Kuki Nu Pahnih Taklawng In khualai Hrawnpi An Si Lio Video A Chuah Hnu Ah PM Modi le Supreme Court Nih Aw-aan An Ngeih Ve!
=========
Manipur ramkulh ah Kuki nu pahnih cu taklawng in Meitei pa a za rual nih lam an zawhpi hna lio video a chuah hnu in Mizoram le India ramchung zatlang bu hna nih an mawhchiatnak an aupi i, Manipur buainak kong a thei lo mi bantuk in a ummi India ram prime minister Narendra Modi zong nih aw-aan a vun ngeih ve.
Kuki nu pahnih taklawng in khualai ah parual nih an hruai lio hna video hi a luancia May 4 ah a cang mi a si i, Manipur ramkulh, Kangpokpi peng, B Phainom khua ah a cang mi a si. Meitei miphun le Kuki miphun pahnih buainak aa thawk lio ah, hi hna nu pahnih zong hi an khua in zaam an i tim nain Meitei pa pawl nih an hmuh hna caah an tlaih hna i, an thilri phoih ding in an ti hna. “Nan thilri nan phoih duhlo ahcun kan in thah hna lai” tiah an hro hna. An taklawng in lam an hrawnpi hna i, lei ah an kalpi hnu ah nu pakhat cu voi tampi an tlaihhrem, tiah theih a si.
Nu pahnih hna hi kum 21 mi le kum 40 hrawng mi an si i, kum 21 hrawng nu hi tlaihhrem a tong mi a si. Tlaihhrem a ton pinah a ṭapa le hringtu a pa cu Meitei pawl nih an thah tiah theih a si. Meitei kut a tuarmi nungdam in a chuak mi hna nih an chim ning ah hi bantuk thil a can lio ah hin palik zong an um ko nain an rak zoh sawhsawh ko hna, tiah an chim.
Meitei kut a tuarmi kum 40 luan nu chim ning ah, cu bantuk harnak an ton lio ah cun mi cheukhat nih bawmh an kan timh ve ko nain kan chanchung i kan philh khawh ti lo ding mi sualnak cu an tuah ṭhiamṭhiam tiah a chim. Meitei kut a tuar mi hna hi pa pahnih le nu pathum an si i, nu pathum cu an thil phoihter in pakhat an tlaihhrem lio ah nu pahnih cu an zaam i, tlaihhrem a tong nu pakhat cu a ṭapa nih chanh a timh caah an thah, tiah palik lei nih report an ṭial.
Hi video hi May 4 ah a cang mi a si ko nain palik lei zong in zei bantuk hmalaknak hmanh an tuah lo i, video a chuah hnu lawng ah hlathlainak an tuah. Video i a langmi pa pakhat cu nizan ah palik nih an tlaih kong an thanh. Hi buainak kong ah mawhchiat a tong ngai mi Manipur Chief Minister N Biren Singh zong nih nu hna cung i tuahsernak cu fak piin a mawhchiatnak kong a chim pinah sualnak a tuahtu hna cu kan tlaih hna lai, tiah a chim ve.
May 3 i Manipur buainak a chuah thawk in aw-aan a ngei bak lo mi India prime minister Narendra Modi cu a voikhatnak ah hmurka a vun ngei ve. “Hi tuahsernak hi India ram mi vialte ca ah ningzak tuk a si. Sualnak a tuahtu hna cu phung ning bantuk in dantat an si lai. Manipur fanu hna cungah a cangmi thil hi ruahthiam a har tuk mi a si,” tiah PM Modi nih cun a chim.
India ram biaceihzung sang bik Supreme court lei zong nih nu pahnih video kong ah hmurka an vun ngei ve colh i, India cozahpi cu “Nan cawl lo ahcun kanmah kan cawlcang lai,” tiah an ti. Manipur ramkulh cozah le Central cozah cu, hi bantuk thil a can ti lo nakhnga timhtuahnak an ngei mi cu July 28 hlan ah Supreme court ah chimfianhnak tuah ding in a theihter veve hna. Supreme court biaceih bawizik Chief Justice nih cun, “Hi thil a cang mi hi May 4 lio i a cang mi si ko hmanhsehlaw nizan tihni i a cang mi he zeihmanh aa dang lo,” tiah cozah lei ṭuanvo ngeitu cu a chimh.
India ram le vawleicung zatlang bu hna nih an mawhchiatnak an langhter pinah Mizoram zatlang bu nu dirkamhtu phu hna zong nih Kuki nu hna cung i a cang mi cu faakpi in an mawhchiat i, a rannak in dantatnak pek an si khawh nakhnga cozah cu an nawl. Manipur buainak ruangah hin minung 140 hrawng nunnak a liam cang i, Manipur ramchung minung 60,000 leng nih an umnak hmun an chuahtak. Atu dirhmun ah Mizoram chung ah Manipur ralzam 12,000 leng an um cang, tiah theih a si. Credit: The Chin Post