Peter Thian Bawm Sang Telh in Minung 3 Kalay Thonginn ah an Kalpi Hna

Peter Thian Bawm Sang Telh in Minung 3 Kalay Thonginn ah an Kalpi Hna
———–
Hakha SAC ralhrang nih an rak tlaihmi hna CDM palik pahnih le Peter Thian Bawm Sang cu nihin zaanlei sml 3:45 hrawng ah Helicopter in Kalay thonginn ah an kuat hna, tiah chungkhar sin in thawngpang kan theih.

Peter Thian Bawm Sang hi aluancia March 8 ah khan Laipawnglung ah an ra tlaih i pohma 505 (a) in taza an rak cuai hnu ah kum 3 thongthlak ding in bia an rak chahpiakmi a si. District biaceih zung ah biaceihnak tuahpiak nolh ding in chungkhar nih an hal (appeal/အယူခံ) i, biaceih nolh ding in nicaan zong an khiah cang ko nain nihin ah Kalay lei ah an kalpi diam hi a si.

”Ta Sang cu kum 3 thongthlak ding in bia an chah ciami a si. Mah kha District biaceih zung ah biaceih nolh ding in kan luh lio a si i, October 8 khi biaceih zung kal ding a kan timi a si. Asianin, tu zaanlei ah khan Helicopter in Kalay lei ah an kalpi an ti,” tiah Peter Thian Bawi Sang chungkhar nih The Chin Journal ah an chim.

Kalay an kalpi hlan deuh ah chungkhar nih palik sakhaan le Rungtlang (266) sakhaan zong ah an vung kal nain luhnak nawl an rak pe hna lo. “Kan theih bak in palik sakhaan ah kan kal ko nain kan tong manh ti lo. 266 ah an kalpi cang an ti i, kan va zulh. Kan phanh cun luh a ngah lo an ti.

Asinain, kan hngah rih. Gate ah COVID-19 an check dih hnu, an kalpi lio ah a lang in kan hmuh i kan kut lawng kan zah ta manh,” tiah a chim chap. Peter Thian Bawm Sang hi Yangon ah a ummi a si i, sianginn a dih hnu ah Hakha ah rian a ttuanmi a si. SAC nih ram uknak an chuh hnu, kan Laitlang chung tlaih a tong hmasami hna lak ah aa telmi a si.

Thantlang Peng Hmun Kip ah SAC Ralhrang Helicopter aa Chawk. Nihin zinglei ah Thantlang peng, Zophei tlaang lei ah SAC ralhrang helicopter aa chawhvah lenmi khuami nih an hmuh hna. “Zinglei sml. 10:30 hrawng ah Hriphi khua Van ah a zuang i Vuangtu lei ah a lan.

Vuangtu SAC ralhrang sakhaan zong ah ttum loin Tikir lei ah a zuang,” tiah khuami pakhat nih a chim. Ngiathlainak tuah in Thantlang peng chung ah aa chawhmi a si lai, tiah an zumh.

SAC Ralhrang nih Pu Ral Tu an Kah, a Nunnak a Liam. Nihin zaanlei sml. 6:30 hrawng ah Thantlang khua upa Pu Ral Tu (kum 73) cu Thantlang khuachung ah SAC ralhrang nih an kah i a nunnak a liam, tiah thawng kan theih.

Pu Ral Tu telh in minung 5 cu Thantlang khualuhnak pawng lei Pu Aung Bu innhmai ah meithal in kah an ton hi a si.
“Pu Ral Tu te hi Hakha ah an rak ra i Thantlang khua hi mahti chuahtak thai cu a si kho lai lo. Thantlang khua kan hlumh tthan khawh nakhnga Hakha zong nih na kan bawmh lai tiin biaruahnak a rak kan ngaih.

Thantlang lei an tlun tthannak ah meithal in an kah hna hi a si,” tiah nihin ah Pu Ral Tu te he aa tongmi Hakha upa pakhat nih The Chin Journal ah a chim. Pu Ral Tu cu Hriangkhan khuami a si i, hlanlio biaceihbawi a si. Atulio Thantlang khuapi zong ah pacan ah bochanmi a si.

Thimnak ah USDP in a rak i cuh balmi Pu Zo Peng zong a lu ah an hliamh ve nain nunhim in a um. Pu Lawm Bik, Pu Than Heng le an motor mongtu cu an him hna. Thaizing ah Hakha lei kan pastorte nih Pu Ral Tu ruakthlaknak Thantlang ah an vung tuah te lai.

Hakha ah Minung 17 an Tlaih Than Hna. Updated – Nihin chun ah SAC ralhrang nih Hakha khuachung hmun tampi ah checknak an tuah i minung 17 an tlaih hna, tiah thawng kan theih.

Tlaihmi 17 lak ah kum 75 tar le kum 15 a simi ngakchia zong an i tel. Cun nu pakhat zong aa tel. Atu ca kan ttial tiang ah ahohmanh an thlah rih hna lo. September 25 zinglei zong ah khan Hakha ah minung 6 tlaih an rak tong cang.

Hakha Khuachung Hmun Thum ah SAC ralhrang nih Cheknak an Tuah. Nihin zaanlei sml. 1:30 in Hakha khuachung ah SAC ralhrang nih michawklet an check len hna. Cherry lam, Kohkun lam tthan le BOC hmai in an check hna i abikin an phone an checkpaik hna. Motorcycle toolbox zong an kau i an check dih hna.

Check a tongmi pakhat nih, Kan pum zong a kan dah dih. Zei tuahmi na si? Khoika na kal? a kan ti i ka phone chung hmanthlak pawl an zoh,” tiah a chim. Credit: The Chin Journal