Pastor Hi Lam Kan Zawh Ve Awk A Si Maw?

Pastor Hi Lam Kan Zawh Ve Awk A Si Maw?
xxxxxxxxxxxxxxxxxxxxxxxxxxxxxxxxxxxxxxxx
Minung 270 leng thisen nunnak a liam cang. 2400 renglo tlaih an si cang. Mino tampi hliam hma an pu cang. Cozah riantuanmi tampi inn le lo nupi le fa an kal tak cang. Rammi vialte dinnak le zalawnnak hmuh duh ah an tap, an hrum an ai. A fa thimi, a unau thimi hna nih ngaihchiatnak le tihnak nakin ralthatnak tu a ngei chinchin. Nihin mino le mipi nih an zawhmi lam hi zeitlukindah tih a nun? Chungkhar i Pa bik nih ka fale hi tih nungmi lam ah nanmah va kal u law kei cu inn chungin kan dirkamh hna lai, a ti ahcun cucu chungkhar Pa bik dirhmun a dir ko kan ti kho hnga maw?

Dum chung i an tlaih lai zanah a zultu hna sinin hmailei pi ah a va chuak i nan kawlmi pa cu keimah hi ka si, ka mi hna cu tong hna hlah u, tiah Jesuh nih a ti (John 18: 4, 6 NIV). Amah cu tonter ah thlaih hmasa dingin a pum aa ap. Pulpit cungin Martin Luther King Jr le Dietrich Bonhoeffer kong cu Pastor tampi nih kan chim ko hna lai. Anmah hna cu lam a zawhmi, nunnak lam cungah aa phakmi an si hi kan philh lo ding a biapi ngai.

Buddhist Phungki hna lampi ah an puan sen hmuh khawh an si. Asinain Pastor gown, suit le necktie cu a lenglo (civil form in lam a zawh vemi cu kan um kho men). Nihin do thlennak cu pennak system a dik lo, a hman lomi (Satan pennak) doh a si ti cu ngakchia upa, mino tar dihlak nih kan pommi a si. Mah hi a si ko ahcun gown aa hrukmi Pastor, suit le necktie aa hrukmi Pastor cu hmai in kal awk a si ko lo maw? Pathian kawhnak a theimi kan um lo caah maw a si hnga?

Pastor nunank pakhat tal, Pastor thisen dor khat tal tlak lo in maw mipi nunnak tampi cu a laim rih ko lai i, mipi thisen cu cat loin a luang rih ko lai maw? Member thong tampi nunnak aiah Pastor pakhat nunnak tal cu liam ve ko sehlaw thlennak taktak cu a chuak ko lai dakaw. Zeicatiah God’s intervention battle ground (Pathian pumpak aa telnak raldohnak) a si ti khawh a si. Mah caah ral dohnak cu teinak a hmuh hrimhrim ko lai. Teinak cu Bawipa ta a si! Amen.

Ramdang um Pastor tu cu Kawlram vawlei ah (the battle ground) ah lam zawh khawh kan si lo. Asinain a cheukhat cu kan tuah khawhmi hmanh kan tuah duh lo. Kan member pawl hi din lonak dohnak ah thazang kan pek hna lo piin ah Khrihfabu in cawlcanghnak ah mipi kan hruai duh hna lo. Member cheukhat mithli le hnapdor he, lungthin fak, lung kuai in an um lio ah dai tein kan um. Rev. Dr. S. Hre Kio nih Centenary lio ah “Adam dai tein a um kha a sual” tiah a timi kan si ve sual lai. Kan tuah khawhmi thil hi risk um loin a nganpi a si hi kan philh lo ahcun fak piin kan au, thazang kan chuah ve ding hrimhrim a si. Thlacam lawng a za lo. Pulpit lawngin a za lo. Hmai lei in mipi le Khrihfabu a hruai ding kan si. “Nu Pastor tam deuh si ahcun a tha deuh men lai” (Capo biatak). Credit: Saya Peng Ling