Plizer Covid-19 zawtnak khamhnak kakuaise a serhchuahtu hna cu siibawi Dr. Ugur Sahin le anupi an si.

Plizer Covid-19 zawtnak khamhnak kakuaise a serhchuahtu hna cu siibawi Dr. Ugur Sahin le anupi an si. Plizer Covid-19 hi atu tiangah hmual a ngei bik le zumhawktlak bik Covid-19 kakuaise asi. Dr. Ugur Sahin hi Turkey ram chuah a rak si, anu nih kum 4 asi ah a pa riantuannak Germany ah a rak pempi hna. Dr. Ugur Sahin hi Muslim biaknak a biami asi. Hlan lio mipem pa nih hi tlukin vawlei cung a nawnnoktu Covid-19 kakuaise a serhchuah khawhmi cu mipem mithmai a cawisang taktak.

Hi siibawi pa le nupi nih an serchuahmi kakuaise cu 2020 dih hlan ah USA ah chunh thawk dingin CDC nih a tial. Aho pawl dah an chunh hmasa hna lai, siloah usapek an si lai timi cu an chim lo. Sihmanhsehlaw a fiangmi cu fawile bai ah zapizarang chunh khawh asi dawh in a um lo. Siibawi pawl, siisaymah pawl, ralkap, palik, tar, ngandamnak tha lo pawl chunh hmasa dawh an si. Hngakchia kum no hna pawl chunh le chunh lo ding cu hlethlainak tuah chap a hau rih men lai tiin CDC nih a tial.

The Food and Drug Administration nih a lungtlinpi bakin kakuaise phorh le phawtzam colh khawh dingin United vanlawng pawl cu tuni ah an zuang thawk cang ti asi. Kakuaise chunhnak biatak tein an tuah khawh hlan caan karlak cu hmaihuh ihuh, kut i tawl pah lengmang le mibu hrial rih kan hau ko lai.

Relchap ding thawngpang dang, Citizen phitnak man le biahalnak pawl a thlen than lai lo; USCIS nih December 1 thawkin US rammi sinak (citizenship) camipuai phitnak an thlen lai timi kha an thlen than lai lo. Pemnak lei NGO pawl nih thlennak nan tuah ding hi a ding lo ( unfair) tiin tazacuainak an tuah caah atu bantukin an ngol thannak asi. Biaceihnak zung nih a ding ko tiin bia a khiah lo chung cu a thlen dingmi phung le lam vialte a takin tuah chuah lo ding in a um cang. USCIS nih biakhiahnak cu ni 60 chungah ceihpiak than dingin nawlnak tuahnak caan a ngei. USCIS cu mah tik ah cun President thimmi Joe Biden uknak tangah a um cang lai. President Trump nih fimthiamnak a ngeimi pemnak lawng on i a dang pemnak paohpoah kham dingin a zuam. Cucaah President Biden nih zung rian a thawk tikah thlennak pawl kongah zei a cang lai ti cu ka thei lo.

Hi thlennak pawl hi a ngol cang: USCIS nih citizen phitnak N400 ah a man U$ 1170 tiang kai an rak duh. Nain atu cu biaceihnak zung nih a man cu U$ 725 ah um rih ko seh, biaceihnak zung nih na kai kho a ti hlan paoh cu mah zat lawngin a man um ding.

USCIS nih biahalnak pawl cu thlen in har deuh in tuah a duh. Biahalnak pawl 128 tiang zoh dingin a um lai a ti. Mah chungah khan biahalnak pawl 20 hal ding ti asi. Biahalnak 20 chungah a tlawmbik 12 na hmaan hrim a herh. Nain atu ahcun biaceihnak zung nih camipuai kong cu biaceihnak zung nih a ding ko tiin a ti hlan paoh cu nan thlen kho lo a ti. Cucaah citizen camipuai phitnak ah biahalnak pawl cu 100 kha a si rih ko lai. Biaceihnak zung nih zulh phung thlen asi a ti hlan chung paoh cu foodstamp/Medicaid hman in phaisa lak lo dingin nawlnak tuah khawh zong asi rih ko lai. (Becky Nelson nih mirangca in a tialmi ka lehmi asi. Becky Nelson cungah ka lawm). Credit: Salai Z T Lian