Pu No Than Kap: Chin Mipi Sinah A Lung Duh Bia A Phuan Ve Cang

CHIN MIPI NAN ZATEN, CIBAI.

Chin Party in Chin miphun ih a hloh rero zomi COVOPAWL lasal thei dingah, karbak pakhat ih retmi 2020 hrilawknak ah,  Mah le tlin tawk cio thinlung, thazang, thiamnak le sumsaw suah in ṭan latu Ramsung le ramleng ih um Chin ulenau nan zate hnenah siseh; Nehnak co thei dingah mitthli thawn Rawl ul in thla in cam saktu Pathianmipawl hnenah siseh; Hnam hlamawi phunphun in phuah saktu le in zai saktupawl hnenah siseh; Ruahsur le nisa lakah Lamzin bek le sia zawh in, bike le ke thawn harsa zetih tlan sukso rero khawtin Party hnatuanpawl hnenah siseh; Thei tawk suah in Chin miphun DAMNAK thuthangtha thawn mipi kaithotu minopawl hnenah siseh, Chin party aiawh in lungawi thu ka lo sim.

Hrilawknak ah thianghlim ten nehnak co tumtu kan sizia kan langter thei ih di a riam. Cun, tui ṭum hrilawk ihsin zirsuah mi ṭhazet zet kan nei ih hmailam hrang ṭan lak dan kan thiam phah ding ruangah lungawinak thotho a si. Nehnak co duh ruangah Keimah bulpak thangsiat ih thuphan i puh rerotupawl hnen khalah, ka parih nan lungput diktak ka theih phah ruangah ka Lung a awi.

Democracy dan thlunin Kum 5 vei khat hrilawk ah a cak, cak lo timi cu vote ngahmi tam le mal zoh in relcat men mi a si. A thupi sawn cu hril tlin mi in Kum 5 sungah ziangvek in ram le mipi hrang hna an ṭuan ti a si. Sim rero zo bangin, hnam dam lo Chin miphun hrangah, hrilawk ih tlin le tlin lo hi a thupi zet nan thupibik ah ret theih a si hrih lo. Thimnakah, Chin Party in hrilawk ah a tlin thei ahcun, Vote petu mipi in mai miphun ngaina ih dinpi ngamtu kan sizia a takin kan langter tinak a si ding; Hriltlin mi MP pawl khalin, Chinram le mipi hrangah kan tumtah vekin ṭuan theinak can ṭha kan ngah thei ding ruangah, di a riamzet ding.

HMANSEH, Miphun DAMLO kan si ruangah, miphun damnak thuthangtha kan theih fiang ding le kan hloh reromi, Kan Ram le ramri, Kan nunphung, Rinumnak mizia, Mai ram le miphun humhim ih cawisan duhnak lungthin, Kan anka le calai, Mahlemah rinsanawknak, tipawl ngahsal ih nei theisal dingah, Tlangram le Phairawn ih um Chin hnahthlak zaten lungkhat thinkhat pu in ke kan kar tlang thiam ding hi a THUPIBIK.

Cuvek dinhmun kan thlen tikah cun hrilawknak khal ah kan tling ringring thei. Hmailam feh dan ding thu ah, Chin Party neitu cu Chin mipi kan si bangin, mipi duhdan in kekar ih feh vivo a si ding. Chin lungput diktak neitu cun miphun damnak MEIFAR mihter siang kan um lo ding. Curuangah hi Meifar cu Chin miphun kan um kulhsung tesin fahlang san tiang, mit loin a alh a hliau deuhdeuh ding. Chinram le miphun humhim ih cawisangtu Cung Pathian pekmi hnangam daihnak nan hnenah um hram seh! Credit: Pu No Than Kap

Leave a Reply

Your email address will not be published. Required fields are marked *