Pathian Min In Arami CNA/F Vs. Anawratha Min in Arami Min Aung Hlaing Ralhrang!

PATHIAN MIN in Arami CNA/ CDF vs. Anawratha minin arami MAH le Kawlte Ralkap: PG78
==============
Myint Aung Hlaing theih ve cang tuah! Zei fa dah nasi hlei? Nanih cu Anawratha le Godama min in pei nan rat ko cuh! Kan nih CNA/ CDF cu nan zawntaih i, nan thlanglamh mi, zeite ah nan rel lomi, nan cil nan chak mi, Hnap le Khah tiangin nan bungh hnawh mi, Vancung Pathian, Ralkapbu Bawipa min in kanra. An Cihmih nan duh mi, Krifa le Krih Jesuh min in kanra cang. Krih kha na zawmtaih khawh ti lonak hnga, nan cihmih awk ah, Bawipa Ralkapbu, Vancungmi hna he kanra cang ko hi!

MAH cu Russia, Tuluk, Ukraine le India in a cawkmi, Hriam Ṭhabik in Chinram hrawk awk ah ara. Jet Fighters, Helicopters, Motor Ṭha Ṭha, Tanks, RPGs, Miakpi, meithal Ṭhabik hna he anra. Russia le Pakistan ah Tidan Ṭhabik in adih cang mi, ralkap thiamsang hna he an ra. Ahohmanh nih nainiam ngam lo le hmuhmi poah kahthat in Ṭhawlh dih awk ah anra cang.

Kannih CNA/ CDF cu Pathian bochan in le Bawipa hruainak in kanra. Pathian Hriam Ṭhabik Chin Mipi thlacamnak he raldoh awk ah kanra. Pathian nih kutput Hriam an kan pe mi cu: Ruahti, Minmei, Khuaingal, Tuuki, Tlakum, Rial, Ṭhaiṭolh, Chai, lung takep, Khacer Luro, tbk ansi.

Hi hna hi Ralkapbu Bawipa i Ralkap ansi tawn. Tidan a kai ballo mi Thinghmuihma ngei mi (4), uico bang tidin zia hmanh a thiam lomi, Gideon Ralkap btkin kanra phawt ko hi! Vawleipi tuanbia ah a ṭhawn bikmi Pennak le Ralkapbu kip cu, cung lei Hriam hna hmang in, Pathian nih a thluk cikcek tawn hna. Nihin tiang a tlaulan mi zong an um.

Chinram cu ki nga in dum in, Arbawm chung Arpi le Vok kawm chung vokhrial btkin tlaih nan kan timh! Kalay – Tedim – Tonzang – Tio, Kalay – Falam – Rih, Kalay – Hakha – Ttl – Tio, Gangaw – Thilin – Mindat – Kanpelet – Matupi – India ramri, Paletwa – Samit – Lailenpi – India ramri tbkin Sakhi khan dum in nan kan kulh ko. Nain kan zeipoi hlah. Nan thih dihnak tu si lai.

Chinram ah CDF kan khat dih cang caah MAH ralkap caah hmunhma a lawngkanmi aum tilo. Hmunkip um Pathian (Omnipresence) nih a vancung mi he Chinram cu chunzan din loin an ven i an khumzual. Chinmi kip nih vawlei kili in Thlacam nak he humhak mi ram asi fawn.

MAH Ralkap le Chin Ralkap muisam hi epchun ah kantei tuk ngamsam hna caah ngeihchia lei khi asi, Pathian le Mipi thawng in. Pathian nih kan kaa ngaithiam hram seh.

Nannih Kawlte Ralkap cu Satan min put in Anawratha min in nanra. Krih tlangthiang kha nan thurhnawmh, nan ek hnawh, nan zun hnawh, cil nan chak hnawh. A Thianghlimmi Krih Pulpit cu Zudinnak nak cabuai, kheng le todan ah nan hmang. Pathian Inn kha nan thurhnawm i, Siasal biaknak, khuachia biaknak le rimhmui khanghthawinak ah nan hmang i, mithah lainawngnak Center/ HQ ah nan hman, nan va poi tuk hrinhran dah! An siamtu na Pathian kha na zuam cawh, na volhpamh i, na voih hnawh cang.

Pathian fapa Tuukhal le Khuanu/pa, Upa hruaitu hna cu: zalam tlang ah rilkoin na thah hna, Nitlang napho hna i, an thisen cu uico pawl na dangh hna. Pathian fale Khualipi le Innlo cu, aruang umloin, mei na duah i, Khuapi mi cu na ṭhawlh dih hna. Bawipa Inn le a khualipi cu khuarawp ah tuah naa timh!

Cu vialte kan phuhlam awkah Pathian nih CNA/ CDF cu na sin ah hung thlak mi kansi hi! Kakawi MAH! Na zawntaih mi Kan PATHIAN nih nang le na minung hna an hrawk cikcek hna Ni kha ara lio, atu hi a phan cuahmah cang. “TEIRUL CHAMTU & PHUHLAMTU cu KEIMAH KASI” tiah Ralkapbu Bawipa nih ati. Cu Bawipa min in ara i, an pawnchuak dingmi CNA/ CDF kansi Kawi Aung!

A Miphun le a Krifa DAM cikcek cang awk ah, Sal sinak in luatter awk ah, Zion ah lung kuai mi hna hnemh awk ah, hremhmi hna luat awk ah le Chanchuah awk ah, MAH le aralkap cihmih awk ah, Pathian ram le a Miphun zalonnak caah, Vancung Pathian asimi Ralkapbu Bawipa nih thlah mi CNA/ CDF kansi.

Cozah Rianṭuan Mi Bang CDMers’ Mipi: PG76. Ralhrang MAH le SAC cu mipi nih phun (4) in kandoh hna. (1) Legitimacy Strike – Cozah si i zuamnak (2) Law Strike – Upadi i zuamnak (3) Community Strike – mipi dothlennak (4) Armed Force Strike – Hriamnam Dothlennak.

Lambar (1) le (2) hi NUG ṭuanvo an si. 3nk hi Mipi le Cozah rianṭuan kan ṭuanvo asi. Ngunkhuai (Tax) pek lonak in, Mipi CDMers nak cu mui a cuang. 4nk hi GZ ṭuanvo asi i CDF/ PDF mui an cuang ve. EAOs timi Tlangcung Ralkapbu hi Van Gabriel Ralkapbu btkin 4nk caah Biak in Bochan mi asi. Kawl nih Tupung tiah rak hmuh tawn mi kha Ram dawtu le Phuntungtu ah hmuh an si ve cang.

Mipi dothlennak cu Sandah piah, Tax peklo, SAC Sermi upadi zulh lo, MAH upadi le a cozah kha cohlan loin hnawn kha asi bik. Mipi nih Mei man ngunkhuai peklo ruang ah Thla (1) ah MMK 20000 Millions leng MAH nih a sung cikcek ve. Ngunkhuai dang cu um rih ko seh. SAC rian thar a sawk mi Chinmi cu 0% asi. Mipi CDM a hlawhtlin bak ko. Tcn: Kei zong ka rian ṭhing ah ka kir ve ti lo.

UN rian tampi a lawng ko. Ka sawk ve lo. Mipi he harsat tu kaa thimh deuh ve. Cucu Chinmi nih CDMers ah nan ka pomh kho ve hnga maw! ti ka ruah ve tawn. Sipuazi zong ka tuah ve lo. Adongh tiang mipi he Raldoh ṭi ding in stand by in ka um zungzal ko. Dawttu le Dawtmi Chinmi nih Nihin tiang an ka cawm ko. Tirawl loin ka tlau bal lailo i rawl loin ka vak bal lailo ti kha fiang tein ka hngalh. Sihmansehlaw “Ka Zumh Mi Kha Ka Hngalh” timi Pauline Philosophy kha!

Mipi le GZ cu kan rian hi lim btk in thil a kal. Achan cu hi hlei in, kan ti khawh nak nih, a phahzawh ve ti lo. NUG le EAOs belte an rian le an hmaba an hlawhtlin rih lo. Tampi Ṭanlak a herh rih. Tampi in bawmh le thazang pek an herh rih.

NUG le EAOs pumkhat asikhawh rih lomi hi rianrang in pehtawn a herh ngai ngai. Aruang tampi a um ko lai nain, mipi nih cun EAOs le NUG pumkhat si hi kan duh bik mi asi. An karlak ah tizut hlah seh, pumsa le thlarau bang ṭhen khawh si hlah seh ti hi mipi Saduhthah cu asi. “Ti le Nga” bang NUG le EAOs si hi duhcio mi asi. UN le USA nih EAOs cu a puitlingmi Ralkap ah cohlan nansi nak hi Mipi khumzual le chanchuah nak ah nan hmang lai lo maw?

Geneva, EU, UN, USA nih, CDF, PDF cu, Ralkap puitling ah, an pomh lo tikah, NUG lamthluan ah hlawhtlin nak a puitling lo, ti hi tuak cikcek aherh ko. Dothlennak Lamthluan asau lai. Ni (3) lamkal kha kum (40) arau mi, Moses le Israel miphun, sining kan hluanlo a biapi ngai.

EAOs le NUG cu pumkhat kan si ter khawh lo ahcun, lam pakhat lawng a tang. CDF/ PDF kha EAOs level in cuaithlir a herh ve. Hriamnam, Tindan (Information le Intelligence telin), btkin ralkap nih ngeih a herh mi vialte, USA le Geneva mit ah Ralkapbu Puitling si law law tiang in, zalh piak dih a herh. Cucaah NUG nih CDF/ PDF caah phaisa tam deuh pi in hmang seh. 800 millions hi CDF/ PDF caah hmang in, adang caah fund raising i tuah ṭhan ko seh timi Agenda. Credit: Saya Rung Kaw