Pathian nih Bawi Zisuh Khrih le US ram a hman ning hna

Pathian nih Bawi Zisuh Khrih le US ram a hman ning hna
—————————————–

Pathian nih vawlei ah dinnak, daihnak, le remhnak um seh ti a duh caah a fapa neihchunte cu khamhtu caah a kan pek. Taksa lei le thlarau lei khamhtu caah Bawi Zisuh a kan pek lainak kong cu prophet Isaiah a phuanter chung. Mah cucu Isarel miphun nih phundang piin Pathian I a timhmi le a tinhmi cu a sullam an I lak. Annih ruahnak ah Pathian nih a van thlah lai dingmi Messiah cu kanmah calawng ah a si lai I Rom cozah uknak ttha lo kuttang in a kan luatter lai I kan pu David nih a kan uk lio I nuamtuk in kan rak um bantuk khan a kan uk ve lai tiah an ruah/a kan tuahpiak lai tiah an ruah. Cutik ah an ruah ning bantuk in a si lo tik ah Bawi Zisuh cu kalvari vailam ah an tah/an thah I atutiang Bawi Zisuh cu vawlei khamhtu messiah ah an cohlang kho lo I messiah dang cu an hngah peng rih ko nak a si. Isarel miphun cu Khrihfa zong an si lo I Judaism biaknak a zulmi/a pommi an si. Bawi Zisuh cu Isarel miphun ca lawngah siloin vawlei cung mi vialte caah a ra. Mah lawng hlah, anmah Isarel miphun hmanh kha ramkip le miphun kip sinah va kal u law ka zultu ah va ser hna u, va cawnpiak hna u law Pa le Fapa le Thiangthlarau min in tipilnak va pe hna u a ti lehlam hna/a fial lehlam hna. Khrihfa a simi kanmah zong fial kan si ve.

Cuve bantuk in US ram hi Pathian nih vawlei cung ramkip le miphun kip caah a sermi ram a si. Cucu missionary tambik a thlahtu a sinak le ram sifak kip a bawmhnak hna le ram buaimi vialte a remh dih hna nak nih a langhter dih ko. Chim duhmi cu US ram hi Pathian nih Khrihfa mi ca lawngah a sermi a silo, thlua a chuahmi a silo I a hmanmi a si lo. Na pom lo ahcun US cozah thiltuahmi vialte khi zoh law na fiang ko lai. Musalim ram, Buddhist ram le Khrihfa ram tampi a buaimi vialte tamtuk a remh hna/a daihter khawh hna. Musalim ram, Buddhist ram, le Khrihfa ram tampi le miphun kip nih harnak, rawhralnak, sunghzatlaknak an tong caan ah hehtiah a lamkip in a bawmh hna. Ram sifak tamtuk a bawmh hna. Khrihfa ram le khrihfa a simi miphun lawng a bawm hna lo. Kokek rawhralnak (natural disaster) an tong caan ah a bawmh dih hna, thleidannak um lo tein. President hlun Bush zongnih a rak chimmi cu US cozah hi nan sualtuk nan kan ti nan vawlei cung ram vialte lakah khoika ram dah tlawng na duh bik tiah in hal hna u sih law US ram tlawng nan ti dih ko lai a rakti bel. A nolh rihmi cu ramkip nih harnak le buainak a phunphun nan tong caanah Washington DC lengmang bawmh nan rak hal I nan rak chawnh a ti. Mosco (Russia ram khualipi bik) le Beijing (Tuluk ram khualipi bik) bawmh nan hal bel hna lo a rak ti. A hman tuk. Pathian nih vawlei cung ramkip le miphun kip caah a sermi, thlua a chuahmi, a hmanmi US ram cu Khrihfa mi nih kanmah kuttangah chiah kan duh I kanmah nih duhpoh in uk le tuah kan duh. Kanmah calawng ah hman kan duh. Pathian nih mizapi caah a sermi le a dirhmi a si kan I fiang lo. Khrihfa kan tambik ruangah mah lungput cu kan neihnak zong a si ve ko lai. Asinan atu cu rangtuk in Khrihfa milu an zor. Pew Research nih hlathlainak an tuahmi kan zoh tik ah zatuak 70 hrawng lawng Khrihfa kan si. Biaknak a nei lomi pawl rangtuk in an karh tuk. Mah pawl hna khi Khrihfa nih hehtiah khamhnak thawngttha kan va chimh hna ding a si. Missionary kan va thlah hnawh hna ding a si. Laimi US ummi zongnih mah cu kan tuah awk asi. US ram cu Pathian nih vawlei pi le ramkip le miphun kip vialte caah a sermi a si I thlua a chuahmi a si, a hmangmi a si. Refugee zong musalim, Hindu, biaknak dangdang, biaknak nei lo, le Buddhist zong tampi a lak hna. Khrihfa refugee lawng a la hna lo. Mah zong hi kan I fiang awk a si.

Aluancia kum 20 lioah keizong US ram kongah khua fak ngai in ka rak ruat bal ve. US ram hi ziah thla ramkip a buaimi kongah hin a va I thlak lengmang hnga, ziah thla ramkip cungah hin nawlneih a duh hnga ka ti ttheu. Ahohmanh nih le nawl an pe fawn lo I an fial fawn lo ka ti tawn. Ramkip buainak ah a va I sawhkalh peng. Mah vialte cu tuak tik le zohtik ah Pathian nih a tthawngbik le a rumbik a si ruangah a hmanmi a si ko ti ka fiang. Ram tampi buainak a daihter hna I ram tampi sifahnak in a luatter hna I ram tampi uknak ttha lo kuttang in a luatter hna/a chanh hna. US ram cu Pathian nih Khrihfa ca lawngah a hmanmi a si lo, vawlei miphun kip caah a sermi ram a si. Cubantuk in US cozah phunghrampi zong mi zapi ca a ttha ding in an ser ko lai. Khrihfa calawng in an ser lai lo. Bawi Zisuh zong Pathian nih Isarel miphun calawng ah a van thlahmi a silo, vawlei miphun kip caah a van thlahmi a si. Cucu amah Bawi Zisuh nih fiang tein a chim ko “Mi Fapa hmanh hi, rian ṭuanpiakmi si awkah ka rat ṭung lo, midang rian ṭuanpiaktu si awk le mi tampi tlanhnak ding ca i ka nunnak pek awkah pei ka rat cu, tiah a ti hna” (Marka 10:45). A tak te ti ahcun kanmah Khrihfami hi fawh vawlei miphun kip le ram kip caah kan I hman awk a si I daihnak, dinnak, le remnak a sertu ding lehlam kan si ve cu. Vawlei pi nih harnak, din lonak, buainak le sifahnak le I thleidannak a phun2 a tonmi hi kan I hrawm ve I kan doh I kan hrawh ding lehlam tuk a si. Cucu Pathian nih a kan duhpiakmi a si I a kan tinhpiakmi zong a si fawn I a kan fialmi zong a si fawn.

Theihawk: Bawi Zisuh Khrih le US ram hi pehtlaihnak ka neihter lo/ka tuah lo. Pathian nih a hmanning hna kha ka chim duhmi a siko. Micheu khat nih tuan I ka rak catial ciami kong zongah nan I fiang tawn lo. Mah ruangah ka va fianhnak a si. Dinnak, daihnak le remnak vawlei ah um ko seh. Credit: Saya Van Tum

Leave a Reply

Your email address will not be published. Required fields are marked *