Public Relation Team, Hakha (PRT) Cathanh Kong Ah Hmuhning Kap Thum

PRT Cathanh Kong Ah Hmuhning Kap Thum
===========
Atu hrawng thil a cang mi kong ah mi sawhsawh kanmah hmanh nih pumpak siaherhnak le lungretheihnak kan ngeih mi a tampi. Ramkhel vawlei chung i caan sau aa paih cang mi hna le cawnnak a ngei mi hna hrim cu an siaherhnak le an lungretheihnak a tam hringhran lai.

Mi sawhsawh lakah lungfim deuh cu dai deuh tein an um i ramkhel lei thiamsang deuh ah ruah mi hna aan tu an ngai hmasa. Nain, ramkhel vawlei i bochantlak deuh pawl cu bochan tlak lo ramkel pawl bantukin an um sawh lo. A cang mi kong ah lehnak (response) an hun tuah colh lengmang. Kan i lawm tuk.

Atutan Public Relation Team, Hakha (PRT) lei cathanh nih mi zapi kan lung a kan tuai cu chim hau lo a si. Hi kong zongah ramkhel ah thuk deuh in a pil mi hna he, mi sawhsawh he, hmuhning le dirhmun langhter cio a si. An cațial cung hngat in, a tlangpi in hmuhning phun thum ah fun khawh a si men lai.

Pakhatnak Hmuhning: PRT cathanh hi cu a palh bak. Hi hi cu SAC nih anmah duhning lawng an rawnh mi hna a si caah CDMers pawl le bawmtu pawl kawl le tlaihnak ah caanțha a si lawng hmanh si loin mipi a kan vengtu CDF cawlcanghnak zongah dawnkhantu a si. A hleikhun in an cathanh no. 3-5 hi cu CDM kan tuah hnawhchan zong he aa kalh bak mi a si caah kan dohthlennak lamthluan ah dawnkhantu a si.

Hi cathanh chung i a tam deuh hi cu anmah SAC rianțuannak le an ramkhel (politics) bawmtu lawng an si caah kan cohlang kho hrimhrim lo. SAC rap ah va i foih bantuk a si. Hi ti ning in kan kal ahcun, kan dohthlennak zong hlawhtlin lo khawh a si caah a herh ahcun SAC he i biakchawnh ti lo lawlaw hmanh ah a țha deuh, ti lei khel in a ruat mi an um.

Pahnihnak Hmuhning: PRT cathanh hi zapi huap ca ah a țha bik ko. Rian kan khinh mi kan pale hna nih caan saupi an ruah hnuah SAC lei le CDF lei zong țha tein bia an ruah hna hnuah khua an khan mi a si. Biaknak lei kan pale hna nih hi ti khua an khan mi hi Hakha khua chungum mi zapi zawnruahnak le dawtnak in an tuah mi a si; anmah pumpak ca ah hlawknak an kawl mi a si lo caah mawhchiat awk an si lo. Anmah um hna hlah sehlaw, SAC nih tlaih mi vialte hna zong thonginn in an chuah țhan khawh țung lai lo. Cucaah, kan pale hna rianțuannak hi tha pe hna usilaw, thlacampiak hna u sih, a ti mi an tampi ve.

Pathumnak Hmuhning: PRT cathanh kong he pehtlai in, kan pale khuakhannak hi a tlangpi cun a țha ko nain an palh deuhnak zawn tete cu a um ko. An ruahmanh lo zong a si men lai. Hmailei ah cun kan ralrinpiak deuh hna sehlaw a țha. Kan khel lio mi dohthlennak le SAC nih an khel lio ve mi thil hi biatak deuh le thuk deuh in kan ruahpiak chih zungzal hna sehlaw a țha ko lai. Khatlei ah, soiseltu (tam deuh cu ramkhel minung le kum no deuh an si) lei zong hi an mawh hrimhrim lo nain kan pale rianțuannak za ah za a palh mi bantukin an ti mi hna le biafaak le bia dawh lo an hman tuk mi hi a țha lo.

Atulio cu Rallokap nih an rak hman zungzal mi (mi zapi thinlung cheu, i rualrem lo lak in tuah i caanțha laak) rap ah kan i foih sual nakhnga lo hi a biapit tuk caah, khat lei khat lei ah faak tuk (extreme tuk) in khuaruah si loin khat le khat i theithiam tein dawtnak he kan ruahnak kan fonhtonh khawh ah hin kan dohthlennak zong hma a kal lai i kan i tinh mi kawltung kan phan kho lai. Cucaah, kan pale zong nih faak tuk (extreme) in i silhnalh lo a herh i, khat lei zong nih faak tuk in ti lo a biapi, ti lei kap in a ruat mi zong an um ve.

Hi ti hin hmuhning phun thum ah ka fun nain a tlamtling lai lo. Hmuhning phun dang deuh zong a um ko lai. Hi hi cu (Facebook cung i a lang mi ka hmuh khawh vial chungin) aa dang lengluang mi hmuhning tampi a tawinak in hei funnak khi a si. Zei a si hmanh ah, kan ton mi cu kan ton cang fom cu ta. Khirh țhan awk a țha ti lo. Nain, fimchimtu lawngte an si dih ko.

Atu hi cu a donghnak a si rih lo. Kan dohthlennak lamthuan i a biapit khunnak zawn ah kan kal cuahmah lio a si. Hi lio caan ah SAC ramkhel nih kan lung aa rualnak le kan i funtomnak a țhencheu khawh lo ding hi a biapi tuk mi a si. Kan i țhen ni cu zatlak hram kan i thok ni a si ko lai. Cucaah, hi lamthluan cung ah hin tinh mi pakhat he lungsau tein le khat le khat i theithiam, i ngaithiam pah buin kalți ko hna u sih.

A donghnak ah, kanmah le kanmah lakah cun ”nannih nan palh…kannih kan hmaan”, ”nannih zei nan hngal lo…kannih zeizong ngal kan si” tibantuk in pakhat le pakhat, phu khat le phu khat kan i chonhbiak lo a herh. “Kannih le nannih” ti nak in ”kan zapi” ti mi lawng nih hin kan khel mi Federal Democracy cu a kan hmuhter te lai.

Cucaah, a luang cang mi thisen vialte le a luang rih kho mi thisen vialte upat hmaizah buin, kan kawltung lei ah hehchet tiți ko hna u sih. SAC nih an hmanh cuahmah mi rap ah i foihter hrimhrim hna hlah u sih. Aluancia (past) cu thlen khawh a si lo nain, aluancia kan ton mi nih kan hmailei (future) thlen khawh fimnak a kan pek khawh ko. Credit: Petros Petros