SAC Ralkap Vanlawng Bomb Thlaknak In Chin Ralkap 6 Nunnak Liam!
============
Chin ramkulh, Hakha peng Timit kuang hrawn ah SAC ralkap vanlawng nih bomb a thlak caah Chin ralkap a tlawm bik 5-6 kar an nunnak a liam, tiah theih a si. Nihin May 29 ah SAC ralkap le Chin ralkap hna cu Timit dong lei kap ah an i kap i, SAC ralkap vanlawng nih bomb voi tam ngai a thlak. Chin ralkap a tlawm bik 5-6 kar an nunnak a liam pinah a tlawm bik 10 hliamhma an pu, tiah min langhter a duh lomi pakhat nih a chim.
Chin News Agency nih a langhter ning ah cun CDF Hakha in ralkap 6 an nunnak liam i, CDF Zophei le CNA in ralkap 10 hliam an tuar. (Thawng fiang theih khawh dih a si rih lo caah fiang deuh in update ṭhan kan i zuam lai)
Thailand Ah Myanmar Mi 17 Tlaih An Si Ṭhan! Thailand ram, Kanchanburi pengkomh lampi i tlimi motor pakhat chung ah Thailand nawlngeitu hna nih Myanmar mi 17 an tlaih hna, tiah theih a si.
SUV civil motor pakhat cu chekhlatnak tuah duh loin rang tuk in a tlik caah Thailand palik nih 10 km hrawng an dawi hnu ah an va tlaih. Motor thlalang vialte cu lenglei hmuh khawh lo ding in an phih dih i, motor chung ah a ummi Myanmar mi 17 hna cu an ruksai he May 27 ah Thailand palik nih an tlaih hna, tiah theih a si.
Motor khaltu Thailand pa nih Myanmar mi hna cu Thai Baht 3,000 a laak hna i, Kanchanburi pengkomh ah kalpi ding in a thlah hna, tiah theih a si. Myanmar mi pakhat cu Thailand palik nih bia an hal tikah, “Thailand ram ah kum 20 rian ka ṭuan cang i, Myanmar ram ah ka fapa ka thlah hnu ah rian ṭuan ṭhan ding in Thailand ram ka rak luh ṭhan hi a si,” tiah a leh hna.
Myanmar mi hna cu Bago, Mawlamyaing le Rakhine in a lutmi an si i, Thailand luhnak man cu a cheu an liam cang i, Thailand phak hnu ah a cheu pek ṭhan ding a si. Thailand ramchung ah hin phungning loin a lutmi Myanmar mi hi May thla chung lawng ah 370 tluk an si cang.
Kawkareik Peng Phungki Sianginn Ah SAC Ralkap Nih Bomb An Thlak; Karen ramkulh, Kawkareik peng chaklei um phungki sianginn cu SAC ralkap Jet Fighter nih bomb a thlak, tiah Justice Soldier PDF in ṭuanvo ngeitu pakhat nih a chim. May 28 zanlei ah SAC ralkap Jet Fighter nih Kawkareik peng chaklei um phungki sianginn cu pound 500 a simi bomb lung 2 in a thlak, tiah theih a si.
“SAC ralkap nih bomb an thlaknak phungki sianginn hi kan rak laak cangmi a si ko nain cuka hmun ah cun umhmun kan khuar lo i, phungi zong an um lo. Phungki sianginn cu May 28 ah SAC ralkap Jet Fighter nih pound 500 a ritmi bomb lung 2 in a thlak caah phungki sianginn cu a rawk dih,” tiah Justice Soldier PDF in ṭuanvo ngeitu nih cun a chim.
Hmunkhat Ah Ral Dohṭi Ding In KIA Le TNLA Cu Hnatlaknak An Ngei; Hmunkhat ah hramhram uknak a dongh tiang dohṭi ding in Kachin Independence Army(KIA) le Ta’ang National Liberation Army(TNLA) cu hnatlaknak an ngei. KIA Le TNLA cu May thla zarh hnihnak ah khan Kachin ram chung ah kaphnih in tonnak an ngei i, ceihmainak an ngeih hnu ah ral dohṭi ding i hnatlaknak an ngeih kong cu an thanh.
Kachin ram le Shan ramkulh ramri ah a cawlcang mi tlangcung hriamtlai hna kar i kahdohnak a chuah hnu ah KIA le TNLA cu atu bantuk in tonnak an ngei, tiah RFA nih a ṭial. A hlan lio i ṭangṭi phu hriamtlai sinak biahren cu kan tlaihtleng a si zungzal lai i, Kachin ram le Shan ramkulh chung ah a ummi hna himnak papek in rianṭuan ding le rithaisii dohnak zong kan ṭuanṭi lai, tiah kaphnih nih an langhter. SAC doh ding in a dormi PDF pawl cu KIA le TNLA nih an ramchung ah luhnak nawl an pek hna i, raltuk an chimh hna, tiah theih a si. Credite; The Chin Post