Paletwa Peng Kahdohnak ah CNA le CDF Ralkap 2 an Nunnak a Liam!

Paletwa Peng Kahdohnak ah CNA le CDF Ralkap 2 an Nunnak a Liam
———–
March 12 le 13 ah a cangmi Paletwa peng chung kahdohnak ah Chin miphun ralkap lei in minung 2 an nunnak a liam, tiah thawng kan theih. Matupi peng, Lailenpi khua in Htaybwai khua ah thazaang chap ding in aa thawhmi SAC ralhrang 150 hrawng cu March 12 le 13 ah CNA, CDF-Paletwa le CDF-Matupi nih lampi ah an kah hna.

March 12 kahdohnak ah SAC ralhrang pakhat a thi i, a dang 5 hrawng hliamhma an pu, tiah CDF-Paletwa nih thawngpang an chuah. Cu kahdohnak ahcun CDF-Paletwa in Salai Joshua nih ram le miphun ca ah a nunak a pek. Cun, March 13 zinlgei sml. 9:00 le zaanlei sml. 3:00 ah kahdohnak voi 2 a chuak tthan.

Cu kahdohnak ah cun SAC ralhrang a tlawm bik 7 an thi tiah i, a dang minung 10 hrang hliam an pu. CNA in ralkap pakhat nih a nunnak a pek ve, tiah CDF-Paletwa nih an langhter. SAC ralhrang nih miakpi in an kah ruang ah Tuisawkung khuate sianginn, inn pakhat le biakinn pakhat zong an rawk, tiah an langhter chih.

Kalaymyo In Thlanglei Sangah Ni Hnih Chung Kahdohnak A Chuak, CDF-KKG Pakhat Le Mipi (2) Nunnak Liam! Sagaing ramthen Kalaymyo in thlanglei sang Natchaung khua le Htuma (နတ်ချောင်း နဲ့ ထိုမာရွာ) khua karlak ah March 8-9 ni hnih chung, mipi vengtu le SAC ralhrang ralkap karlak ah kahdohnak vawihnih a chuak i, CDF-KKG pakhat le ralzaam mipi (2) nunnak a liam tiah CDF-Kalay nih cathanh an chuah.

Yan Gyi Aung khua ah umnak sakhan tuahtu SAC ralhrang ralkap (70) hrawng cu March (7) ah khan Tan Phu, Khui Cing, Hee Luk, Aung Chian Tha le Nga Pha khua pawl cu lonh tak hratin Nat Myaing khua ah kahdohnak tuah dingin an kal.
March zanlei sml 2:00 thawkin Nat Myaing khua nichuahlei ah nawlngeihnak latu SAC ralhrang ralkap le PDF-Kalay, CDF-KKG, CNDF, RKDF le ပ. က.ဖ fonhmi phu karlak ah minutes (30) chung an i kap.

SAC ralhrang ralkap nih Nat Myaing khua chungah hriamngan an kah i, Nat Myaing khua chungum Aung Myi Ya Pyih phungkii sianginn chungah tla in a puah ruangah cuka hmunah himnak kawl in a zaammi minung (3) nih hliam an tuar i, pakhat cu a nunnak a liam.

Cuka kahdohnak ah CDF-KKG phu chungtel Johan Htet Naing Zaw nunnak a liam. Lamhmuhsaktu ah tlaih in an kalpimi Nat Myaing khua mipa pakhat zong khua lu lei, uk-khe an tuahnak hmun pawngah a lu ah meithal kahnak in a nunnak a liam.

Pehzulh in March 9 zinglei ah Nat Myaing khua in nitlaklei ah kahdohnak tuah in an kal than caah Ing Sein khua hlun chungin kal hratin CDF-Kalay nih lamhlat kahnak hriamngan in an kah hna hnuah chun sml 12:00 hrawngah Htuma (ထိုမာ) khua pawngah minutes (20) chung cu naihniam taktakin an i kap than. Ni hnih chung kahdohnak ah SAC ralhrang ralkap leikap ah a thimi le hliammi zat theih a si lo.

Rih Khua Dar Khuapi “Tyi U Chaung” Ah Meithal Puah Thawng Le Hriamngan Puah Thawng Theih A Si! Chin ramkulh le India ramri Rih Khua Dar khuapi chung sang (2) nak zawn “Tyi U Chaung” ah March 9 zinglei sml 11:00 thawkin meithal puah thawng vawi (20) tluk le hriamngan puah thawng vawi (2) bak kan thei tiah khuami nih an chim.

March 8 zaan sml 9:00 hrawng zongah Rih Khua Dar sang (1) nakin, lamhlat kahnak miap-pi hmangin vawi (1) an kah tiah an chim rih. Rih Khua Dar khuapi ah khuasami minung 1000 lengkai hna cu India ramchung ah an tli/an zaam hna i, zanlei sml 6:00 hrawngin Rih Khua Dar khuapi chungah lut than rih lo dingin CDF Hualngoram nih ralrin peknak cathanh an chuah ruangah mipi cu inn an tlung ngam rih lo tiah Zalen nih a tial.

Yinmabin Peng Chung Letpantaw Khuami (11) Cu SAC Ralhrang Ralkap Nih Meikhangh In Thah! Sagaing ramthen Yinmabin peng chung Letpantaw khuami ralzaam mipi (11) cu SAC ralhrang ralkap nih meikhangh in an thah tiah khuami nih an chim.

March 8 zinglei sml 11:00 lengkai ah SAC ralhrang ralkap 180 tluk nih Letpantaw khua chung cu hriamngan in an kah hnuah khua chung luhhnawhnak an tuah tiah khuami pakhat nih a chim. Hriamngan puahnak in a thimi zong an um bantukin tlaihmi cheukhat zong an thah hna i, cheukhat cu atu tiang an tlau tiah khuami pakhat nih Than Lwin Khet ah a chim.

SAC ralhrang ralkap rual cu March 9 zinglei ah Letpantaw khua in an chuah hnuah meikhangh nakin a thimi ruak nehnang cu khuami nih an hmuh hi a si. Khuami minung (10) cu inn pakhat chungah kharkhum hratin meikhangh hratin an thah pinah khuami inn (2) zong mei nih a kaang dih. A dang nunnak a liamtu tarnu ruak pakhat tu cu phungkii sianginn kulh chungah an kaltak tiah Yinmabin peng chung a dikmi thawngzamhnak phu nih cathanh an chuah.

Hriamngan puahnak in hliam a tuartu minung (12) chungin pakhat lawng hmuh a si rih i, a dang minung (11) hna cu an konglam zong theih a si rih lo pinah khuami mipa (3) hna zong an konglam zeihmanh theih a si lo tiah khuami pakhat nih a chim. Phungkii sianginn ah an kaltakmi tarnu ruak cu LPDF le Hero Tiger phu nih ruak an vui tiah theih a si. Credit: The Federal Post