Homalin Peng Khuate 4 In Pyusawhti 120 Tluk Hriamnam Chiah In Mipi Ralkap Sin Ah An I Fonh. Sagaing ramṭhen, Hkamti pengkomh, Homalin peng chung um khuate 4 in Pyusawhti ralhrang thazaang 120 tluk nih hriamnam an chiah, tiah NUG nih a langhter.
2024, April 8 zing suimilam 2:00 tluk ah Homalin peng, Kyunkone khua, Thaungthut, Inngyinmaw, Manawthar khua um Pyusawhti pawl cu ni 9 chung tluk mipi ralkap nih an kham hna i hriamnam chiah dingin an fial hna hnu ah a tubantuk hriamnam chiah in mipi ralkap sin ah an i fonhnak hi a si tiah an langhter.
Hriamnam chiah in mipi ralkap sin a fonh mi Pyusawhti 120 tluk an si, Kyunkone khua kahdohnak ah meithal phuntling 130 telh in hriamnam dang tampi an laak chih tiah theih a si. Lungmili Post
Thawngpang dang: Chin State People’s Police Force Special Training Tlamtling Tein An Tuah Kho Cang. Chin State People’s Police Force Special(CSPPF) nih Chinram chung ah dirh mi palik rianṭuannak ah lutlai a si mi, peng kip palik bawi hna nih hngalh ding palik he aa pehtlai mi phunglam hna le i ukhruainak cawnnak an ngeih mi cu tlamtling tein an tuah khawh kong nizan April 7 ah an thanh.
Chinram chung mizapi palik phu nih palik rianṭuannak le phunglam, peng kip palik bawi hna nih hngalh ding mi rianṭuan ningcang le i ṭhithruainak he aa pehtlai mi cawnnak Special Training cu a luancia March 28 ni ah an rak thawk i, cu Training ah cun peng kip um palik bawi, palik bawi chang le palik zung in ṭuanvo ngei minung 16 an i tel kho.
CSPPF nih an tuah mi Training ah cun pumpak in aa tel kho lo mi palik hna zong Zoom in an i tel kho i, tu thla April 5 ni ah tlamtling tein an tuah khawh. Training dih ni ah cun Chinram chung peng kip palik bawi, Training petu hna le ṭuanvo ngeitu hna an i tel khawh kong CSPPF nih an thanh.
CSPPF nih Chinram peng kip um palik bawi le hmunram zohkhenhtu palik chungtel dihlak nih rianṭuan an thiam nakhnga le hmailei kar an hlannak ca ah hngalh a herh mi Special Training pehzulh in tuah an i timh kong nizan April 7 ah mizapi sin ah an thanh. The Chin Post