Physawthi Hruaitu Ngan Pakhat An Kah Thah Cang!
Laung Lung Ah Physawthi Pakhat Le Palek Pakhat Cu PDF Nih An Kah That!
============
Dawei pengkomh Laung Lung peng chungah kum 2020 ah khan vote tawlrelnak zung cu bomb a puah ruangah thongthlak a tong nain a luat thanmi Physawthi le cuka lei hmunhma controltu palek cu LPDF nih kan kah that tiah cathanh an chuah.
Ta Bawh Seik khua Physawthi hruaitu U Lyi Lyi i hnuzul a si i, kum 2020 ah khan vote tawlrelnak zungpi ahmat (4) cu bomb a puah ruangah thongthlak a tong nain ralkap nih nawlngeihnak a laak hnuah an thlah thanmi, Physawthi a simi Nyi Min Htun (ခ) Kap Pa Lyi cu Laung Lung PDF nih kum 2022 Febuary 23 chun sml 12:30 hrawngah Ta Bawh Seik khua phungki sianginn pawngah meithal in kan kah that tiah an langhter.
Nyi Min Htun cu မဘသ phu chungtel le USDP party chungtel pakhat a si i, nawlngeihnak latu SAC ralhrang nih min a thlenhmi Buesawtyi phu chungtel zong a si. Nyi Min Htun kah that a ton hnuin a ruak cu Dawei ralkap suzung ah an kalpi tiah khuami nih an chim. Cupinah Febuary 23 zanlei sml 5:30 hrawngah Maung Ma Kan hmunhma controltu palek pakhat zong DGRF le LPDF i fonh in kan kah that tiah cathanh an chuahmi ahcun an langhter.
Cuka hmunhma controltu palek Soe Naing Oo cu Maung Ma Kan tlang tumnak khuaram cuannak lampial ah kan kah that tiah an langhter. An kah that hnuah kut kihnak thircikcin, seal cumhnak, pehtlaihnak phone (2) telh in record a tialmi catlap zeimawzat zong kan laak khawh tiah cathanh an chuah hi a si.
Nikhat Chungah SAC Ralhrang 40 Nak Tam An Thihnak Febuary 19 Kahdohnak Cu D4MMR Nih Hmanthlak He An Langhter!
Nikhat chungah SAC ralhrang ralkap 40 nak tam an thihnak Febuary 19 Mube kahdohnak ah SAC ralhrang ralkap rual cu lo chungah a tomtom in an thihnak hmanthlak cu D4MMR nih an langhter.
D4 MMR timi cu Donate For Myanmar Revolutionaris tiin fb account a si. Shan Karenni ramri Wa Yi Su Palaing, Lyi Wei, Wei Te Gu khua ah chunnitlak ti awkin kahdohnak a chuak i, SAC ralhrang ralkap leikap ah bawi telh in 40 nak tam an thih pinah motor 3 an rawk tiah Demosu PDF nih cathanh an chuah bal. Cuni ahcun DMO-PDF pakhat nunnak a liam tiah an langhter chih.
SAC ralhrang ralkap nih Karenni ramkulh Mube cu Febuary 16 thawkin thazaang tam taktakin kahdohnak a tuah i, Phekhung peng chungah Febuary 18 thawkin kahdohnak an tuah bantukin Demosu peng zong Febuary 21 thawkin kahdohnak an tuah. SAC ralhrang nih vanlawng siseh tank siseh hriamngan phunkip hmangin kahdohnak an tuah hi a si. Mube PDF, KA, DMO-PDF, Loikaw PDF, Phekhung PDF, KNDF, JPDF, KGZ, GZ-21 phu hna i fonh in an kah hna ruangah SAC ralhrang ralkap leikap ah fak tukin an sunghnak a si.
Mube, Phekhubg, Loikaw, Demosu lei kahdohnak telh in cun Febuary 16-23 tiangah SAC ralhrang ralkap 100 leng an thi cang tiah PDF, KNDF cathanh chuahmi ningin theih a si. Mipi vengtu leikap zong 20 leng nunnak a liam tiah theih a si. Kahdohnak hi pehzulh in a fak ngai rih i, mipi vengtu fonhmi phu nih fak tukin an tei deuh hna tikah SAC ralhrang nih vanlawng hmangin kahdohnak a tuah nain an sungh thiamthiam hi a si.
Monywa Hrambunh Monywa Nightking Phu Hruaitu Cu Kahdohnak Ah Nunnak Liam! Monywa khuapi hrambunh Pyauh Kyar phu hruaitu Bo Nge Lyi (ခ) Htun Htun Win cu Febuary 22 nitlak chaklei hmun pakhat kahdohnak ah a nunnak a liam tiah Monywa Knightking nih cathanh an chuah.
Febuary 22 ah Kanmah Monywa Nightking i phu hruaitu Bo Nge Lyi (ခ) Htun Htun Win (Blaki) cu nitlak chaklei hmun pakhat kahdohnak ah a kan liamtak timi kan in theihter hna tiin Monywa Knightking nih cathanh an chuah. Hruaitu bik nih a kan liamtak tikah atu ahcun Monywa Knightking cu Bo Nga Chik nih pehzulh in a hruai hna lai tiah theih a si.
Ram caah nunnak a liamtu Bo Nge Lyi (ခ) Ko Htun Htun Win caah upatnak sen kan pek i, thildang kong cu dohthlennak kan hmuh hnu lawngah cathanh kan chuah te lai lai an langhter.
Matupi Palek Sakhan In Palek Pakhat Cu Hriamnam He CDF-Matupi Sinah Fonh! Chin ramkulh Matupi palek sakhan ah a ummi ralkap level pakhat simi Htet Wai Zaw cu amah tlaihmi meithal he CDF-Matupi sinah aa fonh tiah theih a si.
Febuary 23 ah cuka lei hmunhma controltu palek Htet Wai Zaw amah pumpak number လ-၂၇၆၃၀၉ nih G3 meithal zuun khat, kuanfang zeimawzat he CDF-Matupi sinah aa fonh. Febuary thla tiangah CDF-Matupi sinah aa fonhmi palek le ralkap zat hi (11) an um cang tiah theih a si. Credit: The Federal Times