Kalaymyo Chaklei Khua Ah Pyusawhti Pawl Cu SAC Nih Nihlawh Kyat 25000 Pek In Ralram An Kal Ter Hna!
============
Kalaymyo peng chaklei um Pyusawhti khuakhat ah minung 10 an auh hna i ralram kalduh lo mi nih an mah aiawh in midang kha nihlawh kyat 25,000 pek in ralram an kal ter hna tiah Kalaymyo mipi ralkap sin in theih a si.
Kalaymyo peng ah SAC nih August 15 in kalay thlanglei, Thasi khua telh in rallam sial in kahdohnak an tuahnak caan a sau pah cang, ralhrang thazang an hun der ruang ah atu banatuk in Kalay chaklei Pyusawhti khua pawl ramtu ding in an auh hna hi a si theu lai tiah mipi ralkap nih cun an chim.
“Kalaymyo nichuak lei um Taungyo le Pintha Pyusawhti khua 2 hna nih SAC he tangti in, kan khua thilri an fir/an kan lakpiak. 2015 kum Kalaymyo tilianh lio ah an khua 2 hi Myitta tiva pawngkam a um mi khua an si. Tilianh dornak ah an khua 2 Khuami vialte nih khua an rak chuak tak dih.
Cheukhat cu Thasi khua ah sau lak te an rak i dor, an minung lawng siloin an zuat saram tiang eidin le ngandamnak tiang Thasi khua nih kan rak zohkhenh hna. Atu cu an kan kah, an kan thah rih, kan inn mei an kan khanghpiak hlei ah kan thilri an duhpaoh in an lak hi kan lungfak ko” tiah Thasi khuami nih a chim.
August 15ni ah Thasi khua cu ralhrang kekal ralkap 200, lamsialtu ah miakpi le Mi-35 in an kah hna. Kalaymyo thlanglei khua pawngkam le Thasi khua kahdohnak ah tualchung mipi 4,000 leng an zaam cang. Thasi khua cu August 21 ni tiang ah inn 200 leng mei an khangh cang tiah theih a si.
Thasi khua kahdohnak ah SAC hriamngan kuan ah Chemical Weapon (ဓာတုလက်နက်) a tel caah mipi 20 leng sii an thlop lio hna tiah mipi ralkap sii lei riantuan tu nih Khit Tit Media ah a rak langhter.
Kani Peng Ni 3 Chung Kahdohnak Ah SAC Lei A Thi Mi An Tam. Sagaing ramṭhen, Kani peng ah a cang mi ni 3 chung kahdohnak ah SAC ralkap a thi mi an tam tiah Monywa Under Guerrilla Force (MUGF) Local PDF nih thawng an thanh. August 18 zaanlei sml 5:00pm hrawng thawk in Kani peng, Nwachankone khuate ah hmunhma a khuar mi SAC ralkap pawl le dothlennak phu pawl karlak ah kahdohnak a chuak i SAC nih thing phorh an duh caah Nwachankone khua ah hmunhma an khuarnak hi a si tiah theih a si.
Kahdohnak hi August 20 zaan sml 10:00pm hrawng ah a dai i SAC ralkap aa hliam mi an tam leng ah kahdohnak chung ah SAC ralkap nih Banbwe pyusawthi khua ah thazang chap ding in an kal lio ah dothlennak phu pawl nih an kah hna hi a si. Kahdohnak chung ah MUGF le a hawikom phu pawl bawm in SAC ralkap an kah hna hi a si i SAC ralkap ruak 1 le thilri cheukhat an lak khawh tiah theih a si.
Kawkareik Peng Kahdohnak Ah SAC Ralkap 6 An Thi. Karen ram, Kawkareik peng ah kahdohnak a chuak i SAC ralkap 6 an thi tiah NUG Ministry of Defense nih a thanh. August 16 zinglei sml 8:00am in 9:00am tiang Kawkareik peng, Yuathitkone le Kyaukpon khua karlak ah SAC ralkap le Kya Phyu Column hna karlak ah kahdohnak a chuah hi a si. Kahdohnak chung ah SAC lei 6 an thi i 3 an i hliam, Kya Phyu Column lei him tein an kir kho tiah an langhter.
Kawkareik Peng Le Kyainseikgyi Peng Kahdohnak Ah SAC Ralkap 10 An Thi. Karen ram, Kawkareik peng le Kyainseikgyi peng ah SAC ralkap le PDF hna karlak ah kahdohnak a chuak i SAC chungtel 10 an thi tiah NUG Ministry of Defense nih a thanh. A luancia August 15 ah Kyainseikgyi peng, Tankhundai khuate ah a um mi palek sakhaan cu PDF pawl nih an kah hna i SAC chungtel 4 an thi tiah a langhter.
Kahdohnak ah PDF, Naga Ni phu le KNLA hna an i bawm tiah theih a si. Cubantuk in August 16 ah Kawkareik peng, Yuathitkone le Kyaukpon khua ah SAC ralkap le PDF pawl an i kap i SAC ralkap lei 6 an thi 3 an i hliam tiah NUG MOD nih a langhter. August 16 zinglei sml 8:00am in 9:00am tiang sml 1 hrawng kahdohnak a chuah hi a si i PDF phufonh lei an him tiah an thanh.
Yange Khua Pura Tlang Ah A Um Mi SAC Ralkap Sakhaan PDF Nih An Kangh. Taninthary ramṭhen, Dawei pengkomh, Thayatchaung peng, Yange khua pura tlang ah hmunhma a khuar mi SAC ralkap nih an kaltak mi sakhaan cu PDF pawl nih an khangh tiah theih a si.
August 20 zaan sml 9:15pm hrawng ah cu pura tlang ah SAC ralkap 60 hrawng nih hmunhma an khuarnak kaltak in Sungsinpya khua meithat zung ah an i ṭhial caah cu an kaltak mi hmunhma cu PDF pawl nih an khangh hi a si. Sakhaan an khangh hnik lio ah 60MM lung 7, le Uniform pawl an lak khawh tiah theih a si.
Yesagyo Peng, Kyaukhleka khua Kahdohnak Ah SAC Ralkap 3 An Thi. Magway ramṭhen, Yesagyo peng, Kyaukhleka khua ah a um mi SAC ralkap gate an kah hna i SAC ralkap 3 an thi tiah Shwe Nyar Myae PDF nih thawng an thanh.
August 18 zaan sml 9:45pm hrawng ah Yesagyo peng, Kyaukhleka khua ah a um mi SAC ralkap gate cu dothlennak phu pawl nih an kah hna hi a si. PDF phu pawl nih gate cu a naih tein an kah hna hi a si i kahdohnak chung ah SAC ralkap 3 an thi tiah an thanh. Kahdohnak ah Shwe Nyar Myae PDF, Yesagyo Revolution Group (YRG), Southern YSO (PDF) le Daung Nyinaung hna an i bawm tiah theih a si. Credit: The Chinland Post