hmunhma rilonh in a lutmi SAC ralkap le Kobra column phufonh karah October 22, zinglei 9 30 hrawngah kaphnih kar kahdoh a chuak tiah theih a si.

Hmunhma rilonhnak a tuahtu SAC ralkap hna nih cun zinglei in zaanlei tiang hriamngan hmang in kahdohnak an tuah caah KNLA battalion 27, Cobra column, brigade ṭatkhuai 2 nih lehrulhnak tuah in kahdohnak an tuah ve. Kaphnih kar i kahdohnak ah SAC ralkap chungtel 4 an thi, Cobra column phufonh lei hliamhma tuarnak umlo in hnu kan tolhkho tiah Cobra Volumn nih an thanh tiah theih a si.

Shweko Lei Kalmi SAC Ralkap Tilawng Hna Nih Hriamngan An Thlah Caah Ngakchia Pakhat A Nunnak Liam. Kachin ramkulh Shweko ah October 23 zinglei ah a kalmi SAC ralkap hna caah riahcaw phur tilawng a vengtu SAC ralkap tilawng hna nih hriamngan tamtuk an thlah tuk caah ngakchia pakhat a nunnak liam, pakhat hliamhma a tuar tiah Kata pah-kah-phah nih cathanh an chuah tiah theih a si.

SAC ralkap hna nih an thlahmi hriamngan ruangah kum 12 tluk ngakchia, tang li cawnglio mi Ma Hnin Ei Lwin cu a taang le a khup ah hriamngan kuan nih a hliamh caah a nunnak a liam. Cun hriamngan kuan hliamhnak in nu pakhat zong hliamhma a tuar leng ah Caw leng le inn cheukhat zong hriamngan kuan nih a khen caah an rawk tiah theih a si.

Tiva kam um mipi hna nih SAC ralkap tilawng he an tum kai caan ah khuachung lei hoih in hriam an thlah tawn caah mah himnak ding caah i ralrin cio ding in tualchung hriamtlai lei nih ralrin peknak an thanh tiah theih a si.

MaOoPin Ah Nau Pawilio Nu Telh In Rohingya 54 Le Tilawng Lei Rianṭuantu 4 Tlaih An Tong. Ayeyarwaddy ramṭhen, MaOoPin peng Aukhtung(အောက်ထုံး) khua pawng tiva ah October 22 zinglei ah Rohingya 54 tlaih an tong tiah tualchung mi nih an chim tiah theih a si. Rohingya a phirtu tilawng cu SAC ralkap nih kham in checkhlatnak an tuah hna hnu ah an tlaih hna hi a si tiah theih a si.

Tlaihkhih a tongmi hna hi Rohingya pa 37, nau pawilio telhin nu 13 le ngakchia 4 an si. Cun tilawng khaltu le rianṭuantu 4 tiin an dihlak minung 58 tlaih an tong. Tlaih a tongmi Rohingya hna cu MaOoPin peng Shwetaunghmaw (ရွှေတောင်မှော်) palik sakhan ah hren in checkhlatnak an tuah hna tiah theih a si.

SAC Ralkap Kuttang Um Khah-lah-yiah 1 In Ralkap Pakhat Nih CDM A Tuah. SAC ralkap kuttang um khah-lah-yiah 1 in ralkap pakhat nih CDM cawlcanghnak a tuah tiah Pekhon peng tualchung hriamtlai phu battalion 2 nih October 23 ah cathanh an chuah tiah theih a si.

CDM cawlcanghnak a tuahtu ralkap cu Pekhon peng tualchung hriamtlai phu, battalion 2 nih bawmhchanhnak an pek tiah theih a si. “Nizaan in a rak zaam, hriamthil cu a putlo, a mah himnak ding in a rak zaam mi a si, tualchung hriamtlai phu lei nih bia halnak le checkhlatnak zong an tuah” tiah theih a si.

A luancia October 17 lio ah tatmah 66 kuttang um khah-lah-yiah 14 in SAC ralkap minung 2 zong Pekhon peng tualchung hriamtlai phu battalion 2 sin ah CDM cawlcanghnak an rak tuah bal cang. SAC ralkap kuttang riantuan duhlo mi hna nih hriamthil he CDM cawlcanghnak nan tuah a si ah cun sing 50 kan in pek hna lai tiah Pekhon PDF nih an thanhmi ah an langhter chih tiah theih a si.

Myaing Peng Linkadaw Khua Khanghpiak An Ton Caah Khuami 3000 Renglo An Zaam. Magway ramṭhen, Myaing peng Linkadaw khua cu SAC ralkap nih October 22 ah an lut i khua mi inn le lo an khanghpiak hna caah tualchung mi 3000 leng mah umnak kaltak in ralhrial dirhmun an phan tiah tualchung mi nih an chim tiah theih a si.

Pathein-Monywa motor lampi kam ah ummi Linkadaw khua cu SAC ralkap nih October 22 ah khan an lut i October 23 zinglei ah khuachung mei kangh kan hmuh hi a si tiah Linkadaw khuami nih an chim.

Linkadaw khua cu inn 1000 hrawng an umnak khua pakhat a si i, inn zeizat an khangh ti bel fiang tein theih a si rihlo, khuami 3000 leng an zaam tiah a chimchap. UNOCHA nih October 1 ah cathanh an rak chuahning ah Magway ramṭhen chung buaibainak ruang ah tualchung mi 101,300 nih mah umnak hmun kaltak in ralhrial dirhmun an phan tiah an langhter. Credit: The Chin Post