Ralhraang nih Thantlang ah Biakinn tel in inn 19 an khangh than caah!

Ralhraang nih Thantlang ah Biakinn tel in inn 19 an khangh than caah!
=========
Nihin, December 4, Chun hnu sml 12:30 tluk in Thantlang ah UPC Biakinn tel in inn 19 ralhraang nih an khanghchap tiah TPAC cazin thanh mi in kan theih.

A kaang mi inn lak ah hin United Pentecostal Church (UPC) Biakinn le quater zong ai tel chih. Biakinn sang ah inn hnih a kaang i Market sang ah UPC Biakinn le quarter tel in inn 17 a kaang tiah an langhter.

Thantlang khua cu raal hraang nih atu tan he cun voi 10 an duah cang i biakinn panga tel in inn 500 deng a ciam cang. A tang lei cazin hi Thantlang Placement Affairs Committee -IDPs help nih nihin kanghuhnak a tongmi hna cazin a langhter mi a si.

Updated 8:00pm- UPC biakinn telh in inn 19 an ciam tiah Thantlang Placement Affairs Committee nih thawngpang an chuah. Thantlang Market Sang ah Inn an Kaang, UPC Biakinn a Kangh Chih. Nihin December 4 zinglei sml. 9:00 hrawng ah Thantlang Market sang ah inn an kaang tthan i atu ca kan ttial lio caan zong ah a kaang cuahmah.

Thantlang khua upa pakhat nih, “Inn zeizah a kangh timi fehter khawh a si rih lo. UPC biakinn zong a kaang. Atu hi a kaang cuahmah rih ko,” tiah The Chin Journal ah a chim. Nihin ah an inn a kaang vemi Mizoram phan nungak Dicky nih, “Nihin zinglei ah khan nan inn a kaang ve tiah thawng a kan thanh. Kan inn cu UPC biakinn he aa tlarmi a si.

Hi kong ah vun chim ka duhmi cu Pathian nih kan herh tuk lio caan ah inn a kan pekmi a si ko caah hmailei kan herh caan ah a kan pek tthan te ko lai,” tiah a chim. September 9 thawk in nihin December 4 tiang ah SAC ralhrang nih an kahmi bomb le hramhram in inn an duah ruang ah Thantlang khuachung inn 450 hrawng an kaang cang.

Ralhrang nih Thantlang UPC biakinn le quarter telh in inn 19 an khangh than, 492 an khangh cang. Nihin December 4, 12:30 PM tluk ah Ralhrang nih avoi 10nak Thantlang khua UPC biakinn telh in inn 19 an khangh than i September 9 in December 4 tiang ah inn 492 an khangh cang.

Avoi 1nak September 9 ah inn 1, Avoi 2nak September 18 ah inn 19, Avoi 3nak October 29 ah inn 164, Avoi 4nak November 6 ah inn 8, Avoi 5nak November 9 ah inn 2, Avoi 6nak November 10 ah inn 7, Avoi 7nak November 11 ah inn 3, Avoi 8nak November 24 ah inn 49, Avoi 9nak November 27 ah inn 96, Avoi 10nak December 4 ah inn 19 tiin inn 492 an khangh cang, tiah The Hakha Times nih cazin (record) kan tuah.