VSAC Ralkap Hirampi Ruang ah Hmunlai ah Chinmi Pahnih an Nunnak a Liam Ṭhan. Nihin February 22, chun sml. 12:00 hrawng ah Kalaymyo SAC ralkap nih Hmunlai sang lei ah hriampi an kah caah tualchungmi nu pahnih an nunnak a liam, tiah kan theih.
A nunnak a liam mi nu pahnih cu Pi Cing Khawl Kim (Kum 29) le Pi Cing Khawm Vung (Kum 48) an si i, a dang khuami pahnih zong hliamhma an pu.
Nihin zinglei zong ah Tahan ah SAC ralkap nih kum 40 hrawng a si mi tualchungmi pa pakhat thi lak in an kah. Nizaan zaan sml. 7:30 luan hrawng zong ah khan SAC ralkap nih an kah mi hriampi cu Hmunlai sang ah a tla i, minung 3 an nunnak a liam cang.
Nizaan February 21 zinglei in Kalay peng chung ah Chin hriamtlai, PDF le SAC ralkap karlak kahdohnak a chuak i SAC ralkap nih khuate lei ah hriampi an kah len. Nihin zong ah pehzul in an kah, tiah tualchungmi pakhat nih a chim. The Hakha Post
Thawngpang dang: February 20, ah thok in Magway ramṭhen, Gangaw peng khua 3 ah ngakchia 200 tluk cu raise zawtnak nih a tlunh hna tiah tualchungmi hna nih an chim.
Gangaw peng, Hteihlaw khua ah minung 50 tluk, Kyaw ah 50 tluk, Larpoet ah 80 tluk ngakchia hna cu raise zawtnak nih a tlunhhnawh hna tiah theih a si.
Raise zawtnak nih a tlunhhnawh mi hna hi kum 3 in 15 karlak ngakchia deuh ansi hna tiah tualchungmi pakhat nih FRA ah a chim.
“A tubantuk zawtnak hrik hi cuhlan zongah a rak um tawn nain, kum fatin in a chuakmi zawtnak a si lo taksa bo naak in aa thok i zawtfahnak nih a zulh colh hna ni 5 rauh hnu lawngah a mah tein a tlau ṭhan tawn” tiah an chim. Lungmili Post