Salai Samuel Le Salai Kyaw Uk Lian @ Salai Kyaw Oo Nih Ram le Miphun caah Nunnak An Pek, Na miphun Nih Upatnak Sang Bik Kan In Pek!
========
Timit Operation ah Surkhua unau Hakha khuasa Salai Samuel Zothanpuia nih ram le miphun caah a nunnak a pek tiah thawng kan theih than ee. Nunnak pek tiang in ram le miphun dawtu Salai Samuel Zothanpuia upatnak sangbik kan in pek .. Kan ram caah na thisen thlet mi na tuanbia a dai lai lo.
Nihin Timit Operation ah Surkhua kan unau Kyaw Uk Lian @ Salai Kyaw Oo nih ram le miphun caah a nunnak a pek than ee. Nunnak pek tiang in ram le miphun dawtu Salai Kyaw Uk Lian le a hawi le vialte upatnak sangbik kan in pek hna.. Nan ram caah nan thisen thlet mi nan tuanbia a dai lai lo. Cu Timit Operation ah ram le miphun caah a nunnak a pek hna upatnak sangbik kan in pek hna. Crd; Global Surkhua Page
SAC Le Myanmar Ram Chaklei Hriamtlai Ṭangṭi Phu 3 Hna Cu Mongla Ah Tonnak An Ngei Lai; Myanmar ram chaklei hriamtlai ṭangṭi phu 3; Arakan Army(AA), Ta’ang National Lebiration Army(TNLA) le Myanmar National Democratic Alliance Army(MNDAA) hna cu SAC he June 1 ah Shan ramkulh nichuahlei Mongla khuapi ah tonnak an ngei lai, tiah theih a si.
“Tuluk tlangtlaknak in tlangcung hriamtlai ṭangṭi phu AA, TNLA le MNDAA cu SAC he tonnak kan ngei lai i tonnak kan ngeih dih in kan ceihhmai mi cu kan thanh te lai,” tiah TNLA in hruaitu pakhat nih a chim.
Cu tonnak ah cun SAC lei in Deputy General Yar Pyi nih a hruaimi National Unity and Peace Making Coordination Committee aiawhtu hna an kai lai. Cu pinah Tuluk ram in foreign affairs Ambassador Kaw Paung zong cu tonnak ah cun Tuluk ram aiawh in a kai lai, tiah BBC nih a ṭial. Tlangcung hriamtlai ṭangṭi phu in aiawhtu hna cu Mongla khuapi an phan cang, tiah Mongla News nih a langhter.
Karenni Ramkulh Kum 2 Chung Kahdohnak Ah SAC Ralkap Meithal Zun 600 Leng Kan Laak —KNDF Chairman; Karenni ramkulh in kum hnih chung ah kahdohnak voi 1,000 leng a chuak i, SAC ralkap hriamngan le hriamhme zun 600 leng kan laak, tiah KNDF kum hnih tlin camtuak ah KNDF Chairman Khun Bi Htoo nih a chim.
“Kum hnih chung ah kahdohnak voi 1,000 leng a chuak i SAC ralkap hriamngan le hriamhme zun 600 leng kan chuh hna. Sakhan 10 laak kahdohnak zong ah kan i tel. Hriamnam serchuahnak le raltuk thiamnak lei zong ah kan ṭhangcho ngaingai cang,” tiah Khun Bi Htoo nih cun a chim.
Karenni Army hruainak hi upat ding le KNDF telh in Karenni ramkulh chung ah a ummi hriamtlai phu vialte lungkhat tein um ding le SAC ralkap nih hriamtlai phu hna karah ṭhencheunak thil an tuahmi vialte ah ralrin ding le doh ding in KNDF Chairman nih cun forhfialnak bia a chim. “Karenni cozah cu Karenni ramkulh ca lawng si loin ram pumpi ca tiang in a ṭhawngmi mizapi cozah uknak le nawlngeihnak a ngeimi a si cang lai,” tiah a chim chap.
Karen Le Mon Ramkulh In PDF Pathum Kan Sinah An Lut Tiah SAC Nih An Thanh; Mon ramkulh, Ye peng Sinphyusin hall ah a ummi PDF ralkap pahnih cu hriamnam le zen-kuan he kan sinah an rak lut, tiah SAC nih an thanh.
Hriamnam le zen-kuan he kan sin i an rak luh caah lawmman phaisa kan pek hna i, PDF sin um ti lo ding in minsen an thut hnu ah an nu le an pa sinah kan kuat hna, tiah an langhter. Cu bantuk ṭhiam in Karen ramkulh, Myawaddy peng, Gyiaphyu Column in PDF ralkap pakhat cu SAC sinah a lut, tiah SAC lei nih an thanh.
SAC nih zarhkhat chung ah PDF ralkap 40 an thi i, 10 tlaih an tong, tiah May 29 ah an thanh. Cu pinah hriamngan zun 12, kuan phuntling 2,025, bomb lung 45, hridawh bomb lung 138, ralkap he aa pehtlaimi thilri 87, cycle 22 le motor 2 kan laak, tiah SAC lei nih cun an langhter. Crdt;The Chin Post