Pi Minn Myint Nan Tin nih “Tutan cu Kawl ralkap an i palh” timi

A.D 1988 sandahpiah ah a rak i tel vemi, Pi Minn Myint Nan Tin nih “Tutan cu Kawl ralkap an i palh” timi tlangtar in ca a ttialmi ka rel i ka mitthli a tla dengmang. Amah nih tutan ah ralkap uknak kan tei khawh nakhnga a herhmi thil phunli a um a ti. Cu phunli kan tuah khawh ahcun teinak cu kan hmuh hrimhrim lai, tinak khi a si.

1. International communities dihlak biatak tein dohnak rian ttuanti a herh: Hihi kan tlinh ngaingai cang ti khawh a si. Kawlram mi nih vawleicung ram zakip ah duhlonak kan langhter dih cang lengah UN, ICJ le ram tthawng tampi an kan dohpi cuahmah ko cang.

2. Civil disobedience campaign tiah auhmi ram chung cozah rianttuantu hna nih an rian pehzulh lonak hmang in duhlonak langhter a herh: Hi zong hi nihin tiang ah tam ngaingai hmuh a si cang. Tam deuhpi hmuh rih ding in ruahchan a si rih. A tling cuahmah cangmi pakhat a si ve.

3. Nationwide Demonstration timi ram pumpi hmun zakip ah mipi nih duhlonak langhter dih ding: Hi zong hi kan tlamtlinh cangmi ah a cang. Khuaruahhar Kawlram pumpi ah mipi nih duhlonak an langhter cang.

4. Resistance within the army tiah a ti i anmah ralkap/palik pawl chung in duhlonak langhternak fakpi in a chuah a herh: Hihi kan tlinh khawh deuh rih lomi, a tangmi te cu a si. Nain atu ah duhsah in tlamtlin hram aa thok cuahmah ve cang. Kayah State palik hna nihcun a buu in Ralkap uknak duhlonak an langhter ve cang khah. Hi zawnte hi fakpi in a karh i anmah uknak laatu ralkap/palik hna lakah fakpi in lung i khahlonak le duhlonak a langh ahcun, cucu kan teinak theipar a hun chuahtertu a si lai, ti hi kan ruahchannak ngan bik a si.

Fakpi in, ralkap/palik lakah duhlonak langhtertu an karh i cozah rianttuantu vialte nih an rian an ngol ngam dih tinak hnga, thlacam hna u sih! Credit: Pastor Hram Bik Lian