Manipur Tualchung Buainak Ruangah Ralhrial Mi Ngakchia 4 Ti Ah An Paam!. India ram, Manipur ramkulh buainak ruangah ralhrial in Churachandpur khuapi ah aa dor lio mi ngakchia 4; pa 3 le nu 1 cu nizan march 20 ah khan Churachandpur peng i a luang mi, Tuitha tiva ah an paam, tiah Manipur tualchung thawnghlattu The Hills Journal nih a ṭial.
Nunnak a liam mi hna hi Thongkhohao(kum 6), Pu Ngamginthang fapa; Thangguohao(kum 4), Pu Thangminjang fapa; Pu Lunkholal fale pahnih- pa Lallenchung Lupho(kum 6) le nu Hathoithem(kum 9) an si, tiah an langhter.
Ti ah a paam mi ngakchia hna cu cawn nihnih ni(March 20) zanlei ah khan Tuitha tiva ah tak i kholh ding in an kal i, zanlei pi tiang an ṭin bal lo tikah tualchung mi le zatlang bu nih an kawl hna. Din loin an kawl hna hnu ah nizan zinglei ah khan ngakchia 4 ruak cu Tuitha tiva ah an hmuh hna.
An ruak cu post-mortem a si hnu ah nizan chunhnu ah khan KKL conplex ah vui an si. A cung i kan langhter cang bantuk in nunnak a liam mi hna hi Manipur ramkulh tualchung buainak ruangah Churachandpur khuapi, Cannan veng, ECA Relief Centre ah aa dor lio mi an si. The Chin Post