Pastor John Za Thleng; Thantlang khua an khangh than, nan inn hrawng adihlak in aciam an ti!

January 3, 2022, Thantlang khua an khangh than, nan inn hrawng adihlak in aciam an ti.
========
Minung kan him le kan nun dam a biapi dawhawh! Adikmi uknak le thlennak achuahtu hi abiapi dawhawh. Pathian nih a kan zaangfah lai le kan ram, kan khua, kan inn kan lo cu, Pathian thawng in, kan sakthan te hna lai dawhawh. Nihin kan ram nih kan tonmi thihnak, sunghnak, harnak le kanghuhnak kan ton mi vialte hi Bawipa nih akan theih piak ko. Nikhatkhat cu kan ram thlennak caah santleihnak angei hrimhrim ko lai tiah kai ruahchan.

Hmailei kong ah na thin phang hlah! Abiakam alet ballo tu kan Pathian aum. Mathai 6: 25″Cucaah cun nan nunnak ding ca i nan herhmi rawl le ti kong ah le nan pum ca i nan herhmi hnipuan kong ah lungrethei awlokchong in va um hlah u, kan ti hna.

A ngaingai ti ahcun, nunnak hi rawl nakin a biapi deuh lo maw? Cun pum zong hi hnipuan nakin a biapi deuh lo maw? 26 A zuang lengmangmi va khi zoh tuah hna u: thlaici an tuh bal lo, rawl an ṭuan bal lo, buk zongah an rawn bal lo; sihmanhsehlaw vancung i a ummi nan Pa nih a zohkhenh ko hna. A si ah, nannih cu va nakin nan biapi deuh lo maw? 27 Nan lungre a theih le nan awlok a chon thawngin nan nunnak tlawmte tal a sauter kho deuh mi aho tal nan um maw? 28

“Cucaah zeicahdah hnipuan kong ah nan lungre a theih? Ramlak i a khomi lili pangpar khi zoh tuah hna ngat u: rian an ṭuan lo, hnipuan zong zeihmanh an i tah lo. 29 Sihmanhsehlaw hihi kan chimh hna: Siangpahrang Solomon hmanh kha, kha tluk khan a rum ko nain hi pangpar hna lak i pakhat tluk hmanh hin aa dawhmi hnipuan a ngei lo. 30

Sihmanhsehlaw ramlak ramkung, nihin ah a hring i thaizing ah meichung i an paihmi ramkung hna, a thuamhtu cu Pathian pei a si cu. Amah nih cun nannih chinchin cu thuamh loin an um hna hnga maw? Nan zumhnak a va hme hringhran dah! 31 Cucaah, ‘Khuazei in dah ka ei awk ka rawl cu ka hmuh lai, ka din awk cu ka hmuh lai, ka hnipuan cu ka hmuh lai,’ tiin lungrethei in um hlah ngat u. 32 (Hi thil hna cu Pathian bia lomi hna nih an lungre an i theihpi zungzalmi pei an si cu.) Vancung khua i a ummi nan Pa nih hi thil vialte cu nan herh dih hna ti kha a hngalh ko.

Ka thannak le fimnak ka cawnnak hmun, thatcaan ah a ka lomhpi zungzal tu le ngeihchiat caan ah lung a ka fahpi tu, a rak ka cawmtu le a ka dawtu hna umnak, Sianginn sang le kan Khrihfabu chungkhar hna inn le lo vialte vutcam ah a ciam dih ko e timi thawngtheih cu thinlung chungah fei chunh bantuk in a fak hringhren.

Dawtnak in a ka than tertu hna umnak runinn, siaherhnak le zawnruah nak ka cawnnak chungkhar hna nan lungkuai dingning le nan ngan fah dingning ka ruahah ka nunnak nih a celh hrimhrim ve lo. Nan zamnak le nan i dornak hmun cioin biangcung ah hnawhcawk loin a luangmi nan mitthli Bawipa nih a hmuh.

Tinh piakmi a kan ngeitu zong a mah Bawipa a si caah a rawk khomi le khangh khawhmi inn le lo leiah kan thinlung, ruahnak hoi lo in a rawk kho lo i a kan zamtak ballo tu Bawipa dawtnak lei tuah nan nunnak rak hoi cio hram u. Bawipa nih nan tuarmi aa cinken ko, a philh lo. A dawtnak zong a zor hlei lo i a kan zamtak bal fawn lo.

Isiah 41:10-13-Na thin phang hlah… na sinah ka um ko. Keimah cu na Pathian ka si zeihmanh tih hlah. Kan thawnter lai i kan bawmh lai, kan huhphenh lai i kan khamh lai. Ka mi hna nan cung i a thin a hungmi cu hmaichiatnak le ningzahnak an hmu lai. Nanmah an dohtu hna cu an thi lai, nanmah cungah raldohnak a tuahmi cu vawlei in an lo lai. Keimah cu Bawipa nan Pathian ka si i thawnnak kan pek hna. “Nan thinphang hlah u. kan bawmh hna lai tiah keimah nih ka ti,” a ti. Credit: Biak Tha, John Za Thleng