Paletwa Peng Ah AA Nih Tualchung Mi Thilri Hramhram In An Laakpiak Hna
============
Chin ramkulh, Paletwa peng, Thantaung khua SAC ralkap sakhan ah umhmun a khuarmi AA ralkap nih Paletwa peng khuami hna thilri cu zan an i hngilh karah an firpiak hna, tiah theih a si. Thantaung peng cu a hlan ah SAC ralkap nih umhmun an rak khuarnak a si i, 2023 thawk ah AA he kahdohnak a rak chuah hnu ah SAC ralkap nih sakhan cu an chuahtak i, AA ralkap an um, tiah theih a si.
Chin ramkulh, Paletwa khua um ralhrial chungkhar 602 cu SAC kuttang department kip nih May 11 ah tangka le facang an bawmh hna, tiah zalen nih an ṭial. Social Welfare Relief and Resettlement Department nih minung pakhat ah zarhhnih tiang ei khawh dingin phaisa 4,200 cio an bawmh hna.
Ministry of Border Affairs nih chungkhar 602 cu eidin dangdang an bawmh ve hna, tiah theih a si. Cu bawmhchanhnak cu Paletwa Kimu Hall ah SAC Battalion le zungkip rianṭuantu hna i bawm in an pekchanh hna, tiah theih a si. Bago ramṭhen, Htantapin peng Nyaungpinthar khuami ngakchia 7 telh in tualchung mi 17 cu SAC ralkap nih mei in an khangh hna, tiah PDF in ralkap pakhat nih a chim.
May 10 zinglei suimilam 10:00 in zanlei suimilam 5:00 tiang Nyaungpinthar khua pawng ah SAC ralkap le KNU, PDF kar kahdohnak a chuak i SAC ralkap 20 an thi, ralbawi pakhat telh in ralkap 3 an tlaih hna. SAC ralkap lei a thimi an tam caah ngakchia 7 telh in tualchung mi 17 cu mei in an khangh hna, tiah theih a si.
“May 10 zing suimilam 10:00 in zanlei suimilam 5:00 tiang kahdohnak voi 5 a chuak i SAC ralkap 20 nak tlawm lo an thi, 10 hliamhma an tuar. A thimi an tam caah tualchung mi 17 cu a bu in mei in an khangh hna,” tiah PDF in ralkap pakhat nih a chim.