President tthutdan cung i a tthu ding cu amah tthiam tthiam asi ko.

President tthutdan cung i a tthu ding cu amah tthiam tthiam asi ko. (Salai Bawiukthang Cinzah)

Haman nih Mordecai thah nak ding khua a khan. Chik khat cu Siangpahrang nih a ngaih piak. A chim mi poh a zulh piak. Esther le a miphun hna nih Pathian mithmai kawl in thla an cam tik ah Pathian a cawlcang i a rian a ttuan. Siangpahrang cu ai hngilh kho ti lo i a ca uk tlem mi kha ava zoh than. Cu tik ah Mordecai thihnak ding i khua a khang mi Haman tu kha amah tuah mi thlainak cung ah thlai asi. Pathian thim mi cu atu a tthu lio mi hi asi ko.

Bawipa nih a chim: A hramthawk tein a phichuak zeidah a si te lai ti kha ka rak chim; thil um ding kha a um hlan piin ka rak chim. Kaa tinhmi cu ka tlolh bal lai lo, ka ti; tuah kaa timhmi cu a dihlak in ka tuah lai. (Isaiah: 46: 10) President Trump akan pe tu Pathian amin thangthat si ko seh, a ca i thla a cam mi hna cu mi thluachuak an si.

Atu thil a cang mi hi David siangpahrang adih dongh nak lio bantuk kha asi. Adonijah kha mipi nih siangpahrang ah an rak thim, ralbawi le ralkap zong nih an rak lomh pi. Adonijah cu Siangpahrang asi cang ti ah thanh le lomh a rak si. Asinain David le prophet hna nih cun Solomon tu kha an timhlamh i Siangpahrang rang kha an ciit ter. Mi tlawm te nih an lomh pi na in Adonijah te aunak cu a lo diam ko. Mah bantuk kha atu hi asi lai.

Atu hi Bawipa nih a mi ralttha hna akan herh lio asi. Thiangthlarau nih hihi aka chimh mi asi caah zei hmanh ttih ding asi lo. Ahad pennak lio ah, Elijah lei ttang mi kha Bawipa lei ttang mi an si bantuk in Trump lei a ttang mi hi Bawipa lei ttang mi kan si.

Trump hi vulei hruaitu dang he an i lo lo. Pathian nih USA le vulei pi caah ai thim hlei mi asi, cu ruang ah a biachim zong ai dang. A biachim le a um tu ruang ah minung nih cun an cohlang lo na in Bawipa nih cun zei ruang ah dah hi dir hmun ah a chiah ti cu a hngalh ko. Bawipa nih Keimah nih a herh ka ti caah President tthutdan ah ka tthut ter mi asi ati.

Pastor le zumtu hna Biden lei i nan ttan mi hi apoi tuk i hi hi asi thiam lo mi asi, Bawipa nawl hi kan ngaih i Trump caah thla kan cam tti ding asi. Pathian nih thluachuah pek akan duh, thla cam hna seh ti akan duh. Joshua nih Jericho a rak tei bantuk khan hi vulei fimnak le thiamnak nih Pathian tthawnnak an chawhkanh nak ralpi hi do hna usih. Prophet hna hi Pathian officials an rak si tawn kha.

Zumtu hna tho u, dir u, thla cam hna usih. Thlacamnak hi Bawipa ca le US caah atu lio hi abiapi tuk. Bawipa nih na thlacamnak hi a theih ko. Zumtu Pathian fale hna, nan chung i a um mi kha vulei i nan hmuh mi nak in a lian ngan deuh ti kha rak hngal law rak tei tu si rak i zuam ve.

Thlacamnak hmun in
Sayama Nukhan