Ralhraang nih an tlaih i motor mawngtu an thah, a motor le a chung thilri an laak!

Apoi Tuk E, Kalay In Falam Lei A Rak Kai Mi Thil Phor Motor Ralhraang Nih An Tlaih I A Mawngtu An Thah!
=========
Kalay in Falam lei a kal mi thil phor motor Council ralhraang nih an tlaih i a mawngtu an thah. Sagaing Ramthen, Kalay in Chin Ramkulh Falam lei ah a kal mi thil phor motor ngan pakhat cu lampi ah Council ralhraang nih an tlaih i motor mawngtu an thah, a motor le a chung thilri an laak tiah theih a si.

Hi kong he pehtlai in Falam Peng mizapi ralkap CNDF chungtel Salai Cung Ngai nih, “Kalay in Falam lei ah a kal mi thil phor motor ngan pakhat cu lampi ah an tlaih. Motor a mawngtu pa an thah i lampi ah a ruak an khangh. A motor le a phorh mi thilri an laak dih,” tiah a Facebook cahmai ah a langhter.

Motor cung ah aa cit mi chung in a mawngtu pa hi an thah i, a dang a hnuzultu motor cung a cuang mi pawl bel atu tiang an konglam theih a si rih lo tiah theih a si.

Pakukku GTI sianginn pawng umhmun khuar council ralhraang pawl 60MM hriamngan in an kah hna, ralhraang 5 an thi. Magwe ramthen, Pakukku GTI sianginn pawng ah umhmun a khuar mi ralhraang hna cu april 15, zaanlei suimilaam 2:30 ah 60MM hriamngan in PDF nih an kah hn i ralhraang 5 an thi tiah Earthquake People’s Defence Force- UG Phu sin in kan theih.

Cu Council ralhraang hna cu PDF phu komh hna nih an kah mi hna a si i hliam hma fak tuar ralhraang cheukhat an um nain zeizat ti cu an fehter kho rih lo tiah kan theih. Atu zaan Pakokku khuachung ah kaphnih kahdohnak thawng pehtlai in a thang. No.8 sang khuami inn cung ah meithal kuan an tla tiah tualchung mi nih an chim.

Laykaykaw ah hmainawr in kahdohnak a tuah mi Council ralhraang an zaam than, an zaam taak mi hriamnam le thilri an laak. Karen ramkulh, Myawaddy peng, Laykaykaw ah KNLA le PDF phu komh hmainawr in kahdohnak a tuah i hnukir in a zaam than mi Council ralhraang pawl hriamnam le thilri cu nihin ah kan laak than tiah Cobra phu nih an thanh.

Cobra phu nih runven mi Laykaykaw hmunhma tlangbo hna cu council ralhraang nih chuh ding in hmai an rak nawr i, zahan zaan suimilaam 11:00 in zinglei suimilaam 3:30 tiang kahdohnak fak a chuak. Cobra nih hmunhma thianhnak an tuah i hriamnam le thilri an lak mi cu an rak tarlangh cang i nihin zaanlei ah hriamnam dang an lak than tiah kan theih.

An lak than mi hriamnam hna cu 60MM bomb thei 18, 81MM 1, RPG 4, zen bawm 3, 5.56 kuan 300, 7.63 sniper zenthong 100, ke lamh bomb 1, MA 1 zenthong bawm 9 kan lak than tiah Crobra phu nih an thanh.

April zarh hnihnak chung ah Karen ramkulh peng hmun li ah kahdohnak a fak tiah KNDF nih an thanh. Karen ramkulh Peng hmun 4 chung ah, April zarh hnihnak ah Council ralhraang le KNDF kar kahdohnak a fak tiah KNDF nih an thanh.

Loikaw, Demoso, Hparuso le Bawlakhe peng ah Council ralhraang hna nih hmai an nawr ca ah kahdohnak a chuah hi a si tiah KNDF nih thanh mi in kan theih. Hmainawr in kahdohnak an tuah chung ah Council ralhraang hna nih khuami hna thah, Inn pawl khangh, khua chung ah hriam ngan kah le bomb tarhnak hna an tuah tiah KNDF nih an chim.

Kahdohnak chung ah Council ralhraang 48 an thi i KNDF tangti phukomh in 10 an thi. Council ralhraang hna nih raltuknak ah an hman mi motor pakhat le vawlei cawhnak theng pakhat zong kan hrawhpiak hna tiah KNDF nih an thanh.