R.I.P; Pasaltha Ralhrang Phu Nih An Hremnak Ah A Thi Mi Ko Yan Paing!

Naypyidaw ah ralhrang nih tlaih in an hremnak ah a thi mi Ko Yan Paing ruak vui a si cang!
============
Ralhrang nih tlaih in faktuk in an hrem caah hliam fak tuk a tuar i siizung ah tlop a si mi sianghleirun siangngakchia Ko Ya Paing cu October 2 zing Suimilam 8 :30 ah vui a si cang. Ko Yan Paing cu October 1 zingah Naypyidaw ihkhun 1000 siizung ah ralhrang nih fak tuk in an hrem ruang ah a hliamhma tuar khawh lo in a nunnak a liam.

Ko Yan Paing cu May 2 chung suimilam 1:00 ah Pinemana peng chung ah ralhrang nih an tlaih i faktuk in an tuk an hrem.An hremnak ruangah lungfim lo in a um.A ke le a kut cu am tuk nak ah a kiak chunglei he leng lei he hliam hma in a khat caah siizung ah a um i a hliam hma a tuar khawh lo caah a nunnak a liam.

Nizaan October 1 ah Chinland Defence Force, Kalay-Kabaw-Gangaw lei ah ralkap 3 nih CDM an tuah.Anmah 3 hna lakah ralkap 1 nih hriamnam tling he CDM tuah in kan sinah an rak lut. Hriamnam tling he kan sinah a rak lutmi cu laksawng peknak zong kan tuah cang pinah anmah 3 hna zong himnak hmun, zalonnak hmun ah kan thlah cang hna.

Nawlngeihnak latu Min Aung Hlaing cu kaltak in mipi dawtnak tangnem tangah dor a duhmi ralkap hna cu kan rak in don hna i, himnak hmunah kan in chiah hna lai. Hriamnam tling he a rak lutmi cu laksawng peknak zong kan tuah tiah
Chinland Defence Force, Kalay-Kabaw-Gangaw nih cathanh an chuah.

Yangon Airports Ah Ralhrang Hmanmi Vanlawng An Tum An Kai An Zuang. Vanlawng tumkai a tlawmnak Yangon Airports ah nihin October 2 zinglei ah ralhrang hman mi vanlawng hna an tumkai a tam tiah Yangon mipi nih an chim. Ralhrang hmanmi vanlawng 4 cu tuzing ah an zuang. Vanlawng 3 hmunkhat ah an zuanng cun Mayan Kone peng, Bayinnawng zung pawng, helchum chungah khuami cheukhat nih a zuan lio kan hmuh tiah khuami nih an chim.

Ralhrang nih Kachin ramkulh, Chin ramkulh, Magwe ramthen, Sagaing ramthen hna ah kahdohnak a fah caah cunglei lam in ralhrang thazaang chap in va bawmh, vakah nak hna an tuah tiah mizapi vengtu ralkap hna sinin theih asi. Cu lawng si lo in China le Russia ram i a um mi raltuk nak hriamnam hna cu vanlawng in a rak pek tiah raltuk nak lei in thawngpang thanh tu sin in theih a si.

Dawei Lam Cung Ah Palek Mawtaw Bomb Puah. Dawei chawlehthalnak ah a biapi biknak hmun Thikhui he i pehtlaihnak lam cung October 1 zaanlei ah palek nih an rak i cit mi mawtaw pakhat cu bomb in an puah. Yenat palek riahbuk in riahbuk bawi le a kuttang hna nih an rak i cit mi mawtaw cu Ye Phyo peng, Nabuh Lee hmunhma i Puh Kaw Yon le Wat Chuang khua lamtonnak cung ah zaanlei 4 hrawng ah bomb puah an tong tiah khuami hna nih an chim.

Thawngdang:Magwe ramthen, Saw – Kyouk Thu lam ah ralhrang phu mawtaw cu mizapi ralkap nih bomb in an puah hna i ralhrang lei in Blhmu Phone Myint Kyaw telin minung 4 an thi tiah Yaw – PDF nih an thanh.

YDF(Saw & Kyaukthu) phu le CAF – MGPDF phu hna nih bomb in an puah hna caah ralhrang lei in minung 4 an thi.Ralhrang nih internet line an phih hnu Saw- Kyaukthu lam lei ah an i kah caah mizapi hna nih Saw- Kyaukthu tlun kal lo ding in theihternak Saw PDF nih an thanh.