Pu No Than Kap: Mizoram Le Chinram Kan Tluk Lonak Kong Rel A Phu

MIZORAM le CHINRAM: Kan tluk lonak le in tluk lonak.
===============
36,019 square-kilometers ih kau Chinram cu a hnakih bideuh Mizoram (21,081 square-kilometers) hnakin mipum kan mal sawn, Ting 5 fang kan si [Chin state lenglam siar tel loin]. Chin state let in Mizoram state ah mipum an tam, Ting 13 luan an um (1,331,921.. 2021 kum ta). Mizo le Chin timi hi Leitlun ramri ( international boundary) in Kum 70 luan in ṭhen ruangah, hnamdang vekih hmuh sualawk can tla a um theu. *Hi thu cu tanta hrih in, kan dinhmun veve zoh hnik sehla!

POLITICS DINHMUN; Politics dinhmun (political status) ah State veve kan si. Chinram in 1974 ah state a ngah, Mizoram in 1987 ah state a ngah. A hmin in State veve kan si nan, Mizoram a san sawnnak a um bangin Chinram a san sawnnak a um ve.

THUNEIH DAN: Niam le Sang; 1/-Leiram neihdan (Ownership and transfer of the land): 2012, 2017 le 2018 ih Leiram dan tuah mi “Vacant, Fallow and Virgin Land Management Act (VFV), (miluat milat mizaing Upadi) vek a sile, Chinram Khawte lam tiang in mai khua cio in pupa san ihsin neih mi ram a um lo.. ti a si. Himi dan in Pupa leiram a huap lo, kan ti rero khalle, a huap ko titu cu Chinram Cozah an tikah thu a harsa (CF: Section 30.A. (b) of VFV Land law, 2018).

Himi zoh tikah Leiram thu ah, Chin State ih leiram tlunih thuneitu cu Chin mipi kan si lo, Chin state cozah ciah khal a si lo, Central ih Kawl cozah a si, ti theih a si. Khatlamah, Mizoram State ah leiram neitu le danglamter theitu (Ownership and transfer of the land) cu Central Vai Cozah in fate hman thu a nei ban lo, Mizo mipi kut ah 100% a um.

Chinmi in Kawlram khui hmun khalah leiram le inn lei in kan um thei. -Kawl khal Chinram an duhnak hmunah leiram leiin an um thei ve. Central ihsin Kawlpawl Chin State sungah lut thei lo dingin kham theinak Inner Line Permit (ILP timi) kan nei lo.

Khatlamah, Mizopawl in an duhnak India hmun kipah leiram le inn lei in an um thei. HMANSEH, Central lamih Vai pawlin Mizoram ah, mizoram cozah thu loin, ram fate hman an lei thei lo, an nei thei lo, Mizoram sungah a lut khal an lut thei lo; Inner Line Permit (ILP) timi hmang in Mizoram ih lut ding an kham thei thluh. 2/- NUNPHUNG LE ZINLEDAN; Chin in Chin nunphung le zinledan kilhim ih cawisang dingah thuneihnak sang kan nei lo.

Mizo in an nunphung le zinledan kilhim ih cawisan theinak 100% an nei. 3/- CALAI (Literature) Chin calai cu phunsang, phun hra, phun li cu sim lo, phun hrek hmanah kan zir thei lo. Kawlca cu fimthiam kan zirnak umsun a si men. Mizo calai (literature) cu phun li, phun hra tiang men si lo, phunsang college le university ah B.A le M.A tiangin an zir thei.

Chinram vek si loin, Mizoram cun Tlang ṭong an neih ruangah, Chinram hnakin lungrualnak le pumkhatnak nasaten an neih thei phah. Chinram cozah hnuaiah fimzirnak (Education deptt) a um lo. Central kut ah a um thluh. Chin Cozah in College khal a din thei lo. Central kut ah a um. Mizoram Cozah in a duh zat zat College a din thei. Private khal in an din thei.

4- MP le MLA: NEIH ZAT; MP timi cu Central (Union) ih to Member of Parliament an siih, MLA timi cu State ih Member of Legislative Assembly tinak a si. Chinram in Central hrang Pithuh Hlutdaw ah MP 9 le Amyotha Hlutdaw ah MP-12, A ZATEN MP-21 kan nei. *Cun, peng 9 ihsin 2 ciar mipi hrilmi MLA -18 kan nei (ralkap 6 thawn) zate – 24.

Chin State CM cu rampi President ih hrilmi a si. CM in a Cabinet Vuanci a hril ih President in a nemhnget. CM cu MLA a si hmaisak a ṭul nan Vuanci dang cu MLA lo khal a ngah. Khatlamah, Mizoram cu Central Hlutdaw Rajasaba timi (Amyotha) ah MLA pawl ih hrilmi MP 1, Loksaba timi (Pithuh) ah Mizo mipi hrilmi 1, a ZATEN 2 LAWNG an nei. Cun, mipi hrilmi MLA 40 lai an nei. Ralkap MLA an nei ve lo. CM cu Mizoram in anmahte hrilmi a si. CM in a Cabinet ministers a hril ih an zaten MLA an si thluh a ṭul.

THEIH TLAK; Chinram in Central MP 21 kan neih laiah, Mizoram in central (Union) ah MP- 2 lawng an neih ruangah, a party zawng in Central Vai party (Congress tivek) an zawm hi umze neizet a si. Hmansehla, hnam damnak nungter ringring dingah cun, tualṭo party (MNF tivek) an mamawhzet thotho. Chinram cun,

Central ah MP- 21 rori kan neih tikah, party zawng in Phairawn party zawm ih rinsan lo khalin palai cakzet kan nei. cun, hmuh theih thansonak men si lo hnamdamnak thu ah Phairawn party hnenin beisei ding a um lo ruangah, tualṭo miphun party cakzet neih a thupi.

Zuk: Mizoram le Chinram leiram thu umdan