Putin Palai pawl nih Nuclear in Lehrulh an Duh Cang!

A Biapimi Khua Ukraine nih an Lak Than; Putin Palai pawl nih Nuclear in Lehrulh an Duh Cang
==========
Russia kut a phanmi nichuahlei Lyman khua cu Saturday ah khan Ukraine nih an lak khawh than cang. Sunghmi i fahsak ruangah Putin a palai pawl nih low-grade nuclear bomb hmang dingin an duhnak an langhter te khawh mi a si. Russia nih Ukraine pengkulh 4 a ram ah a telhnak kong thawng a thanh le cangka a tu bantuk in Ukraine lei nih khua pakhat an lak hi a si.

Tutan khua pakhat an lak thanmi kong cu Ukraine ralkap pawl nih video in an chimmi a si. “Dawtmi Ukraine mipi hna, nihin ah kan ralkap pawl nih Donetsk chungum Lyman khua kan lak than cang. Russia flag cu an thlak i, Ukraine flag an bunh cang,” tiin video in an chim.

Ukraine nih an kulh cang hna caah, Russia nih a ralkap pawl a chuahter hna. Lyman khua hi ralkap, thilri le tirawl chanhnak ah Russia nih a hmanbikmi hmun pakhat a si. A tutan i Ukraine kut a phak than mi hi Ukraine caah hlawhtlinnak nganpi a si.

Russia nih a tam u an ukmi Donetsk le Luhansk an ummnak Donbas ah hlawhtlinnak khulrang tein kalpi kho dingin Zelensky nih a mipi bia a kamh hna. Kan hnung zarh ri khan cun Ukraine flag hi tu le tu a thar in tar a sic ang. Tutan zarh chungah hin a tam chinchin rih lai, tiin Zelensky nih a chim.

Lyman in nichuahlei kalnak lampi a si mi Torske khuate zong Ukraine nih an lak cang, tiah a chim. Putin a palai pakhat a si mi Chechnya pengkulh bawi Ramzan Kadyrov zong ai sum ko ve ti lo. Kei ka ruahnak ah cun, faakdeuh in karhlannak tuah a hau cang in ka thei. Ramri ah Martial Law thanh i, low-grade nuclear bomb zong hman ka duh ko cang, tiin Kadyrov nih a chim.

Nuclear hman kan hau te kho men, tiin khahlan President Dmitry Medvedev le a dang Russia luban pawl khua an ruat cang. Asinain Kadyrov biachim hi biafiangbik a si ko cang. Nuclear a hman bak ah cun lehnak ka tuah colh lai, tiin Washington nih a chim. Lyman ah hin Russia ralkap 5,000 hrawng an um bal, asinain kan kulhmi hna hi cu an tlawmdeuh cang men lai, tiin Ukraine nichuahlei ralkapbu an aiawhbiachimtu Serhii Cherevatyi nih a chim.

Thinlunglei i Sualsanak; Lyman ah tuanvo kan pekmi Colonel-General Alexander Lapin hi a bo thilh i ralhauka ah kuat ding a si. A tu bantuk zatlaknak kong ah army chief General Valery Gerasimov zong ralrin ka pek bal cang, tiin Kadyrov nih a chim. Lapin hi ka zumh ngai ko, tiin Valery nih a ka leh. Cun sunghkhan ding hi a ruahnak nih a phan lo, tiin Kadyrov nih a chim. Lyman kan lak khawh ruangah Luhansk pengkulh tiang kan lut kho colh lai, tiah Ukraine nih an chim.

Lyman hi a biapi ngai, a ruang cu Donbas pengkulh laknak dingah a biapi. Kreminna le Sievierodonetsk lei kalnak ding zongah cantha bantuk a si. Lungthin thawntertu ngaingai a si, tiin Cherevatyi nih a chim. Ukraine an luhhnawh le cangka Donbas hi Russia caah biapi ngai a si. Friday ah khan Donbas pengkulh chungum Luhansk, Donetsk, Kherson le Zaporizhzhia cu Russia hmunhma a si, tiin Putin nih a thanh.

Mah bantuk mi ramdang chuhnak cu Ukraine le Nitlak ram a hawilei nih an cohlang lo i, Russia ralkap pawl Ukraine vawlei in thawl dih dingin le Putin President a si chung cu remdaihnak ceihhmai ti lo dingin Ukraine nih an chim.
A tu zong hmunhma biapi in Russia ralkap pawl an zam cang. Asinain, mi hrokhrol pawl cu tlang an i tlirsek ko rih hna. A tu bantuk i ralawm ngaiin puai tuah phun i nan i lak ah cun nan cei ngai te ko lai, tiin Zelensky fimronhtu Mykhailo Podolyak nih a chim.

Lyman i Russia an sunghmi hi Putin caah cun ramkhel le ralkap thazaang kongah zatlak nganpi a si. Pengkulh 4 ka lak cang, tiin a thanhmi ai palh zia a langhtertu tehte a si, tiin US general hlun Ben Hodges nih a chim. Credit: Chelsea Bawi