Pulrai lakah Laimi au leen ve santlaihnak um lai ka zum lo.

Pulrai lakah Laimi au leen ve santlaihnak um lai ka zum lo. Russia a buai. Hong Kong a buai. Atu Kawlram lei ah thinphannak le muihnak nih a kan phanh. Nai cikua i thimnak kong ah a buaimi cu US le Kawlram an si. Kawlram thimnak i thimfung kawlning diklonak cu Trumpian theory sawh ah an chiah. Kawlram le US dirhmun aa dang. Nain, Western media tampi nih “evidence” a um lomi “fraudulant” puhnak sawh a si tiah Kawlram lei i ralkap le USDP puhnak cu an hnon.

USDP nih “eveidence” cu zat kan chuahpi khawh an rak ti. Ralkap nih USDP puhnak cu a dirpi hna tiah a fawinak cun ti ko usih. Ralkap nih “eveidence” kan ngei ko an ti ve. Kawlram mipi nihcun thimnak ah zoh dawhlo a rak um maw um lo cu kan theih pah dih ngawt. Kan mit a cawt lo i kan hna a cheh lo paoh cun, kan rak hmuh cio ko khah. NLD an thuam bakin mipi phaisa an phawt hna lio video zong a rak chuak tung. Kawlram ah thimfung million 8 renglo a diklo an hmuh. Cucu NLD le UEC nih felfai in an chek maw chek lo. A puhtu pawl kha an rak sawm hna ding a si. A hro in an rak hro ko hna khah! “Kan dik, kan palh lo, kan buai tuk lio ah hna nan hnok” ti phun in a puhtu zei rel loin an rak um. “Ralkap pei an lawh ve cang hi” ka rak ti phah hna.

2010 Thimnak cu a rak dik lo. USDP nih an rak hui viar. 2015 Thimnak tu cu ramdangmi an sawm hna. NLD nih a lak ve.
2020 ah ramdangmi an sawm ti hna lo. NLD an lor. USDP nawl an icawn. Mipi uar bikmi an sinak “status qou” le ramdang nih Kawlram ramkhel phu lakah zumh bikmi an sinak “dignity” huham hmangin duh paoh in an cawlcang. Chinram chief nih a dirhmun tlongh lonak dingah MMK sing thong hnih tluk tiang a rak hman tiah a thang. Phaisa in thimfung an cawknak “evidence” hmun zakip ah hmuh khawh a si. Kawlram Phunghram ningah Article 417 phunphai in uknak lak chung timi cu “Anna ting” an timi “coup detat” ngaingai cu a si lo, an ti. Phunghram thiammi nih an theih lai.
Mirang cun “State of Emergency” ti si i Kawl cun “အရေးပေါ်အခြေအနေ” a phanh caah Article 418 phunphai ningin kum khat chung “အရေးပေါ်ကာလ” ah kan thanh an ti. Zei he dah ai lawh hnga? Trump nih Capitol Hill ah buainak a va chuahpi. Ram hruaitu sinak a ṭuanvo ai theih lo, an ti. Cucaah Mike Pence kha “State of Emergency” in uknak la chung tiah an rak forh.

US ah cun, Mike Pence nih “caan karlak uknak lak” cu a duh lo. Kawlram tu ah cun, ralkap nih an lak huar. Pi Suu nih mipi buai le au dingin forhnak ca a chuah. U Win Htein nih ka nunnak he hi cabia cu a tak si ko tiah ka chim ngam tiah min a thut. Mi tampi nih an zum lo. An rak zumh lo kha thil ṭha a si. Mipi an au, ram a buai tuk cun, ralkap nih “State of Emergency” an timi caan khi kum 1 si loin, caan ri khiah lo tiang thlen sual a fawite. Atu cu, ralkap nih “kum khat bakte si lai” tiah an fehter. Lau tuk ding si lo. Phan tuk ding zong si lo. Nain, ralkap cu zumh ding an si lo. Pi Suu zong zumh ding si hlei fawn lo. Khrihfa Pathian a zum lotu Kawl vek an si. Thai le Japan phan Kawl pawl an au. Pulrai lakah “aukhuannak nawl” an lak khawh caah si lai. Thai cozah nih Kawl ralkap cu pressure a pe hlei lai lo. Japan zong nih presusse a pe fawn lai lo.

Japan le Tuluk nihcun, “daihnak le hmaitonh iruahṭinak in” nan buainak hri phoih khawh izuam uh tiah an forh hna. NLD kan ṭanh hlei, ralkap kan in dirpi hna tbk a um lo. Sinain, Democracy ai hmaithlakmi Nitlak ram paoh nih ralkap thiltuah sual an phawt dih lai. Annih cu ralkap uk hau an si ti lonak sau tuk cang cu. Nain, Nitlaklei cozah pawl an tuah dingmi cu anmah Nitlaklei mifim pawl lila nih mipi caah san a tlai lo an rak ti diam cang. Kawl ralkap pawl US visa hei phih. An min blacklist ah hei chiah. Annih ram cu bawmhnak pe hna hlah uh, chawlehnak zong tuah hlah uh, hei ti hrawng lawng khi an tuah dingmi a si. Mi ram uknak kong ah vai ithelh tuk phung si lo.

A rum tuk cangmi Kawl ralbawi lubo pawl nih US visa an herh loh. Nitlaklei sipuazi phihnak nih an paw a ṭamter hna lai lo. Black market lam in an rum chinchinnak tu si lai. A harsa dingmi, nitin pawcawmnak ah harnak a tong ding pawl tu cu mipi zaran kan si. Cucaah “Kawl zong an au ve ko, kan au ve awk si ko” ti ding si lo. Kawl ṭhuanhnak ah ti phun in “ralkap duh lonak cu langhter ve ding si ko” tiah Laimi nih va au ve le va khuan ve leen a herh lo.
Kawl NLD pawl nih mithmai ṭha an in pe hlei fawn hna lai lo. “Tlangcungmi zong nih an kan dirpi ve” ti in anmah credit laknak sawh ah an in hman hna lai.

Kawl zernak chungah khan Vompi bang va lut lengmang hlah uh. Nan Facebook cahmai cio tu khan ralkap uknak cu kan duh lo. “Daw Aung San Suu Kyi le nan tlaihhrenmi ramkhel minung vialte rak kan thlahpiak ṭhan hna uh” tbk in hei itar cio ulaw, a ṭha deuh. Khuazei maw ram daw bik bang ikehkuaiter tuk duh hlah uh. Uico taw va sawh leen khi a herh lo. Uico taw nan sawh cun an seh hna lai. Credit: Salai C Alexander