Ralhrang Helicopter kah piak a ton caah ralhrang lei minung an thi!

Shiataw Ah Riahcaw Chantu Helicopter Kah A Ton Caah SAC Ralkap 3 An Thi!
=========
Karenni ramkulh, Shiataw ah umhmun khuarmi Khah Lah Yah 428 Battalion SAC ralkap hna riahcaw chanh ding in a kalmi SAC ralkap Helicopter cu, October 19 ah KA le KNDF B17 hna nih naih tein kan kah caah SAC ralkap 3 an thi, 6 hliamhma an pu, tiah KNDF nih cathanh an chuah.

Cu kahdohnak ah SAC ralkap nih hriamngan an kah caah kum 15 tluk ngakchia pakhat le kum 50 tluk pa pakhat tiin minung pahnih hiamhma an pu tiah theih a si. SAC ralkap Brigadier nih Shiataw khuabawipa cu a auh i, hi hnu kahdohnak a chuah ahcun nan khua ning in kan khangh dih lai, tiin a tlerh tiah theih a si.

Kyaikhto(ကျိုက်ထို) Kahdohnak Ah SAC Ralkap 2 An Thi. Mon ramkulh, Kyaikhto peng Pinekone(ပိန္နဲကုန်း) khua pawng ah rallam a sialmi SAC ralkap le PDF karah, October 19 zinglei ah kahdohnak a chuak i, SAC ralkap 2 an thi, tiah Kyaikhto Revolution and Information Network nih an langhter.

SAC ralkap a thimi ruak 2 cu an vui colh hna. Cu hnuah khua chungah an lut i, inn an khangh caah inn 8 le cycle 3 nak tlawm lo a ciam dih. Cu hnu ah khuami thilri zong an hrawhpiak dih hna hleiah khuami 2 an tlau, tiah theih a si.

Natogyi(နွားထိုးကြီး)-Taungthar Lam Um SAC Ralkap Check Gate Cu PDF Nih Drone In Bomb An Thlak Caah Ralkap 3 An Thi. Natogyi-Taungthar lam ah umhmun khuar mi SAC ralkap check gate cu PDF nih drone in bomb an thlak caah ralkap 3 an thi tiah theih a si.

Mandalay ramṭhen, Natogyi-Taungthar motor lam um SAC ralkap check gate nih, khualtlawng mi hna cu hranhram in an check hna caah October 19 zanlei sml 3:00 ah drone in bomb kan thlakhnawh hna i SAC ralkap 3 an thi, tiah PDF nih cathanh an chuah.

Natogyi-Taungthar motor lam um Shwe Gyia In(ရွှေကြာအင်) khua phungki sianginn ah SAC ralkap cu umhmun an khuar i, khualtlawng mi cu checkhkatnak an tuah hna caah SAC ralkap check gate le sentari an cawnghnak inn cu PDF nih drone in bomb an thlak hi a si tiah theih a si.

Kawkareik Khua Suimilam 8 Chung Kahdohnak Ah SAC Ralkap 10 An Thi, SAC Ralkap Nih Vanlei Kahdohnak Voi 50 Leng An Tuah! Kayin ramkulh, Kawkareik ah October 21, zinglei suimilam 8:00 hrawng in khuachung kahdohnak a chuak i SAC ralkap lei a tlawmbik minung 10 an thi tiah, kahdohnak ah aa telmi tualchung hriamtlai phu hna nih an chim tiah theih a si.

Kawkareik-Myawaddy lamṭhing cung ah ummi pengkulh palik zung le GAD zung cu Bo A Sae Wa hruaimi Lion Battalion Commando Special Force, Bo Kyaw Htat hruaimi KNLA battalion 27 le Kyaphyu phu, Nagaphyu, Eagle Brigades, Black Panther, Federal Wings Drone phu, Dawna phu telh in tualchung hriamtlai phufonh nih an kahdoh hna.

SAC ralkap kahmi hriamngan ruangah tualchung mipi umnak inn le phungki sianginn pakhat telh in inn 10 hrawng an rawk, tualchung mi 2 an nunnak a liam i minung 10 nak tlawmlo nih hliamhma an tuar tiah tualchung mi nih an chim. “Pa pakhat le nu pakhat an thi, Kawkareik sizung ah minung 20 leng an lut, ngakchia 6 hrawng an i tel” tiah Kawkareik khuami pakhat nih a chim tiah theih a si.

Zinglei suimilam 10:15 hrawng ah SAC ralkap nih Yak-130 raltuknak vanlawng 2 hmang in kahdoh hram an thawk. Kaphnih kar kahdohnak a fah caah SAC ralkap nih raltuknak vanlawng pinah helicopter zong nih kah a bawmh hna caah vanlei kahdohnak voi 54 tiang a tuah tiah theih a si.

Monywa Ah Pyusawhṭi Phu Bomb Puahhnawh An Tong, 5 An Thi! Sagaing ramṭhen, Monywa peng Tawpuh(တောပု) khua in kee in a chuakmi hriamtlai pyusawhṭi phu hna cu October 20, chunhnu suimilam 3:00 hrawng ah bomb puahhnawh an ton caah minung 5 an thi tiah theih a si.

Minung thazaang 25 hrawng simi pyusawhṭi phu hna cu Monywa peng Tawpuh(တောပု) khua ni tlaklei Buhba(ဘုဘ) khua le Ngaungphyupin (ညောင်ဖြူပင်) khua kar ah bomb lung li puahhnawh in kan kahdoh hna tiah Farmers Revolution Force -3 Monywa pengkomh battalion-10 in ṭuanvo ngeitu pakhat nih a chim.

Tawpuh(တောပု) khua cu Monywa peng khuakomh ah a ummi a si i, 2014 cazin ning ah chungkhar 600 leng le milu 3000 tluk an umnak khua a si, cun SAC ralkap kuttang um pyusawhṭi an tamnak khua pakhat zong a si.

Gangaw Pengchung Kahdohnak Ah SAC Ralkap 9 An Thi. Magway ramṭhen, Gangaw in a chuakmi SAC ralkap hna cu Mingantawyiah(မင်းကန်တောရ) sianginn pawng ah tualchung hriamtlai phu nih an kahdoh hna caah kaphnih kar kahdohnak a chuak i SAC ralkap 9 an thi tiah theih a si.

Kaphnih kar i kahdohnak cu October 17 ah a cangmi a si i, SAC ralkap hna cu nitlak lei hrambunh battalion 701/ PDF-Gangaw battalion, battalion 702, battalion 704, battalion 705, battalion 706, HYPER UAV FORCE, CAN, Gangaw pengkomh battalion 1 le tualchung hriantlai phufonh hna nih an kahdoh hna tiah theih a si.

Kaphnih kar i kahdohnak ah SAC ralkap lei in minung 9 an thi, tualchung hriamtlai phu lei hliamhma tuarmi cheukhat an um tiah nitlak lei hrambunh battalion 701/ PDF-Gangaw battalion nih October 21 ah cathanh an chuah tiah theih a si.

Yinmapin Peng Shwehlan Khua SAC Ralkap Nih An Luhhnawh, PDF 9 An Nunnak Liam! Sagaing ramṭhen Yinmapin peng nitlak lei Shwehlan khua ah aa dor mi Monywa pengkomh battalion 13 in ralkap 11 cu October 21, zinglei suimilam 5:00 hrawng ah SAC ralkap nih an luhhnawh hna tiah theih a si. Tualchung hriamtlai phu hna luhhnawh an ton caah minung 9 cu meikhangh in thah an tong i, minung 2 cu SAC ralkap nih an kalpi hna tiah Monywa pengkomh battalion 13 chungtel pakhat nih a chim.

“Yinpaungtaing kahdohnak in zaan suimilam 1:00 hrawng ah kan kir I Shwehlan khua ah kan it, khuachung security lei tuanvo ngeitu an um maw tiah kan hal hna hnu ah, hnangam tein I dinh khawh a si tiah an kan ti. Hi thil a can hi security hngaktu minung an i thlen caan ah a cang mi a si.

Kan ralkap hna cu Monywa pengkomh battalion 13 in ralkap an si, an umnak hmun ah mei khangh in thah an tong, cun nu ralkap Mi Ngay le ralkap Kp Ye cu an kalpi hna” tiah Monywa pengkomh battalion 13 in rakap Bawbaw nih Mizzima ah a chim.

Yinmabin PDF A Tlaumi Pahnih Cu An Ruak In An Hmuh Hna! Yinmabin peng Zehpyukone (ဇီးဖြူကုန်း) khua hnulei hmun pakhat ah October ni 21 zing suimilam 7 hrawngah tualchung hriamtlaiphu chungin hruaitu pakhat le ralkap pakhat cu an ruak in hmuh an si tiah theih a si.

Yinpaungtaing khua in Puhtoethar khualei ah a kal mi SAC ralkap pawl cu October ni 20 ah bomb an puah hnawh hna, cu lio ah tualchung hriamtlaiphu in ralkap pakhat le hruaitu pakhat pehtlaih khawh loin a tlau tiah theih a si. SAC ralkap bomb puah hnawh an si hnu in chawnh khawh an so ti lo.

Zeitin an um i zeitin an kal zong kan theih khawh ti hna lo caah kan dihlak in kawl ah kan i thawh i atu bantukin Chi dum pakhat ah an ruak in an hmuh hna hi si. Thah a tongmi PDF ralkap hna cu an kutke le an lu zong an tan dih hna tiah theih a si.

Thah a tongmi hna hi Daungmin LPDF in hruaitu Bo Saka le ralkap pakhat an si tiah kan theih. Yinmabin peng Yinpaungtaing khua umhmun khuarmi SAC ralkap pawl cu bomb puah hnawh an ton caah SAC ralkap 9 an thi tiah theih a si. Sagaing ramṭhen Yinmabin penuchung um cazin an lak ningin chungkhar 29000 leng an si i milu 140000 hrawng an um tiah theih a si.

Kawkareik Kahdohnak Ah Tualchungmi 3 An Nunnak Liam, 17 Hliam An Tuar. Kayin ramkulh, Kawkareik ah October 21, zinglei suimilam 8:00 hrawng in SAC ralkap le KNU kuttang um KNLA, PDF phufonh kar fakngai in kahdohnak a chuak i tualchung mi 3 an nunnak a liam tiah theih a si.

Kaphih kar i kahdohnak ah hliamhma tuarmi hi pa 13 le nu 7 tiin minung 20 nih hliamhma an tuar, hliamhma tuarmi hna chung in minung 3 an nunnak a liam tiah tualchung mi bawmchantu phu in ṭuanvo ngeitu pakhat nih a chim.

SAC ralkap lei nih cun October 21 zaanlei ah thawng thanhnak an tuah i kawkareik khua kahdohnak cu KKO in a chuakmi phu le PDF kar an si, tualchung mi hna nih hliamhma an tuar tiah an thanh tiah theih a si. A tulio Kawkareik khuachung ah KNLA, PDF phufonh nih khah-lah-yiah 97 cu an kulh dih cang hna. Atu hi chikhat kahdohnak a daihlio a si tiah KNLA he naihniam in a ummi pakhat nih a chim.

Phekhon Peng In Non-CDM Cozah rianṭuan 35 Nih CDM An Tuah. Shan ramkulh thlanglei Phekhon peng chungah SAC kuttang cozah rianṭuantu minung 35 nih CDM an tuah tiah Phekhon peng Pah Ah Pha nih cathanh an chuah tiah theih a si. SAC kuttang rianṭuantu hna cu aluancia June thla ni 30 ah Phekhon, Mobae PDF le KNDF hna nih ralrin peknak cathanh an rak chuah hnu ah a tubantuk in CDM an tuah hi a si tiah an cathanh ah cun an langhter.

Hranhram in uknak lak a si hnu in Phekhon pengchung ah SAC kuttang rian chuahtak in CDM a tuahmi hi 1200 leng an si cang tiah theih a si. Credit: The Chin Post