President Trump i “American First” policy le America mipi nih Tuluk ram hmuhning lungput ai thleng cuahmah ve.

Cold War II le Covid hnu lei Vawlei cuanhning part II
===================

President Trump i “American First” policy le America mipi nih Tuluk ram hmuhning lungput ai thleng cuahmah ve. Trump le Joe Biden cu Tuluk ram kong ah na derthawm tuk tiin pakhat le pakhat an i soi veve. Joe Biden nih a tei hmanh ah China ram he pehtlai in US dirhmun cu ai thleng tuk lai lo tinak a si. Ral Kik (Cold War) tiin auhmi zong hi Ral Lin (Hot War) or ral i tuk taktaknak hrial khawhnak lam a si. Zeicatiahcun USA siseh China siseh ral i tuk taktak ding an duh veve lo. Dwight Eisenhower’ (Former US President) nih “Ral tei khawhnak lam pakhat cu ral tho lo dingin kham hi a si” a ti. 1957 ah Eisenhower’ nih a chim chapmi cu “Cold War cu ralkap/ hriamnam òhawnnak he doh ding, asinain vawlei pi nih Communist pawl nakin a òha deuhmi an si ti in kan mah lei ah an i tel duh nakding in um ding” a ti. Christopher Clerk nih “Cold War tiin kan auh ruangah ralpi taktak a chuak lai lo tinak a si hlei lo. Theih lo kar ah Ralpi he kan i tawn kho (it is possible, unconsciously, to stumble into a conflict” tiin ‘The Sleep Walker’ timi a cauk ah a òial.

Mike Gallagher (Republican representative for Wisconsin’s 8th congressional district) nih THE WALL STREET JOURNAL ah “China he Cold War kan i do cang tiin America politician hna le mipi nih kan theih kan pom ding hi thil òha a si. Zeicatiahcun, timhtuahnak le palhmi remhnak lam a si. China nih a kan zuamcawhnak le a kan dohnak a sau tuk cang ko nain America ram nih zeihmanh a si lo bantukin kan i umternak a sau tuk cang. Cutin thil a si komi cu al (deny) i sungh (defeated) nakin cohlan i tei a òha deuh saumau” tiin a òial. Tuluk ralbawi Colonel Qaio Liang le Colonel Wang Xiangsui nih an chuahpimi theory cu “Raltuknak hmunhma ai thleng cang, ralkap pawl i kah i tuknak hmun timi a um ti lo. Mipi khuasaknak hrimhrim hi raltuknak hmun a si cang. Minung khuasaknak vialte hi a kenkip in doh, nawnnok le dohnak cu hriamnam le thazaang vialte hmang in ral cungah tuah a si te lai. Hmunkip ah raldoh a si lai caah ralkap le mipi kar ah a òhentu (barrier) a um ti lai lo. Raltuknak hmun cu rel cawk a si lai lo: pawngkam, chawlehnak, nungphung, chawva, upadi in action lak tehna an i tel lai.”

Cold War I cu US vs Soviet Union a si i Soviet Union nih US le US he ai kawmmi ram (allies: NATO, ANZUS, JAPAN, etc..) hna he Nuclear weapons in aa zuamcawh khaw nain, fimthiamnak le sipuazi le a dandang òhanchonak le lamthar sial (strategic) lei in a zuamcawh kho lo, tamtuk in an i thlau caah kum saupi a zuamcawh kho lo i Cold War1 cu America le Allies pawl nih teinak an hmu. Asinain, Tuluk cu Soviet Union bantukin ram komh in a dirmi a si lo caah fawibai in òhencheu ding hi a si khawh lo hlei ah China cu ram rum sinak le òhanchonak ah US a zuamcawh khomi le kum zeimaw ahcun US nakhmanh in ram rum deuh ram òhawng deuh a si khomi ram a si. Cold War I lio cu US le Soviet Union kar ah pakhat le pakhat i pehtlaihnak, thil serchuahòinak a um lem lo ruangah i ral le i doh, i khenkham (Sanction or Trade ban) duh paoh in tuah khawh a si. Asinain, US le China cu Trade le Economy ah pakhat le pakhat an i pehtlai (interdependent), an òuanòi mi a tamtuk caah khenkham (sanction) tuah ding le phihkhar (block) tuah ding hi thil fawimi a si ti lo. Tuah ahcun a tuahtu zong tuar ve ding dirhmun an phan.

1990 hnu hrawngah nitlaklei democracy ram pawl nih ruahnak (ideology) cu aa khat lomi China ram hi a òhancho ve i an mipi hna an rum deuh ahcun vawlei pi an cul lai, khua an cuan thiam deuh lai i an ram ah zalonnak le democracy lei an panh deuh lai timi ruahchannak nganpi an rak ngei. Cu ruahchannak in Tuluk ram ah chawva-phumnak (investment) tam lak te an tuah, bawmhnak tam lak an pek, a òhangcho liomi ram (developing country) tiin a kenkip in duhning zulhnak (concession)an rak pek. Chawlehnak le pawngkam rawhral kong tbk. le a dangdang ah zulhphung niam deuh in an cohlan hna. Cu nihcun China ram mipi òhanchonak fakpi a chuahter. China nih a ram ah thil serchuahnak (manufacturing facility) a tuahmi ram sin paoh in fim an cawng, an fir i duhsa tein technologylei in a zuamcawh cang hna.

Globalization le free trade timi idea a laar chinchin. Cu nih cun Global supply chain timi a hrin. Global supply chain timi cu tahchunhnak ah US i Boeing Company vanlawng cu US ram ah an ser ko nain, a chung ummi thilri (parts) tampi cu ram tampi nih ser cio a si (Australia, China, Korea, Japan, India etc.). Tuluk ram ah production line (sehzung) ngan pipi ser nakding le ramdang ah kuat chinnak lam le sul (logistic infrastructure)òha taktak an ngeih hlei ah rianòuan thiammi (skill worker) tampi an um, lakhah zong tampi a niam deuh ruangah US, Japan, Europe, Singapore le Australia pawl nih an ram ummi sehzung cu China ram ah an òhial viar i China cu vawlei pi sehzung bantuk ah aa cang. Covid-19 a chuah tikah hitin ram pakhat ah thil ser dih mi a òhatlonak fiang tein hmuh a hong si. A bik in zawtnak òhalo asiloah tlangrai runvennak thilri (PPE =Personal Protective Equipment) pawl hi nitlak ram pawl nih anmah ram ah ser ti loin Tuluk ram ah an ser ca ah thil poi ngai ah a hong cang.

May thla ah Trump nih “China he pehtlaihnak vialte ka chah (cut off) khawh, $ 500 billion ka save lai” a timi cu China Foreign Minister nih, “cu bantuk Cold War ruahnak le sungzatlak vevenak ruahnak cu kaltak ko law,” tiah a leh. An pahnih in sungh veve ding an si. Todd Mariano (director of political risk consultancy Eurasia Group’s U.S. politics coverage) nih “US le China sipuaizi (Trade and Economy) òemòawnnak (intertwined) hi chikkhat ah phoih khawh dingmi a si lo, an kaa in an chim sawhsawh” tiah a òial.

Vawleipi nih China ram ah chawphumnak (investment) tuah in Global supply chain le free trade tiin an au pi i cu ruahnak nih cun China lawng si loin vawlei pi ca hrimhrim zong ah miaknak le òhanchonak tampi a chuahpi lio ah atu ning in kan kal peng ahcun China a rum deuh lai i, nitlak ram le democracy ram hna caah zuamcawhtu ral ah an i chuah te lai tiin John Mearsheimer (University of Chicago political scientist) nih The Tragedy of Great Power Politics timi capar ah ‘China lianhnak nih daihnak a chuahpi lai lo’(The rise of China will not be peaceful at all) tiin a luancia kum 20 lioah a rak òial. Aho mifim hmanh nih cu theory cu an rak pom lo. Cu lio mi tam-u ruahnak cu China nih Globalism a pom deuh lai i phungning tein a kalmi vawlei pi he rem tein aa kom te ko lai (The more China embraced global capitalism, the more likely it would integrate peacefully in the rules- based international order) ti hi a rak si.

Atu cu US le Nitlak ram hna nih China lawnglawng rinh in thil serchuah hi ram humhimnak caah òihnung a si zia le ralring tein investment le thil tuah ding a si zia an fiang cang. 2018 kum in Australia acoza nih 5-G network ah Huawei tel lo dingin a kham. US zong nih a kham. US request nakin Huawei Finance Director Meng Wanzhou (Huawei Founder Ren Zhengfei fanu a si) cu Canada nih an tlaih. US nih pressure a pek i UK zong nih a kham vecang. US le Japan le a dang Western ram hna nih an company pawl China ram in òhial ding an ruah/ timhtuah pah cang hna (decoupling). (Huawei le 5 G network kong hi article pakhat òial tlak a si). Credit: Pa Hmung