Pathian Riantuantu Chungkhar Nih Satan Party An Dirpi Cu Thinlung A Tap!

𝐏𝐚𝐭𝐡𝐢𝐚𝐧 𝐫𝐢𝐚𝐧ṭ𝐮𝐚𝐧𝐭𝐮 𝐜𝐡𝐮𝐧𝐠𝐤𝐡𝐚𝐫 𝐧𝐢𝐡 𝐒𝐚𝐭𝐚𝐧 𝐏𝐚𝐫𝐭𝐲 𝐚𝐧 𝐝𝐢𝐫𝐩𝐢 𝐜𝐮 𝐭𝐡𝐢𝐧𝐥𝐮𝐧𝐠 𝐚ṭ𝐚𝐩!
=====================
Democratic Party na vote ruangah, na dirpi ruangah, na ṭanh ruangah teinak le sunghnak an hmu ti kha biapimi asilo. Na tuahmi cungah le na min aatelmi cung ahkhan aa hngatchanmi le abiapimi cu asi. Joe Biden nih Trump atei lai i President asilai hi October thla ah Bawipa nih a ka hmuhsak cang. Asinain Joe Biden ka ṭanh duh lo. Ani thla tlin hlan lo cu Biatak ka dirpi peng! Cucu sungh le awn ruangah siloin Bawipa bia ka dirpi caah asi. Ka ṭanhmi an sung lai ti theih ko nain rawlulh tiang in U.S ram caah thlacamnak ka ngei. Cucu Bawipa fialmi asi caah asi.

Joshua nih Isreal miphun kha ral an tuk dih in Canaan ram an luh ahkhan hitihin bia acah hna. “Nan rak thlawh lomi ram le nan rak sak lomi khua hna kha kan pek hna i khika ah nan um; nan phun lomi mitsur ruang le oliv dum theitlai kha nan ei. Cucaah atu cu Bawipa kha ṭih ulaw, amah rian kha lungtak te le zumhawktlak tein ṭuan tuah u; Tiva khattelei ral le Izipt ram ah nan pupa hna nih an biakmi pathian hna kha hlaw hna ulaw, Bawipa kha bia tuah u.
Cun Bawipa biak kha nan duh lo asi ahcun nihin ni ahhin nan biak ding cu ithim u; Tiva khattelei ral ram ah nan pupa hna nih an biakmi pathian hna maw, asiloah, an ram nan umnak asimi Amor mi pathian hna dah nan ithim lai; “kei le kan innchungkhar tu nihcun Bawipa kha kan biak ko lai,” tiah ati” ‭(Joshua 24:13-15‬).
‬‬
Kannih Chinmi U.S ram ah Bawipa dawtnak thawngin kan phan i, mah nih saklomi, mah nih tikhor cawhlomi ramṭha ah kan um i sianginn ṭhaṭha ah fimnak kan cawng, company ṭhaṭha ah rian kan ṭuan. Business tampi kan tuah i, chawva tampi kan hmu. Asinain kan nun siarem hnucun Pathian kan philh i kan kaltaak! Kan Biaknak hi lenglei lawngin kan itlaih cang i Biatak kan kaltaak cang!

Abikin Pathian aiawh in bia achimtu hna, Bible bia ahrinhfianhtu hna, Pathian sal ka asi tiah aa timi hna, Pathian rianṭuantu hna, Bible bia aa tlaihmi hna, zungzal nunnak le zungzal thihnak kong achimtu hna, Bawipa duhnak le duhlonak acawnpiaktu hna, Bible Sianginn kai i degree sangsang alami hna nih Bawipa nawlbia le Bawipa duhnak kan hlawt hi thinlung aṭap bak ko!

“Trump nunning ziaza, amah pumpaak remlo ruangah, abiachim umtu huat ruangah le party ṭanh ruangah” Pathian duhlomi, sualnak asimi le Bible he aa kalhmi party tu an ithim deuhmi hi Chin miphun Khrihfa kan thihnak hrampi pakhat asi. Bible ah Pathian nih ahuattukmi sualnak le dantat zungzalmi sualnak “Same-sex marriage (palepa iumh, nulenu iumh), Abortion, child sacrifice, kill the embryo or fetus (nau thah, fasem thah, minung nunnak lak, lainawn), LGBT ( taksa duhnak le sual tuahnak caah ningcang loin hman)” vialte an dirpi le an ṭanhmi hi angaingai ti ahcun Pathian an doh asi. Pathian adohmi cu Satan asi zungzal caah Satan aiawh in biachimtu, Satan pennak kauhtertu, Satan Bawi iser i, Satan party an si tihi fiangtein alang.

Jesuh Khrih nih atimi cu “Bawipa, Bawipa aka timi paoh hi zungzal nunnak chungah an lut dih lai lo. Pathian duhnak tuahmi hna lawnglawng an lut lai” (Matthai ‭7:21‬) tiah ati. “Zeicahdah nannih nih, ‘Bawipa, Bawipa,’ nan ka ti len ko i kan chimhmi hna cu nan tuah ṭung lo? Ka sinah ara i ka bia angai i azulmi cu zei he dah aa lawh ti kha kan hmuhsak hna lai. Amah cu inn asami bantuk asi: thuk piin acawh i ahram kha lungpi cungah abunh. Tiva cu ahung lian i inn cu ahun den, sihmanhsehlaw fektein sak arak si caah ahninh in ahnin kho lo. Sihmanhsehlaw ka bia athei i azul ṭunglomi cu ahram ṭhatein ser hmasa loin inn asa menmi bantuk asi; tilian nih cu inn cu ahun den tikah chikkhatte ah apur i atlu ruangmang ko,” ati (‭‭Luka 6:46-49‬). Kan tilian hi zeidah asi ti kan hngalh awk asi. Pathian rianṭuanmi nih Pathian duhlomi dirkamh le ṭanh hi Pathian salṭha, Pathian caah zumhawktlakmi cu asi hrim lo. Pathian le Bible bia nakin fimthiamnak, chawva, inuamhnak, vawlei kalning le minung duhnak nih an nun a uktuk deuh caah Biatak le Dinnak hi an hlawt tihi hmuhkhawh asi.

President Trump pumpaak huat ruang hmanh ah Pathian le Bible bia an hlawt ahcun vawlei harsatnak atlun tikah siseh “The Great Tribulation (vawleicung hremnak fakbik)” arat tik ahcun Khrihfa ka si aa timi nih Jesuh Khrih ahlawmi an tamtuk te lai. Khakha Thiang Thlarau in an hrinṭhan taktak lo caah asi. Dawtnak kan ngeihmi hi Pathian bia lo ningin asi sual maw ti ruah ahau. Miphun dawtnak (refugees) cungah dawtnak kan ngeihmi hi Pathian duh lo ningin asi sual maw ti ruah ahau. Fimthiamnak le chawva kan duhmi hi Pathian duh lo ningin kan kawl sual maw ti ruah ahau. Pathian doh le Bible he aa kalh tiangtiang in dawtnak kan tuah i adiklomi le sual asi.

Hi bantuk Satan Party asimi Pastors umnak Khrihfabu le khua zoh tikah mipi zaangfaktuk an si. Minung zeizat nihdah ahnu an zulh hnga. Cun abikin hlen fawimi mino tete hrim khi ruah ah zaangfahtuk an si. Taksa le chawva lei cun an inuam i, an ṭhangcho ko lai. Asinain an thlarau cu hmuihnak lamlei apanh cuahmah. An thinlung mit a caw cuahmah! Cucaah atu kan chan ahhin kan ram kan miphun caah daithlaan awk kan ṭha lo. Bawipa sinah thlacam lengmang ding kan si.

Cucaah tuni ah ahopaoh kan si ah Bawipa sin ah kan sualnak ingaihchih hna usih! Bawipa cu thinlung dihlaktein akawlmi hna cu zeibantuk sualnak zong kha angaihthiam ko hna. Kum 4 chunghi taksa le thlarau idonak ral tampi a tho lai. Thlacam zungzal usih! Credit: Pastor Vanneilian