President Joe Biden Nih A Renghmi Hna Kawl Ralbawi Pawl Hi

Ralkap Bawi minung 10 cu United State nih dantatnak a tuah hna. Commander in Chief Min Aung Hlaing telh in thahrum in uknak la tu chungtel ralbawi minung 10 le Companies 3 cu President nawl chuahnak in dantat an si. Cu hna pawl cu Commander in Chief Senior General Min Aung Hlaing, Deputy Commander in Chief Lieutenant Senior General Soe Win, General Tin Aung San, General Mya Tun Oo, Lieutenant General Aung Lin Dwe, Lieutenant General Ye Win Oo, Lieutenant General Ye Aung, Lieutenant General Tin Htut, Lieutenant General Sein Win le atu lio Acting President U Myint Swe an si. Cu lak ah Commender in Chief Senior General Min Aung Hlaing le Lieutenant Senior General Soe Win cu Rohinga pawl cung ah ningcang lo thazaang hman mi kong he pehtlai in Human Rights phung buar tu tiah 2019 kum tein cu dantat cia an si.

Ralkap he pehtlai mi chawkhelnak rian pawl asi Cancri (Gems le Jewellery) Co., Ltd. , Myanmar Imperial Jade (Gems le Jewellery) Co., Ltd. le Myanmar Ruby Enterprise (Gems le Jewellery) Co., Ltd. zong cu dantatnak ah cun telh an si ve. Hi dantat nak lawng si lo in US cozah nih Myanmar Defense Ministry, Home Affairs Ministry le Security Forces pawl caah thilri pawl kuat le zuar ding zong an phih lai tiah theih asi. Ref: BBC

Relchap, Nihin bia a kan chimpiaktu Salai Van Bawi Lian biachuak (CNLD Candidate). Kum 70 chung hrem a tuar mi Chin miphun lungrual tein tho cang usih. Nihin hi tho cang usih, kan ram kan vawlei kan miphun nih atu theng ah nangmah le keimah hi a kan herh. Nihin hi Pyidaungsu ni a si bantuk in Pyidaungsu a sertu, a ngeitu miphun kan si. Kan pu kan pa hna ni Federal caah, Democracy caah nihin hi minsen an rak thut ni a si. Cu ca ah nihin i nangmah le keimah kan aumi hi a sawhsawh a si lo, kum 74 chung kan rak tuarnak, kan rak innak pawl nihin hi ka au than mi a si.

Lamzawhnak ah a ra mi ka ule ka nau, ka miphun hawi hna kan dihlak hnu thul loin hmai kan nor chin hna lai. Ral tha tein kan doh lai, kan doh mi hi zeidah a si ti kan i fiang cikcek cang. Nihin hi a bu kan i do lo, party kan i do lo, pumpak kan i do lo kan ram nih a huap bik mi RALKAP uknak kan doh mi a si. A minung in kan i hua lo, ralkap kan in hua hna lo, palek kan in hua hna lo. Ralkap le palek vialte mipi nih cawmmi nan si ca ah mipi kan tanpi uh, kan dirpi uh. Kan pu kan pa hna nih nihin hi Federal Democracy kan ngah khawh nakhnga minsen an thut ni a si i, khakha a rannak in rak kan pe hram uh, kan pe cang uh. Nan tlaih mi, nan hrem mi vialte hna rak kan thlahpiak cang uh. Zeidang chim loin nihin hrim ah rak kan thlahpiak dih uh.

Cu lawng si loin Cozah riantuan vialte hna nan lungre thei hrim hlah uh. Nanmah hi kan ram ca ah a biapi cemmi nan si ca ah CDM cawlcanghnak ahhin i tel ding in kan sawm hna. Kan ram hi atu nanmah kut cung ah a ummi a si i, nan i tel ahcun atu kan doh mi hi kan tei hrimhrim lai. Nan rian hi nan hmuh than te hrimhrim lai. Cu a si ca ah, nihin i kan tuah mi, kan aumi hi hnu ah kir hna hlah usih, kutsih in hmai ah fong chin rih ko hna usih.