President Donald Trump cu February 8 ni thawk in biaceihnak hram an thawk cang lai

Donald Trump Week, Florida State i ummi, Frostproof City nih President hlun Donald Trump cu February zarh khat nak paoh ah upat peknak an tuah piak lai. Tuchun ah Frostproof City Council minung 7 chungah minung 6 nih vote an thlak i, upatnak tuah piak ding in biachahnak an tuah. Mah an tuahmi biachahnak cu Frostproof City khuabawi, Jonathan (Jon) Albert nih fehternak a tuah cang. Cucaah February 1-6 tiang hi President Donald Trump upatnak zarh ah an hman cang lai.

President Donald Trump cu February 8 ni thawk in biaceihnak hram an thawk cang lai. President Donald Trump nih a hlanmi sihni lawyer 5 cu nizan zanlei in an i let than. Zeirungah an i let timi fiang in an chimmi um rih lo. Asinain President Trump he an ruahnak a kalh caah a si lai tiah zumh a si. President Trump tazacuainak cu zarh khat lawng a duh cang caah aho nih a sihnih an tuan lai timi a fiang rih lo.

Senator cheukhat nih an chimnak ahcun President a si ti lomi impeachment tuah le tazacuai cu US phunghrampi ah a um lomi a si caah sihni caah phaisa tampi pek a phu lo, democrats pawl nih a tei zong an tei lo dingmi a si caah sihni hlan hrimhrim a phu lo tiah a chimmi zong an um. Sihni hlan nak caah hin $300,000 tal cu a tlawn lei in a dih lai tiah ruah a si. Senator 100 chungah Democrats le Republican senator minung 50 veve an um, Senator 67 nih a sual tiah vote thlak lawngah President hlun Trump cu sual phawt khawh a si lai. Republican minung 17 nih democrats lei i an ttannak ding lam a um lo. News cheukhat nih cun President Trump nih a sihni pawl cu keimah tein tazacuainak ah ka kal ko lai tiah a ti hna caah atu bantuk in a sihni pawl an i letnak a si tiah an chim.

Donald Trump Day! Ohio house representative Jon Cross le Reggie Stoltzfus nih Ohio state nih President Donald Trump upat peknak caah a chuah ni June 14 paoh ah Ohio state ah Donald Trump Day tuah dingah an i zuam lio a si. Donald Trump nih US caah kum 5 chungah a tuah khawhmi vialte hi philh awk tha lomi an si, US president vialte lak ah a lianngam cemmi, The Greatest President In History” an si tiah a chim. 2020 President thimnak ah Donald Trump cu Ohio state nih vote 3,154,834 an pek. Ohio State ah voi hnih ning tein teinak a co khotu a si. Credit: Salai Lairamthang