Putin cu misual le mitha thleidang lotu kan Pathian nih a humhim!!

President Putin Cu Thah An Timh Nain An Hlawh A Tling Lo!!
=======================
Russia ram President Putin cu aho ti theih lo mi nih thah an timh nain a luat manh tiah Euro Weekly News nih a tial. A sinain zei caan ah dah hi bantuk in thah timhnak hi a chuah timi cu a langhter lo. Ukraine ram a kap cuahmah tu Russia ram President Putin cu a mawtaw cit mi hmailei ke in thil a puak i a khu thluahmah colh.

Asinain cu kaa hmun in cun aa cit mi motor cu ran khawh chungin himnak lei ah an mawngh caah a luat manh tiah, Euro Weekly News nih a langhter. Amah zultu mawtaw pakhatnak cem cu ruah lo piin Mizaw phurtu mawtaw nih a kham colh, cu lio pi ahcun Putin nih ai cit mi mawtaw in thil a puah hi a si.

Cu thilcang mi ruangah Putin cu hliamhma pakhat hmanh a tuar lo nain minung tampi tlaih an tong tiah Euro Weekly Newslnih a langhter chap. news.co.au a dang thangzamh zong nih hi kong hi an tial ve. Hi thil a caan hi Putin cu an thutumnak lei ah a rak kir lio lam ah hi thil a tlun hi a si tiah an langhter.

Hi kong he pehtlaiin zeihmanh biafiang theih a si rih lo. Amah President Putin tu cu him tein a inn ah aum ko ti lawng an feh ter khawh mi a si rih. Nizaan tihni ah Putin Russia ram a cozah bawi cheukhat nih na rian chuah tak cang tiah ca an chuah hnawh.

Asinain cu bantuk in ca a chuahtu cheukhat cu an tlaih hna tiah an langhter.Putin hi a zawtnak ruangah a phunphun in tlerhkhawn a tong mi a si. Cun biachap, Putin hi a thil tuah a that lo tuk caah mi tampi nih musilim a si lai tiah an ruah, A sinaim Putin hi muslim a rak si lo Khirihfa a si i, Orthodox Church khirihfabu a zul mi a si.

Putin a nu hi Khirihfa mi a si, i a pa hi biaknak ngei lo (Atheist) a si tiah an chim. Putin hi upa hnu kum 69 a si hnu in Pathian hi a zum taktak hnga maw timi baihalnak a chuak ngai ngai.

Depayin Peng Letyetkone (လက်ယက်ကုန်း) Khua Sianginn ah Hriamngan Lung 2 A Tla, Kum 11 Ngakchia Pakhat A Nunnak A Liam, Sagaing ramṭhen Depayin peng Letyetkone khua NUG dirhmi sianginn pakhat cu SAC ralkap nih nihin september ni 16 ah vanlawng in hriamngan lunghnih an thlak tiah tualchungmi hna nih an chim.

Hriamngan an thlak lio hi siangngakchia ca an cawn lio a si i cachimtu hna le siangngakchia an tampi caah pazeizat hliam an tuar ti cu fiang in kan thei kho rih lo nain kum 11 hrawng simi ngakchia pakhat tucu hriamngan kuan nih a khen i a nunnak liam tiah tualchungmi hna nih cun an chim.

A nunnak liam mi hngakchia hi cu sianginn chungah um lo in ramlak a kal lio ah SAC nih vanlawng in an thlak mi hriam ngan kuan nih a khen hi a si i a lu cu a man dih tiah an chim chap. A tubantuk in Letyatkone khua vanlawng in an kah hi thawngpetu an um ruangah a si i chun suimilam 1 hrawng in kah hram an thok tiah theih a si.

Ayeyarwaddy ramṭhen Pathein pengah Zuu din sualnak in minung 7 an thi, Ayeyarwaddy ramṭhen Pathein peng sapahta( စပါးထား) khua ah mino 7 cu hmunkhat ah zuu an din nakin an thi tiah tualchungmi hna sin in kan theih. Tualchungmi hna chimnak ahcun, hmunkhat ah zuu an ding hna i an dinnak hrai hi rungrulthahnak sii an rak chiahnak sii an chiahnak a si i thiang tein an ṭawl lo caah an thih hi a si tiah an chim.

A thimi hna ruak cu mibawm chantu phu hna nih Pathein Sii-inn ah an kal pi hna tiah theih a si.
A thimi mino hna hi ramkhel kongkau he pehtlaiin atubantukin an ton siloin anmah ordiriamh nak in an thih hi a si tiah theih a si.

Tualchung Mipi Harnak Petu SAC Ralkap Le Pyusawhti Bomb Puah Hnawh An Tong, Minung 6 An Thi, Mandalay ramṭhen Meiktila peng Ywartanse (ရွာတန်းရှည်) le Sepyar (ဆယ်ပြား) khua ah lut in mipi harnak pe tawntu SAC ralkap le Pyosawhti minung 8 cu cycle 4 in an kal lio ah tualchung hriamtlaiphu hna nih an bawh i bomb an puah hnawh hna caah hmakhat te ah 6 an thi 2 hliamfak an tuar tiah Myaing tualchung hriamtlaiphu hna nih cathanh an chuah.

Cu kahdohnak ahcun tualchung hriamtlai phu lei nih meithal zun 1, kuanbawm 1 le kuan 22 kan lak khawh tiah an thanh chih. “Nihin septber ni 16 chun suimilam 12 hrawngah Meiktila , Ywartanse le Sepyar khua ah lut in tualchung mi a hrem tawn tu SAC ralkap le Pyosawhti 8 hna cu cycle 4 in an ra ti kan theih caah kan bawh hna i bomb kan puah hna hi a si tiah an cathanh ah cun an langhter.

Cu kahdohnak cu Myaing tualchung hriamtlai phu tetyin 1, tetkhuai 1 le Bamathih latnatkyi (ဘာမထီလက်နက်ကြီး) phu hna nih an tuahmi si tiah theih a si.

Taze peng OhPhoAi khuapawng kahdohnak ah SAC ralkap 8 an thi, Sagaing ramṭhen, Taze peng OhPhoAi(အုတ်ဖိုအိုင်) khuapawng ah nihin September 16 ah kahdohnak a chuak i, SAC ralkap 8 hrawng an thi tiah Taze PDF chungtel nih an chim.

Nihin September 16, zinglei suimilam 5:45 ah Taze chaklei meng nga tluk a hlatnak OhPhoAi(အုတ်ဖိုအိုင်) khua lei ah rallam sialtu SAC ralkap ṭat-mah 33 in ralkap thazaang 60 hrawng cu Taze PDF, Shwebo pengkonh battalion 6 le battalion 7 in ralkap hna nih hriamngan le hriamhme hmangin an kahdoh hna caah SAC ralkap minung 5 nak tlawmlo an thi tiah Taze PDF sin in theih a si.

Kahdohnak a dih hnu zinglei suimilam 6:00 hrawng ah SAC ralkap hna cu Okehpoaing(အုတ်ဖိုအိုင်) khualuhnak ah bomb puahhnawh ṭhan caah minubg 3 hrawng an thi ṭhan, tualchung hriamtlai phu lei hliamhma tuarnak umlo in hnu an tolh kho tiah theih a si. SAC ralkap hna nih cun zinglei suimilam 10:00 hrawng ah OhPhoAi(အုတ်ဖိုအိုင်) khuachung ah an lut i inn an khangh caah khuami hna cu an zaam hna tiah PDF sin in theih a si.

Hpakan khuachung suidawr pakhat sing 500MMK leng chuh an tong, Kachin ramkulh, Mohnyin(မိုးညှင်) pengkomh Hpakan Lungkhin lampi ah ummi Wai Phyu Aung suidawr cu nizaan September 15, zaanlei ah mifir nih an luhhnawh hna tiah Hpakan khuami nih an chim.

zaan zaanlei suimilam 4:00 hrawng ah ruahpi a fak ngai, culio ah cun private motor pakhat he hriam aa tlaihmi minung 5 nih Wai Phyu Aung sui dawr cu an luhhnawh i sing 500mmk leng an i kalpi” tiah Hpakan khuachung um sui dawr ngeitu pakhat nih a chim.

Wai Phyu Aung suidawr luhhnawh in an phaisa firpiak an tonnak kongah Hpakan peng palik phu nih hlathlainak an tuah tiah theih a si. A luancia September 14 Hpakan khuachung Lungkhin sang ah lungvar/lunghring kawlmi hna thuam aa hrukmi pakhat nih, meithal i put in motor chuhnak a rak cang bal tiah theih a si.

Ayardaw, Ngwaydwin khua ah SAC ralkap kahdoh an tong, minung 5 an thi hleiah an sakhaan an khangh piak hna, Sagaing ramṭhen, Ayardaw peng Ngwaydwin khua ah umhmun khuarmi SAC ralkap hna cu September 15 ah tualchung hriantlaiphu nih an kahdoh hna caah SAC ralkap lei minubg 5 an thi tiah Ayardaw peng pah-kah-phah phu chungtel nih an chim tiah theih a si.

Ngwaydwin khua ah umhmun khuarmi SAC ralkap le pyosawhṭi hna cu Monywa pengkomh tualchung hriamtlai phufonh nih zinglei suimilam 4:30 ah an luhhnawh hna i an kahdoh hna. SAC ralkap 2 le pyosawhṭi 5 an thi, minung 3 nih fakngai in hliamhma an tuar leng ah cuka hmun sakhan cu an lak khawh hnuah mei an khanghta tiah theih a si.

Kutcheh bomb lung khat le chai pakhat pakhat an lak tiah theih a si. Cu sakhan cu Monywa pengkomh PDF battalion 6, Ayardaw peng tualchubg hriamtlai phu, Myinchain pengkomh battalion 7, MRTF, Tapayngyo(သပြေညို) pah-kah-phah, Danger Force phu le ABNPDF phufonh nih an kahdoh hna tiah theih a si.

Gangaw Pengah SAC ralkap nih minung 10 an tlaih hna, pa pali ralphaw ah an hman hna! Magwe ramthen, Gangaw pengkomh, Gangaw hrambunh Khah-Lah-Yah 50 in rallam sial ah a kalmi SAC ralkap hna nih Gangaw peng, Mayni(မြေနီ) khuami pa pali hna cu nizaan September 15 zaanlei ah an tlaih hna i ralphaw ah an hman hna tiah theih a si.

SAC ralkap hna rallam an sialnak in Mayni nichuah lei Phethtwai(ဖက်ထွဲ)khua an phan i Mayni hmun, ramlak ah ral a hrialmi khuami 10 cu an tlaih hna, nu le tar 6 cu an thlah than hna i, pa pali tu cu ralphaw ah an hman hna tiah khuami pakhat nih a chim. Ralphaw ah an tlaih thaimi hna pa pali cu Ko Zaw Naing, Ko Naing Maung, Ko Tin Zaw Naing le Ko Bo Myint hna an si tiah theih a si.

Rallam a sialmi SAC ralkap hna cu 150 hrawng an si lai, nizaan September 15 zaanlei in PDF Uniform an i hruk i, Mayni khua pawng ramlak cu an rak phan. Cu hnu ah, khuami 10 an tlaih hna i, nu le tar 6 an thlah hna, pa pali tucu ralphaw ah an hman hna. PDF nih kan kap kho hna hlah seh tiin mipi cu an tlaih hna i ralphaw ah an hman hna hi a si tiah khuami pakhat nih cun a chim chap.

SAC ralkap hna cu, Gangaw peng, Sameik(စမိတ်)khua le Kaungdung (ကောင်းတုံ) khua lei ah rallam an sial caah khuami mipi hna nih ralring tein um cio dingin tualchung hriamtlaiphu nih theihternak an tuah hna tiah kan theih.

Russia Ralkap Nih An Kir Takmi Hmun Ah Minung 400 Renglo Phumnak An Hmuh! Russia ralkap nih an zam takmi Ukraine ram chaklei Izyum khua ah minung 400 renglo phumnak khur hmuh a si, tiah palik bawi Volodymyr Tymoshko nih a chim.
Russia nih an lak i thlanga chung an rak umnak khuapi ah september 16 ah tu bantuk in minung a phu in phumnak kan hmuh hi a si, hmun dang zongah mithi phumnak an um len tiah, a chim chap.

A thimi hna hi zeiruang ah dah an thih ti cu fiang in theih khawh a si rih lo nain Bomb khuavai ruang le ngandamnak lei tha te zohkhenhnak a um lo ruangah a si lai tiah, zumh a si. Russia ralkap hna an umnak hmun paoh ah thih lohnak a tam tiah, President Zelenskyy nih cun a chim. Ukraine nitlak lei hmun zong ah Russia ralkap nih sualnak ngei lo mipi hna cu an thah hna tiah, Ukraine nih an chim nain Russia nih cun a dik lomi tiah ai pheh ve.

YeOo Khua Ah Palik Bawi Pakhat Amah Tein Aa That, Sagaing ramṭhen, YeOo pengkomh YeOo khua ah caan karlak pengkomh palik bawi chang(Deputy Chief of Police) pa cu nizan September 15 zanlei ah amah tein aa that, tiah Ye U khuami hna sinin theih a si. “Pengkomh palik bawipa cu amah tein meithal in aa kap i a thi. Nihin September 16 ah a ruak cu palik nih an fimhlawm lio kan hmuh,” tiah YeOo khua ummi pakhat nih a chim.

Sagaing ramṭhen palik he aa naihniam mi pakhat nih, “Caan karlak palik bawi chang Win Naing cu September 15 zanlei sml 6:00 hrawng ah a inn chungah amah tein 32 meithal in aa kap caah a thi, YeOo pengkomh cu Sagaing ramṭhen ah thah nawnnak a tam venak hmun pakhat a si ve. Taze khua luhnak pawngah palik 5 kah thah an rak tong i, meithal zong an rak chuh hna, mah caah Palik bawipa hi thawngpang boruak a chia i a ṭih caah amah tein aa that a si kho men,” tiah a chim.

Sagaing rmaṭhen ah pwngkomh 11 a um i, peng 34 a um. Pengkomh palik bawi le peng palik bawi tampi an um i, cu chungah palik bawi Win Naing lawng hi amah tein aa thatmi a si rih, tiah theih a si.

Haikyikyun palik sakhaan in palik pakhat hri awh in a nunnak a thi!! Ayearwaddy ramthen, Ngaputaw(ငပုတော) peng, Haikyikyun(ဟိုင်းကြီးကျွန်း)sakhaan um mi palik pakhat cu, September 15 zaanlei sml 1 hrawngah hri awh nak in a nunnak a liam tiah khuami hna sinin theih a si.

Hriawhnak in a nunnak aa lami palik pa cu, zu nih a leem cangmi pakhat a si i, Hankyikyun no. 2 sang, tikhur ah hri aa awh hi a si. Tikhur cungcih ah hri cu a sih, a hnawng ah hri cu aa aa hrolh i, cuti cun tikhur chungah a tla i a thih hi a si. Hi palik pa hi nichiar ti awkin zu a ri peng mi a si, a tu hri in aa awhnak zong hi zu a dinnak in a lungcaw a mawlmok i a si theo lai tiah khuami pakhat nih a chim.

US Nih 600 Million Man Hriamnam Ukraine A Bawmh Lai! Russia ralkap pawl rianrang tein tuk khawhnak dingah Ukraine ram cu 600 million man tluk hriamnam bawmhnak ka pek lai tiah, White House nih september 15 a thanh. Ukraine ralkap nih rianrang tein Russia ralkap an tuk khawh thannak dingah a hawikom ram hna le US nih hriamnam bawmhnak kan peknak a si tiah, Anthony Blinken nih a chim.

US nih Ukraine a bawmh dingmi hriamnam hna hi Russia ralkap hriamnam le eidin an i kuat tawnnak le an chiahnak sakhaan tiang a kap khotu, Heimat missile le hriamngan tampi a tel, cun miles 40 tiang a kap kho tu missile 67 million man zong bawmhnak kan pek lai tiah, a luancia zarh ah The Pentagon nih a rak thanh ve. February 24 ah Russia nih Ukraine ram a tuk hnu in US nih Ukraine ram cu dollars 1.1 billion man hriamnam bawmhnak a pek cang.

Ukraine Ram Nuclear Power Plant Sehzung Um Russia Ralkap Kir Dingin IAEA Nih A Nawl! Ukraine nih ngeihmi Zaporizhzhia Nuclear Power Plant Sehzung i a ummi Russia Ralkap pawl cu sehzung in kir dingah International Atomic Energy Agency nih Australia ram meeting ah biakhiahnak an tuah tiah, neihniammi hna nih an chim.

IAEA biakhiah ning ahcun Zaporizhzhia lawng si lo in Ukraine ram chung Nuclear Power Plant Sehzung vialte ah Russia ralkap nih an thiltuahmi vialte cu ngol colh ding in bia an khiah, Australia ram meeting ah hin ram 35 an i tel i ram 26 nih an lungtling i, ram 7 cu vote an thla duh lo, Russia le China nih cun an lungtling lo tiah, theih a si.

Zaporizhzhia sehzung cu Russia ralkap nih an lak caah sehzung cu pakhat khat a cang kho ding dirhmun ah a um i, Ukraine ram lawng si loin kan pawngkam ram hna ca zong ah tih a nung ngai dingmi a si tiah, biakhiahnak chung ahcun an telh chih.

Russia ralkap le Russia Nuclear Power Plant Rosatom nih Ukraine ram sehzung pawl cu Ukraine cozah sinah pek than dingin biakhiahnak ngeih a si i, IAEA ah Russia palai nih cun nitlak lei ram hna nih Ukraine ram hriamnam biatak te an bawmhmi hi meeting nak ah ceih nan duhlo tiah,lungtlin lonak cathanh a chuah ve.

Europe ram ah a lianbik a simi Zaporizhzhia Nuclear Power Plant sehzung cu a luanciami thlachung ah khan tu le tu hriamngan in kah a ton caah IAEA nih cun kan thinphan ngai tiah an chim. Hi Sehzung hriamngan kahnak kong he pehtlai in Russia le Ukraine ramkhat le ramkhat an i mawhchiat.

Kyauktaw Ah AA Nih Palik Bawi Pakhat An Tlaih Rakhine ramkulh, Kyauktaw peng Apaukwa(အပေါက်ဝ) khua palik sakhan ah a umm mi palik bawi (Deputy police chief) pakhat cu nizan September 15 zanlei sml 3:00 hrawngah AA nih an tlaih, tiah theih a si.

“Palik bawipa cu Apaukwa palik sakhan in sualnak case hlun pawl kha Kyauktaw palik sakhan ah va chiah dingin cycle in a kal lioah AA nih an tlaih,” tiah min langhter a duh lomi pakhat nih a chim. Tlaih a tongmi palik bawipa a min hi hngalh a si lo. Palik sakhan chungah tualchung mi sawhsawh cu pakhat hmanh an luhter hna lo tiah theih a si.

“Palik sakhan in hngalh pinak ca(ထောက်ခံစာ) an kan hal hmanh ah a chungah luh in va hal a ngah lo, a leng in kan pek hna. An sakhan cu thirhri (tanzaka) lawngte in an kulh dih hna. Palik cu tualchung mi hna he naihniam tein um an duh lo caah AA nih an tlaihmi palik pa a min kan hngalh lonak a si,” tiah a chim chap.

A luancia June 11 ah Kyauktaw khua ah thil cawk ding in a kalmi SAC ralkap chungtel 2 zong AA nih an rak tlaih hna pinah June 20 ah Kyauktaw khua palik sakhan ah rianṭuantu palik 3 zong AA nih an rak tlaih cang hna.

Ralhrial In Aa Dormi Umnak Ah SAC Ralkap Nih Hriamngan An Kah Caah Tualchung Mi 4 An Nunnak A Liam, 13 Nak Tlawm Lo Hliamhma An Pu, Shan-Karenni ramri Mobye(မိုးဗြဲ) khua Puaikone(ပွဲကုန်း) sangum Mway Daw(မွေတော်) pura tualchung ah SAC ralkap nih an kahmi hriamngan kuan a tla i, ralhrial in aa dormi 4 an nunnak a liam, 13 nak tlawm lo hliamhma an pu, tiah theih a si.

“Nihin September 16 zing sml 1:00-2:00 karah pura an sernak tualchung ah SAC ralkap hriamngan kuan a tlak caah ngakchia 2 le upa 2 an nunnak a liam. Tualchung mi 13 hliamhma an pu,” tiah Karenni ramkulh ralhrial zohkhenhtu phu in ṭuanvo ngeitu nih a chim. Mobye khua chungah ni 5 chung kahdohnak a chuah hnu in SAC ralkap pawl cu hnu an kir i, an umnak hmun in hriamngan duh paoh in an kah.

Cu kong he pehtlaiin “Mobye khuachung ah ni 5 chung pehtlaiin kahdohnak a chuah hnuah SAC ralkap pawl cu hnu an kir. Duh paoh in hriamngan an kah caah tualchung mi 4 an thi i, 13 nak tlawm lo hliamhma an pu. Hriamngan kuan nih a khennak hna hmun hi SAC ralkap umhmun an khuarnak Catholic Biakinn he aa naihniamnak hmun ah a si,” tiah Karenni ralkap ṭangṭi phu in ralkap pakhat nih a chim.

Mobye khua hi Shan-Karenni ramri motor lam cungah a ummi khua ṭha ngai le hmun rem ngai a si. Mobye khua pawng ah SAC ralkap Battalion 2 le Hpekhone khua ah Battalion 7 umhmun an khuar i, hriamngan in kah an bawmh tawn hna, tiah theih a si.

Letpantaung Hmun In SAC Ralkap 5 Cu An Hriamnam He CDM An Tuah, Letpantaung(လက်ပံတောင်း) tlang ah humhimnak latu SAC ralkap 5 cu hriamnam he CDM an tuah tiah theih a si. September 12 ah SAC ralkap bawino pakhat le ralkap 4 cu CDM an tuah i SAC ralkap pawl nih an kawl hna caah a himnak hmun ah kan chiah cang hna, tiah PDF ṭuanvo ngeitu pakhat nih a chim.

“Letpantaung tlang ah humhimnak latu SAC ralkap bohnih pa le ralkap 4 hna cu, meithal le zen- kuan tam ngai he CDM an tuah. Dohthlennak chungah maw an luh lawlaw te lai, zeitin dah an cawlcangh ning a si ṭhan te lai ti cu kan thei rih lo,” tiah PDF ṭuanvo ngeitu nih cun a chim.

“PDF ralkap hna cu ral tuk loin caan sau deuh kan um ahcun kan um thiam ti lo, ral tuk lawngte kan duh cang. SAC ralkap tu cu kanmah bantuk a si lo. Ral kan tu lai, ralhmai ah kan kal lai ti an theih ahcun an ṭih tuk, an um thiam ti lo,” tiah PDF ṭuanvo ngeitu pa nih cun a chim. Atu kar hrawng hi SAC ralkap CDM a tuahmi an tam ngaingai. Hi hnu hmailei zongah a bubu le a Battalion in mizapi sinah aa fonhmi an tam te kho men, tiah zumh a si. Crd-The Chin Post