Palek le Ralkap nih tlaih sual ahcun timh cia te in biachim khawh le mah pumpak i huhphen i kilven khawh zong hi dohnak

Tu lio kan ram thil um tuning ah ralrinnak tampi timh tuah kan hau cang. Dohnak lei kap lawng ruah lo in kilvennak le upadi lei in mah le mah huhphenh kilvennak (protection) hi zapi nih timh tuah cio a herh cang. Tachunhnak ah nizaan nai ah Hakha ah an tlaih hna mino pa 4 hna (ka chungkhat unau fa) nih biachimh ding tinh tuahnak a ngei cia lo tik ah thate in khuaruah manh lo in thil an si ning an chimh colh tik ah ralkap nih pohmah bunh in direct taza an cuai colh hna. MWD tv ah an langhter colh hna.

Cu caah na kut cung ah, Chai maw, Nam maw, Hriamnam phung khatkhat, Helmet tiang fung tiang zei paoh an tlaih dih cang. Lai meithal maw fei maw zeizei maw, Lam na kal ah na phone an tlaih ah siseh, Tlaih sual ah upadi lei in 505 (a) maw 505 (b) maw a dang dang tampi in tazacuai khawh colh a si caah biachim i palh ahcun thong kum 2 in kum 20 tiang pohmah tampi he tazacuai khawh a si caah mipi nih mah le mah caah siseh mipi caah theihnak awareness hi fakpi in tuah a hau cang.

Pohmah 505 (a) cu cozah, ralkap, palek kha doh asiloah dohnak a ruang an hmuh ah maw cu bantuk he a pehtlaihmi, (fei le nam, lai meithal, hriamnam, Na phone chung ah cu bantuk he a pehtlaimi) Pohmah 505 (B) cu ram, cozah, bu le cozah minung kha doh ral ding i mipi sin ah forhfial, thawngthanh le sawm, cun mibu pakhatkhat tih phan lauter duhnak ruahnak, forhnak le, cun cu bantuk he a pehtlaihmi kong a um ahcun (facebook viber chung ah tialmi/share mi le hmanthlak, sandah piahnak, mi sawmnak..tbt tampi) (A tawifawinak in lehmi)

Hi pohmah pa 2 hi a tu lio ah an hman bik a si caah a cung i 505 a le b bantuk he a pehtlaihmi mah pumpak siseh chungkhat sahlawh nih ton sual ah ton le cang kha in baihalnak ah a chimrel thiam lo ahcun azukhan zong pek lo in thong kum saupi tlak khawh a si caah chimrel ding le timh tuahnak hi ngeih cia ah a a tha. Cun Pohmah 333 le 124-c zong an hman khawh.

Cucaah dohthlennak lamtluan ah palek le ralkap nih tlaih sual ahcun timh cia te in biachim khawh le mah pumpak i huhphen i kilven khawh zong hi dohnak phunkhat a si. Mino mi raltha tampi a chung ah an khumh hna ahcun cawlcaanghnak a zor tuk kho. Cucaah tih ding cu a si bak lo nain ralrin cia ah a tha. Cun, i tlaihter lo ding a biapi. Ram a buai tuk zong ah Myanmar penal code hi a nung.

A tawinak in cun, Biachim thiam ahcun Nawlnak (appeal – azukhan) nak le kum saupi thong tlaknak in luat khawhnak a lam a um pin ah sual phawtnak a zorter khawh deuh caah chimrel thiam le mipi nih upadi mit in luatnak lam pawl hi fimchim awareness tuah a biapi. Credit: Dr. Sui Hingz