Pastor Cung Biak Hum Cu Ralhrang Nih An Kah Hramhram Mi A Si!

Pastor Biak Kolh Hi Civil Minung A Si An Theih Ko Bu Ah SAC Ralhrang Nih An Kah Hramhram Mi A Si
=========
Tuchun Thantlang Pastor Biak Kolh an kah ning cu kah lio i a ummi pawl nih an chimning ah lung a fak ngaingai. Ai telmi chim ning in ka van langhter lai: “Inn kaang phalh dingin chaklei sang in minung 6, thlanglei innkangh nak lei ah cycle in kan zuang hna. Thantlang Lansung phak lai Pu Al Cung (Van Bawi pa) inn hmai kan phak bak ah, Pu Khen Lai inn pawngin Ralkap nih an rak kan kah. Ralkap hi kan hmu cia hna lo.

An kan kah tikah kan lau i Leklak cycle in kir kan itim i kan cycle kan mer hna i kan cycle kan mernak ah kan tlu cio hna. Nain midang hi cycle in kal ti loin kan ke in kan pawngkam iphennak a tthatnak deuh le inn karlak in kan zam. Pastor Biak Kolh tu hi cycle in a ttho tthan i a tli tthan.

Cu tikah ralkap pawl nih an kah i a zak ah an khen i a tlu tthan. Cu a tlumi cu an rak fuh i a hmun ah a ttang bak ah voihnih in an kah tthan. Rak dawi in rak kap tthan hna hlah sehlaw, a nung zong a nung men ko hnga. Cu lawng si loin, a hngawng ah ai awihmi Suitthi kha an lakpiak. Cu pinah a kutdong hrolh zong kha a kut an tan i an lakpiak.

Hi ko hi lung a fak khun. Cun a kan kaput ralkap nihhin Civil mi kan si fiangte in an kan theih ko. A ho kan si zong ah Thantlang ahcun upa deuh le hruaitu deuh, amah Biak Kolh zong cu pastor si tikah an kan theihtuk ko. Nain, an kan kah hramhram mi bak a si tiah meiphalh ah zuan ai timi minung 6 chungin pakhat nih a chim.

Pastor Cung Biak Hum ruak JMBC khrihfabu pastor hna nih an laak khawh cang. 2021 September 18 zaanlei sang Thantlang khuapi chung ah meithal le bomb puah thawng theih hnu inn 10 leeng a kaangh lawng si loin TCBC khrihfabu Pastor Cung Biak Hum cu SAC mithat phu hna kut in a nunnak a liam tiah thawng kan theih.

Thantlang khuapi chung inn a kangh hi zaanlei suimilaam pathum fai in kangh hram aa thawk i, 6:00PM fai lawng ah mei an hmih khawh. Inn a kang mi mei phalh awk ah a kal mi hna cu SAC lei nih an kah hna i, hi an kah mi chung ah Pastor Cung Biak Hum an khen i lamkam ah a ruak in hmuh a si.

Hi kong he pehtlai in Thantlang khuami pakhat nih, “Inn a kang mi phalh awk ah a kal mi poh SAC nih an kan kah. Saupi inn a kaang mi hmih khawh loin kan um. An kan kahnak ruang ah TCBC khrihfabu pastor kuanfang nih a khen i a nunnak a liam. A dang hliam a tuar mi le a nunnak a liam mi an um le um lo kan thei kho rih lo,” tiah The Hakha Post ah a chim.

Pastor Cung Biak Hum hi nupi le fate pahnih he khua a sa mi a si i, tu thla a si lo hmanh ah hmaithla chung ah a pathumnak a ngei ding an si tiah kan theih. Tuzaan 6:30PM tluk ah JMBC khrihfabu upa le pastor hna nih a ruak tluang tein an va laak khawh tiah kan theih.