Pu Cung Hu: Ngakchiaa (2) Caah Hin Kyats 5,000,000 A Hau Lai Tiah Kan Zumh

13-12-2020(Zerh pi ni) Na Christmas laksawng cu a ho nih dah a CO lai? Fa phir hna: 1.Lai Peng Thang(Kum 8), 2.Cung Bawi Bik(Kum 8), Pu Van Ceu (Tlei cia) le Pi Doi Thai, Bungtuah khua, Senthang, Hakha peng hna i an fa pa dawt fa phir tete hna cu an chuah ka in an hna a cheh pin ah holh zong an thiam lo. Kum(2) an si ah an pa nih a roh taak hna i a nu nih harsa taktak in a run cawmken hna. Fa pa(5) an ngeih hna.

Hringtu nu cu 2018 ah Cycle accident in fak tuk in aa khawn caah rian hrang a tuan kho ti lo. “A fa le thih taak sual le rian tuan khawh ti lai lo hi ka ttih tuk” tiah an nu nih cun mitthli he a chim. Hi hna chungkhar cu ” Nun Bawm” pum tling lo bawm chaantu group nih Bungtuah ah an va hmuh hna. An zaangfak tuk hna i Hakha Siizung ah an rak hruai hna.

Hakha Siibawi thiam hna nih Mandalay/Yangon Siizung pi ah kal pi hna u law dam zong an dam kho ko tiah an ti hna.
Nun Bawm Group nih Yangon Siizung pi ah kal pi hmasa i a dam kho ding an si ah cun pehzulh in tawlrel ding an i tim cuahmah. A dam kho lo ding an si le Kalaymo Pumtling lo sianginn ah ca cawmter an timh hna.

Hi rian ttha tukmi a tlamtlin khawhnak hnga ah Phaisa an ngeih lo caah phaisa kawlpiak ding in an rak ka chimh. Thanuam tak in ka cohlan ve hna. Nun Bawm Group nih an mah tein phaisa an i khawl hna i Kyat- 1,000,000/- an khon piak khawh cang hna.

Ngakchia pa (2) caah hin: Kyats 5,000,000 a hau lai tiah kan zumh. Hi fa phir tete hna hi an thluak a tha tuk. An lung a var tuk. Cawn piak khawh awk tha an si. Cawn piakmi an i cinken khawh. Hi hna chungkhar hna i an nun himnak hnga le an thancho venak hnga ah na Christmas Laksawng te rak pe ve hna uh tiah kan in sawm hna.

A tu ah phaisa na ngeih rih lo zong ah na min rak kan pe chung ko. January, 2021 kum thawh kaa ah Yangon an kal hna lai. Credit; Cung Hu

Hi Capar ralchap lo cu a pam tuk hringhran. Nitlak lei miphun hi an tlaunak zawn ahcun zul hna hlah u sih! Turkey ram i missionary kum 20 leng a ttuan cangmi US pa, Pastor Andrew Brunson nih kan hnu zarh ah tuahmi Global Prayer for US Election Integrity program ah “US ram khrihfa nih a rauh hlan ah hremnak kan tuar cang lai. A luan ciami kum 20 chung cu ram dang le miphun dang hna nih Khrih an theih khawh nakhnga, fakpi in rian ka ttuan. Sihmanhsehlaw nai kum hnih thum chung hrawng cun, ram dang le miphun dang nak in kanmah US ram le America miphun nih Khrih kan herh deuh cang. A rauh hlan hi ram le miphun hna lak ahhin, Khrihfa hremnak fakpi in kan ton cuahmah cang lai” tiah a chim.

Hi kong hi ttha tein ruah ahcun vawlei khrihfa caah ngaihciat awk ngaingai a si. America ram cu vawlei cung khua kip ah missionary a thlahtu le vawleipi ah khrih thawngttha karhtertu ram le miphun an si. Kanmah Chin miphun zong America missionary nih Khrih thawngttha bia theihtermi kan si. Kan ram le kan miphun sin ah Khrih thawngtha thlaici tuhtu cu an si. Sihmanhsehlaw hi hnu chan tlawmpal ahcun, vawleipi ah Thlarau thlaici tuhtu miphun le ram a simi US rampi cu vawlei hmun zakip i Khrih thawngttha an rak chimhmi miphun tete, kanmah Lai miphun bantuk nih, missionary thlah hnawh hau dirhmun um dawh an si cang.

Miphun dang le ram dang caah thlacamtu a rak si tawnmi ram cu, a rauh hlan ah thlacam piak a haumi ram le miphun si dawh an si cang. Hrem a tongmi vawlei ram kip khrihfa dirkamhtu le chanchuahtu ram le miphun kha atu ahcun, hremnak a tongmi le chanhchuah a haumi ram le miphun si dawh an si cang. Kan pupa phungthluk ah, “cawfa nih cawpi hnuk a dinh te lai” timi dirhmun kan phan ko cang. Hihi US ram lawng ah a si lo. Kan vawlei hmun tampi ah, missionary thlahtu le ram mui ceutertu ram a rak simi ram le miphun tampi cu, ram mui, chanhchuah haumi le missionary tiang thlah piak a haumi ram le miphun ah an cang cang hna.

Tahchunhnak ah, kan unau Mizoram khi A.D. 1894 kum ah Wales ram missionary, Rev. JH Lorrain, le Rev. FW Savidge hna nih Khrih thawngtha an rak chimh hna. Cu lio ahcun, Wales ram cu tthanghnak an rak hmuh kaa a si caah Pathian biaknak ah an tthawng, pumh le khomh an fel i vawlei hmun tampi ah Khrih thawngtha chimtu missionary an rak thlah hna. Sihmanhsehlaw kum 100 leng a hung liam tikah, Wales ram cu thlarau nun ah an tlachia i an khrihfra nun cu vawlei tawne a phan cang. Zarhpi zing hmanh ah biakinn ah aa pummi an um kho ti lo. Thanghnak an rak hmuh lio i minung thong tampi tlum in biakinn ttha ttha an rak sakmi tampi cu, Nightclub le zuu dawr ah an thlen dih cang hna. Khrihfa muisam an thlau cikcek cang.

Cucaah thlarau in an fale a simi Mizoram Presbyterian Synod Mission (MPSM) nih Wales ram i an missionary voikhatnak caah an senior pastor, Rev. Sangkhuma cu ah an hei thlah i atu hi cu kaa ahcun heh lawh, tiah mission rian an ttuan cuahmah liopi a si ko rih. Mizoram khrihfa nihcun, Thlarau in hringtu an pi le an pu rawl pek hram an thok cang hna. Kan nih Chin miphun zong cu Thlarau in kan pi le pu miphun le ram a simi Nitlak lei miphun sin ah, Thlarau rawl petu kan si ve a herh cang. Nitlak lei miphun nih Pathian an kal taak cuahmah, Pathian ralchanhmi thil phunphun an tuah i pumsaduhnak lam zul in an kal cuahmahmi hi Nitlak lei ram ummi kan miphun nih uar hrimhrim hlah u sih. An tlau bia a si kha hngal hna u sih! Ngaihkhat tthitumnak hna Nitlak lei miphun nih an tuah ruangah uar hrimhrim hlah u sih. An tlau cang bia a si tu kha hngal hna u sih!

Zuu din, bear din le wine din hna Nitlak lei minung nih tidin le rawl ei ah an ruahmi hi, kan miphun nih uar hrimhrim hlah u sih. An tlau cang bia a si tu kha hngal hna u sih! Nupa sualnak tuah le living together hna Nitlak lei nih an tuah ruangah uar in cawng hrimhrim hna hlah u sih. An tlau cang bia a si tu kha hngal hna u sih!
A rawl ttam cangmi midang, miphun dang le ram dangmi ca tiang ah, Thlarau rawl petu miphun si ko hna u sih~kan phanhnak ram kip ah! Lawmhnak he, Hram Bik Lian.