Russia Ram Derthawm In A Um Ah Cun Nuclear Hriam Ngan Ka Hman Lai Ti In Putin A Hrocer
=========
Hi kong he pehtlaiin, Russia President Putin nih a ralthuam Russia nuclear batch hmasa bik cu Belarus ah a chiah cangnak kong a chim.
“Kan ram maw a siloah ramri derthawm in a um sual ahcun nuclear ralthuam kan hman lai” ti ah Putin nih a chim.
A tu bantuk in Putin a hrocernak kong ah U.S cozah in Foreign Minister Blinkin nih a chim mi cu Russia nih Ukraine hi nuclear ralthuam hmang in kah a tim lo atu tiang in nuclear ralthuam hman khawhnak a um rih lo ti ah a chim ve.
Belarus hi Russia bawmchan tu ram pakhat a si i, Ukraine ram an kah lio khan Russia ralkap ca ah umnak hmun le thil dang dang a rak bawmh hna. Hi konglam hi St. Petersburg i international economic forum tuah lio ah Russia President Putin nih hrocer pah in a chim mi si.
Sagaing ramṭhen, Wuntho khuapi nichuah lei um Shwe Kaung Htet datsi dawr ah motor he aa cawkmi hna ngunkhuai a khawltu pyusawhti 3 hna cu kahdoh an ton caah an 3 in an thi, tiah theih asi. “June 15, zinglei suimilam 7:00 tluk ah motor he ngunkhuai kawltu hna Wuntho khuapi um pyusawhti an hruaitu simi Kyaw Win Mg,
pyusawhti chungtel Win Ko le min theih lo mi pakhat (An zapi minung 3) hna cu luhhnawh in kan kah hna caah an 3 in an thi” tiah Wuntho Revolution_WR in ṭuanvo ngeitu pakhat nih June 17, nihin ah Khit Thit ah a chim. Pyusawhti ralhrang pawl sin in Meithal zuun 2 le kut in an serchuahmi meithal zuun 1, Pistol 1 le hriamthil chaukhat hna zong kan laak chih. Mipi ralkap lei in hliamhma tuarmi kan um lo, tiah an langhter chih.
Shan-Kaya ramri, Pekon peng, Moebye khuapi kahdohnak ah SAC ralhrang lei in 10 naak tlawm lo an thi. Mipi ralkap in minung 6 nih hliamhma an tuar, tiah Moebye PDF nih June 17 ah cathanh an chuah. Nizan June 16, zinglei suimilam 6:00 tlik in SAC ralhrang le mipi ralkap MBPDF – B O1, MBPDF-BO2, Loikaw PDF, KNDF-BO1< KNDF- BO3, KA, URF fonh karlak ah kahdohnak fak ngai a chuak. Cu kadohnak ah SAC ralhrang 10 leng an thi i, ralhrang nih hriamngan thazaang tam ngai an hman caah mipi ralkap in 6 nih hliamhma an tuar, tiah an langhter. Moebye khuapi ah kahdohnak a fak ngai i, tuhnu zong a fak kho rihmi a si caah mipi hna nih nan umnak khua ah kir rih hlah uh, tiah Moebye PDF nih cathanh an chuahmi ah an langhter. Thlakhat chung ah SAC ralhrang nih Moebye khuapi um mipi hna cu ṭhihphaih in an duhpaoh hriamngan an kahmi ruang ah mipi 30 tluk deng an nunnak a liam, tiah cathanh an chuahmi ah an langhter chih.