Pinlebu Kahdohnak Ah Ralhrang 30 An Thi, Lieutenant Telh In Tam Ngai A Nung In An Tlaih Hna!

Pinlebu Kahdohnak Ah SAC Ralkap 30 An Thi, Lieutenant Telh In Tam Ngai A Nung In An Tlaih Hna I Hriamthil Ceilak An Chuh Hna!
========
Sagaing ramtṭhen, Pinlebu khua cu PDF le KIA nih April thla hramthok ah kan lak dih i, SAC ralkap nih Vanlawng in voitam tuk an kah hna caah hnu kan kir. SAC ralkap 30 hrawng an thi i Lieutenant telh in tam ngai a nung in kan tlaih hna leng ah hriamthil tam ngai an chuh hna tiah PDF chim phuannak nawl ngeitu pakhat nih Khit Thit Media ah a chim.

March 29 in SAC ralkap cu khuachung in an chuak i rallam an sial lioah PDF le KIA nih Pinlebu khua cu an laak. Cu hnu ah khua chung i kahdohnak hi a zualhma i Vanlawng in voitam tuk an kah hna hnu ah, April 10 ni thok in Pinlebu khua chung in PDF le KIA cu an chuak tiah theih asi.

PDF leiin 5 an nunnak a liam i, hliamtuar zong an um i thil chantu mino pahnih zong an i tel. Hi i kahdohnak hi zarhhnih hrawng a rau. Pinlebu Banmauh(ဗန်းမောက်) lam cung um Kapada(ကပ္ပန္တာ) khua in aa thok mi a si” tiah PDF Pinlebu nih an chim.

Tutiang ah PDF nih khualeng hmun tampi cu an uk i, khua chung belte hi SAC ralkap cu an um kal tuk lo caah kahdohnak a zualhma kho ṭhan tiah theih a si. SAC ralkap lei nih thanhnak an rak tuah mi ah ruak 12 le hriamthil zeimawzat kan chuh hna. Hi i kahdohnak hi March 29 in April 9 tiang a rau tiah an rak thanh ve.

Bilin Peng Ah SAC Ralkap Camp Kah An Kah, SAC Ralkap 3 An Thi. Bilin peng Laykaegaw khua SAC ralkap camp cu nizaan April 13 zinglei ah kan kah tiah KNLA brigade 1 in tuanvo ngeitu nih a chim. Laykaegaw SAC ralkap camp cu KNLA, KNDO le PDF phufonh nih hriamngan le hriamhme hmang in an kahdoh hna i SAC ralkap 3 an thi hliamtuar mi zong an um tiah theih a si.

“KNLA phufonh nih RPG, 79 mm leng ah hriamhme hmang in SAC ralkap umnak camp pawnhkam tiang kalhnawh in kan kahdoh hna, mizapi vengtu ralkap phufonh lei hliamhma tuarmi kan um lo” tiah KNLA brigade 1 in tuanvo ngeitu pakhat nih a chim.

KNLA phufonh nih an kah hna caah kaphnihkar hriamngan le hriamhme hmang in kahdohnak a chuak. Kaphnihkar kahdohnak ngol a si hnu ah SAC ralkap hna nih Laykaegaw khuachung checkhlatnak an tuah tiah tualchung mi nih an chim.

SAC Nih A Tuah Ding Mi Thimnak Ah Ramkhel Party Pawl Lut Lo Ding In NUG Acting President Nih Forhfial. Ramkhel party pawl cu SAC nih a tuah ding mi thimnak (election) ah i tello ding ah National Union Government( NUG) Acting president Duwa Lashi La nih forhfial nak a tuah.

Cu forhfialnak bia cu April 12 ah tuah mi NUG a voi 50 nak tonbiaruahnak ah a chim mi a si. SAC nih tuah mi election cu mipi hna nih an cohlan khawh lo bang ramkhel party pawl nih duh ding a si lo tiah a chim. SAC nih anmah an duhning khua an khan mi le dingrep an i ser mi tang ah an tuahding mi thimnak hi zeitihmanh in i tluk rualnak le a dik mi a si kho lailo tiah NUG acting president Duwa Lashia La nih a chim.

Cu leng ah NUG cozah lei zong nih convention paragraphs 1 le 2 ah aa tel mi political goals and objectives, roadmap he aa tlak in NUG cozah nih NUCC, CRPH, EAOs hna le ceihmai nak kan tuah tiah a chim. NUG nih tuah mi ton biaruahnak ah Ministry of Defense kumkhat tlinnak report an pek mi kong, CDM cozah rianttuan pawl CDM Bond pek ding mi pawl kong an i ceihmai tiah theih a si. Credit: The Chin Post