Pathian Fale Caah Democracy A Um Lo

𝐏𝐚𝐭𝐡𝐢𝐚𝐧 𝐟𝐚𝐥𝐞 𝐜𝐚𝐚𝐡 𝐃𝐞𝐦𝐨𝐜𝐫𝐚𝐜𝐲 𝐚𝐮𝐦 𝐥𝐨.
================
Jesuh Khrih a zummi, Thiang Thlarau a comi, zungzal nunnak cauk chungah minṭial asimi le Pathian fa sinak a comi hna caah zumhnak ah Democracy aum lo. “Bawipa nih a kan dawt caah sualnak ka tuah peng zongah a ka ngaihthiam ko lai. Ka duhning paoh in ka nung lai. Keimah duhthimnak in ka kal lai. Pathian vel angantuk caah le Pathian cu dawtnak asi caah a ka ngaihthiam peng ko lai” tiah a dawtnak kha caanṭha ilakin sualnak tuahding in kan nun ding asilo. Zeicahtiah kan chungah a ummi hi Thiang Thlarau asi. Akan uktu hi Jesuh Khrih asi. Kan Bawi hi Khrih asi. Kannih cu a sal kan si. Cucaah zumhnak ahcun democracy kan ngei lo. Bawipa duhnak tuhi kan ṭuanvo le a nawlbia hi kan zulhphung asi.

Paul nih Rom khuami hna hitihin ca a kuat hna, “Sihmanhsehlaw atu cu sualnak chung khan luatter nan si cang i Pathian sal nan si cang; nan miakmi cu Pathian sinah pekchanhmi nunning asi i cu nih a chuahpimi cu zungzal nunnak asi” tiah a ti (‭‭Rom ‭6:22‬). Jesuh Khrih nih Peter kha Thiang Thlarau a co tikah amah duhnak in nun siloin Thiang Thlarau duhnak le thawngṭha ruangah a nunnak apek lainak kha hitihin a chimh! “Biatak kan chimh: na no lioah cun nangmah nih na taisawm kha naa sawmh i na duhnak paoh ah na kal tawn; sihmanhsehlaw na tar tikah cun na kut na zao hna lai i midang nih na kut cu an ṭem hna lai i na duh lonak hmun ah khan an in kalpi lai,” tiah a ti. (Johan ‭21:18‬)

Kannih Pathian fale cu Bible nawlngeihnak le Pathian kut tangah a ummi kan si. Pathian fale nihcun Khrih nawlngaih hi kan hmuitinh asi. Thiang Thlarau hruainak in kan nun ding asi. Paul nih Galati khuami ca kuatmi hna cu “Cucaah a nungmi cu keimah kha ka si ti lo, ka chung i a ummi Khrih tu hi asi deuh. Atu i ka nunmi nunning hi, a ka daw i ka ca i a nunnak a pemi Pathian Fapa zumhnak thawngin ka nung” tiah ati. (‭‭Galati 2:20‬). Na chung i a nungmi kha ahodah asi? Ahonihdah an uk? Khakha naa fian ahau. Nangmah duhning in maw na nung? Na chungin a ummi duhning in dah na nung? Cucaah abiapitukmi cu na chung i a ummi kha ahodah asi ti na hngalh aherh! Credit: James Van Nei Lian