Pathian dantatnak asi hnga maw

Pathian dantatnak asi hnga maw: Khrifa zuumtu asimi nihcun kan pawngkam ah thilcangmi tete a um tikah: zeiruang ahdah asi hnga, ti khi zumhnak mit in kan zohchih lengmang ve zong a hau. Thilsining hun zoh tuah usih. Kum 2016 le 2017 chungah Kawl ralkaap kut in a tlawmbik Rohingya 24,000 hrawng an thi lai, tiah UNO nih an zumh. A cheukhat cu an nung na bu-in mei in an khangh hna; an innchung ah tawh hna an hrenh khumh hna ii, mei in an inn he an khangh chih hna. Thihfaak tukin mi tampi an thi.

Rohingya nu-nau (women & girls) minung 18,000 hrawng an tleihhrem hna tiah zumh asi. An nunnak himnak dingah Rohingya million pakhat hrawng Bangladesh ram ah an zaam. Kawl ralkap nih Rohingya miphun cu an miphun ning in thah/hlohhral (genocide) an timh hna tiah, UNO nih a ti. Kawl ralkap nih Rohingya miphun cung ii, an tuahserhnak cu: Kawl mipi, Ralkap le Pi Suh tiang zong in an lung ai rual dih. UNO biaceihnak zung tiangah ralkaap a va dirkamh (defense) hna.

Ralkaap le Pi Suh zong an i dawt lio le hmuhthiam bik lio caan asi. Cu lio ii, ruahlo piin Kawl ralkaap nih uknak an vun laak. Pi Suh telh in ram hruaitu upa tampi an vun tleih ko hna. Khuaruahhar ngai asi. Kan tlaangtaar ii, kan chim bantukin: tulio Kawlram boruak hi, Pathian dantatnak asi hnga maw? Rohingya miphun an mit-thli kha Pathian nih a philh lo ca-ah asi hnga maw? Atulio Kawlram thilcangmi vialte zong hi, Pathian nih a theih dih. Van le vawlei le a chung ummi vialte hi AMAH kut chungah a um dihmi asi. (Note: Rohingya pawl an temtuarnak le pumpaak an tonmi kong (stories) an chimmi tete zong tam ngai te ka relmi um. Tulio Kawlram boruak he ka lung a um ngai ii, biasawngtlorh phun in hmuhning vun ttialmi asi.). Credit: Van N Elizabeth