Pu Henry Van Thio Kong Hi Anmah Ralhrang Hmurka In A Chuakmi Bia A Si Caah!

Pu Henry Van Thio Kong Hi Anmah Ralhrang Hmurka In A Chuakmi Bia A Si Caah!
===============
Pu Henry V Thio kong hi anmah Ralkap/ Junta hmurka in a chuakmi bia a si caah, zumh tuk ding a si rih lo. Chinmi karlak buaiter or Mipi thazaang derternak caah, an sio rawl a si kho men. Cucaah, mah news a chuakmi cung ahhin comment pek/tial iralrin deuh rih ko hna usih.

Tulio kan ram dirhmun ka zoh tikah , khua dei lai, zinglei Suimilam 3 hrawng a si cang. A mui tuk rih nain, khua ceu a chuah ding kan naih deuh cang tiah ka tuak. Cucaah, thachiat ding a si lo. Vuangtu Ralkap camp khi, kah an hau lai lo. Anmah tein an ttio te lai ko lai. Zan ihngilh khawh lo/ ningtti in ni le caan an rel lio a si i, anmah tein an i surrender hlan cu, tuar ko hna seh, ka ti.

Mipi Ralkap/ PDF an karh thluahmah. An thawng chin thluahmah lio ah, Junta/ MAH Ralkap belte cu nikhat hnu nikhat an zawr thluahmah. A cheu cu Mipi Ralkap/ PDF nih an thah hna. A cheu cu an zam. Cucaah, MAH Ralkap, Aung San rak dirhmi “Tatmataw” khuachia nih a tuammi, Ralkap bu hi, Kawlram tuanbia in hloh thai ding an sinak nicaan cu kan naih chin thluahmah cang tiah ka tuak.

February 1, 2021 in Min Aung Hliang hruaimi ralkap nih rampi uknak hramhram in an chuh hnu in, NLD Party chung lutlai, Rampi President le Rampi ruahnak petu Daw Aung San Suu Kyi cu tlaih colh an si. A si nain a dang cheukhat cu an tlai hna lo, NLD Cozah a si chung an umnak inn te ah an um ko hna tiah BBC nih a tarlangh.

Cun BBC nih fiang ko in a tarlangh ning ahcun NLD Cozah chan ah Pyithu Hluttaw Chairman a simi le Vice President Henry Van Thio cu Ralkap nih an tlai hna lo, an mah Cozah chan an umnak inn te ah leng chuak loin, tha tein an um ko” tiah a langhter hi asi.

A fiang mi cu Ralkap nih tlaihkhih nak le taza cuai nak ti bantuk zeihmanh an tuah hna lo, him tein an mah inn te ah an um ko, leng chuah an ngah deuh lomi pakhat lawng hi si dawh bik asi.

An mah Ralkap lei lutlai a simi Zaw Min Htun zong nih “Vice President Henry Van Thio le Pyithu Hluttaw Chairman a simi cu kan tlai hna lo, zeibantuk taza cuai nak hmanh an cung ah kan tuah lo. Inn te ah tha tein an um ko” tiah BBC ah fehternak a tuah ti asi.

“Henry Van Thio hi inn ah tha tein a um ko. Cun House arrest ti bantuk zeihmanh kan tuah lo. Zalong tein a mah inn te ah a um ko” tiah Zaw Min Tun nih cun BBC sin ah a chim hi asi.

Pyithu Hluttaw Chiarman tu cu nihin tiang ttha tein office a kai peng. A ruang cu a mah kha USDP minung zong a si. A si nain Henry Van Thio tu cu inn ah tha tein a um. Office kai awk a that ti lo caah a si. A ruang cu President office le Hluttaw office pi cu Ralkap Council in thlen a si cang caah Henry Van Thio caah zung kai awk a um ti lo. Cu caah a nih cun inn ah tha tein a um. Kan mah ralkap council lei in phihkhar nak, rialdip nak ti bantuk zeihmanh hnahanwh nak kan pe lo tiah Zaw Min Htun nih BBC ah a chim hi asi. Note: BBC ah an sining sau pi in a langhter, a tawinak in kan tial.

Atu bantuk caan hi, Kawl uknak in chuah chuah caan a si. Tulio bantuk caan chia hi, caan ttha ah kan lak thiam lo ahcun, Chin ram le Chin Miphun nih chan khat hnu chan khat a tuar a fak chin lengmang lai. Atu lio caan hi, Kawl uknak an der/weak bik lio caan a si i, Kawl a si lomi, Miphun dang vialte, mah uknak tthalo hin chuah a fawibik lio caan a si.

JUNTA/ MAH nih uknak an lak hnu in taksa lei cun a chiabik, tuarbik dirhmun kan phan. Asinain freedom le liberty/ zalawngnak/ luatnak tak hmuhnak ding ahcun, caan thabik, caan rembik kan phan tiah ka tuak. Bible ah “atu caan hi caan chia a si caah, caan tha nan hmuhmi kha, tthate in hman izuam u” tiah kan chimhmi hi, miphun caahcun, atu lio bantuk, “caan chia” tak lakah “caan ttha’ rak iser thiam kha a kan fialmi a si.

Zei ruang ahdah Kawl uknak in chuah a herh? Kawl tuanbia tawite kan zoh hnik lai? Modern Myanmar uktu, Tatmadaw hi Kawl miphun caah dothlennak a tuahtu Aung San nih a rak dirhmi a si i, modern Myanmar a dir ri in Nihin tiang Myanmar ram an uk. Tu hi Kum 73 an uk cang. Kawl uknak a chiat ning thuk deuh in a tuanbia zoh usihlaw, 9 century hrawng ah King Anawrahta nih Pagan Empire a rak dirh. Kum 440 renglo a hmun. UK duh ah anmah chungkhar karlak ah I thahnak tuanbia tete Pagan empire a hmun chung ah hmuh ding a um.

Pagan empire a tluk hnu ah Toungoo dynasty nih Myanmar ram hi an von dirh tthan i, Miphun kip nih an rak doh hna. An UKnak map zoh tikah Chin ram zong rak uk dawh an si. Kan Lai hritlai Manipur/ Meitei hna nihcun fak doh hna. Toungoo dynasty hi 16 Century lio hrawng uktu an si i, Chin tuanbia zoh tikah, Chinmi hna, Chin ram kan rak kaika hrawng a si i, Chin Miphun zong nih fakpi in an rak dohmi empire rak si ve sehlaw hngalh lo a si. Tuanbia record ahcun, rel ding a um lo.

Toungoo dynasty a tluk hnu ah Mirang uknak/ British empire ah Kawl miphun he, Chin miphun he kan tla. WW 2 a dih in, BRITISH empire a rak tluk lio ahhin, Chin Miphun le tlangparmi nih kanmah tein uknak kan rak ser lomi kha caan ttha ngai kan rak tlolh. BRISTH empire a dih hnu ah Myanmar ram dirh tthantu cu General Aung San a si.

Myanmar ram kaupi in a funtawmtu/ unify tuahtu hmasatu, King Anawrahta (Pagan Empire) A voi 2nk Myanmar ram dirh tthantu, Tabinshwehti (Toungoo Empire). A voi 3nk Myanmar ram dirh tthantu, General Aung San (Modern Myanmar 🇲🇲). Hi hna chan 3 an tuanbia zoh tikah uknak ttha hmuh ding a tlawm ngai. Uknak icuh. Ithah a tam.

Miphun dang fakpi in an kan hrem cu um rih sehlaw, anmah Miphun lila cungah dawtnak a ngei lomi Miphun an si. Pagan empire le Toungoo empire, a karlak uknak tbk an tuanbia tbk cu, minung rak fim hlan deuh a si i, kaltak usihlaw- Aung San chan in, nihin tiang an tuanbia zoh tikah ithahnak, uknak icuhnak lawngte a si ko.

Aung San an thah. Newin nih uknak a lak. Newin cu Saw Maung nih a tlaih ttthan. Cun, Than Shwe chan a ra i, nihin MAH tiang an dirhmun ah uknak icuh lawngte a si. MAH sinah uknak cuh tthan dingin Khua a ruatmi a kut tang Ralkap Bawi zong tampi hna sehlaw, hngalh lo a si. Uknak icuh. Ithah. I tlaih hi an cikor a si cang caah, mahbantuk uknak tthalo chung ah Chin Miphun saupi um ding cu, a si kho lo.

Cucaah, Modern Myanmar dirhtu, Aung San nih a rak dirhmi Tatmadaw, cikor tthalo hi a hram in phawih a hau cang. Kum 73 chung an uknak/ empire hi dihter/ tlukter hrim a herh. Union ah kan um ko ahcun, Tatmataw min hrim hi, Myanmar tuanbia in dihter in, Federal army tiah system thar dirh a herh. Mah le state cio, mahte cio in ven. Mahte cio in uk ding system hi, Tulio bantuk caan chia ahhin, ser khawhnak caan tthabik a si. Credit: Zasang Cinzah